Read Yupik Jeremiah 51 Bible Online

Jeremiah 51 - Yupik bible

Jeremiah 51

¹Waten ATANEQ qanertuq: Taiteqatartua anuqerpagmek piunririlriamek Babylon-aamun yuinun-llu.

²Ayagceciciqua allanernek Babylon-aam piunrirtekainek anuqetun caranglluirilriatun. Erenra piunririlriim tekiskan, curugciqut tamiin avatiinek, uniciiqaat-llu nuna carrartairulluku.

³Anguyagtait pitgaqusciigatevkarluki pikiciki anguyagcuutait-llu at'esciigatevkarluki. Yun'erraat ilakuivkenaki tamalkuita tuquskiciki! Piunrirrluki tamalkuita anguyagtet!

⁴Iquaciqut tuqualuteng Babylon-aarmiut nunameggni, tumyaraini-llu kiliumalriit taklaluteng.

⁵Tua-i-wa ATANREM Agayutem Artuqailnguum, cakaaqsailakek Judah-nkuk Israel-aaq-llu, assiilngillrungraata elliinun, Tanqinqukacaariinun Israel-aam.

⁶Qimagci Babylon-aamek! Tuquyuartuci! Babylon-aam assiilngillra pitekluku tuqukaunrituci. Maa-i anucimirqecetaaramku akinaurluku pinarqutii aturluku.

⁷Babylon-aaq suulutaatun saskatun ayuqellruuq unatemni, ellarpak tamalkuan taangiqevkarluku. Atanruviit yuit tuaken merluteng usviirutut.

⁸Babylon-aaq alqunaq iquuq piunriumaluni! Qiatekiciu! Engellugtullrani iinruvkarluku assiriyuartuq.

⁹Allanret tamaanelnguut qanertut, “Ikayungnaqsaaqerput Babylon-aaq tau͡gaam kingurautukut. Wanirpak ayagnaurtukut kingunemten̄un. Agayutem anucimirqecetaaraa Babylon-aaq pinini tamalkuan aturluku piunrirteqapiggluku.”

¹⁰ATANEQ qanertuq, “Yuunka qayagpagtut, ‘ATANREM nallunrircetellruakut wangkutnun piciulria aturniluku. Ayagluta qanrucarturnauput yuut Jerusalem-aami ATANREM Agayutemta caliaqellrinek.’”

¹¹ATANREM pek'ngarcetellrui Media-m angayuqri, piunrirarkaungamiu Babylon-aaq. Tuaten piluni akinaurarkaungami Agayuvigpiim navguumallra pitekluku. Anguyakatalriit atanerruat alerquigut, “Pitegcauteci ipegcarciki! Capkutaci upciki!

¹²Curullerkaat Babylon-aam casguin pisqiciu. Nayurtet ilaluki! Murilkestekat elkarrluki! Anguyagtet iirtelluki alqunak anqertarkat!” ATANREM piarkani pii Babylon-aam yuinun qanellni aturluku.

¹³Kuiget tamaani nunami amllertut tukuutai-llu amllerrluteng, tau͡gaam pillerkaa tekituq, yualukartaa unguviin kepumauq.

¹⁴ATANEQ Artuqailnguq ukvernarcarillruami elliin unguvamikun taitarkauluni amllellrianek angutnek anguyagtekainek Babylon-aam petgertayulitun amllertalriatun, taukut-llu qayagpagciqut qakvautmek.

¹⁵ATANREM nuna piliaqellrua pinimikun; umyuartutacimikun ellarpak piliaqellrua qiliit-llu saggluki.

¹⁶Alerquraqateng mer'et qiliit quliitnelnguut ellerrartut; amirlut-llu taivkalarai nunam iquinek. Ellallugmi kalluk kenerpallaravkalaraa anuqa-llu ayagcetaqluku elliviminek.

¹⁷Makut tangerrluki, yuut umyugaitelartut taringumavkenateng; Suuluciiyurtet agayutngualiarita kasnguyugcet'larait; agayucet piliarit piciunrilameng anernerunateng-llu.

¹⁸Camun atuunritut uumikumanarqut-llu; piunriumaciqut ATANEQ taikan caliaqsarturluki.

¹⁹Jacob-aam Agayutii ellaicetun ayuqenritut; elliinguuq piliaqestellrat cat tamarmeng, cucukellrua-llu Israel-aaq elliin nakmiin yuksugluki. ATANEQ Artuqailnguq elliin atqaa.

²⁰ATANEQ qanertuq, Babylonia-q, mulut'uukamken, anguyagcuun caskuka. Aturluten ciamtelaranka atanruviit angayuqauviit-llu,

²¹aturluten navgurlaranka horse-aat ekumastait-llu, navgurlaranka ayagassuutet akalrialget alulartait-llu,

²²tuqutaqluki arnat angutet-llu, tuqutaqluki ayagyuat ak'allaat, tuqutaqluki tan'gaurluut nasaurluut-llu,

²³tuqurqaqluki qusngiliurtet katngait-llu, tuqurqaqluki nauceciiyurtet horse-aarit-llu nunamek itumcissuutait, ciamtaqluki atanirturilriit atanerruat-llu.

²⁴ATANEQ qanertuq, “Tangvagciqerpenga akinauqumku Babylon-aaq yui-llu assiilnguq pillrat Jerusalem-aamun pitekluku.

²⁵Babylon-aaq, ingritun ayuquten piunrirtiitun tamiin ellarpak, tau͡gaam, Wii, ATANEQ, inglukestekarpenga. Teguciqamken, imluten nunamun, unilluten-llu qamlleruluten.

²⁶Imnerpeni teggalqut iliit watqapik atunqiggngaitut enelianun. Cakarniiruciiquten nunatun mer'ilngurtun akwarpak. Wiinga, ATANEQ qanertua.

²⁷“Curuusqiciki! Cupu'uryaraq cupluku atanruviit niitelluki! Upciki atanruviit anguyagmun Babylon-aaq inglukluku! Qanruciki angayuqauviit Ararat-am, Minni-m, Ashkanaz-aam-llu curuusqelluki. Cucuklirci curulriit ciuliqagtekaatnek. Horse-aat tailluki amllertalriit petgertayulitun.

²⁸Upciki atanruviit anguyagmun Babylon-aaq inglukluku. Taisqiciki Medes-aat angayuqrit, ciuliqagtait, atanerruarit-llu, anguyagtait-llu nunat tamalkuita ataniumak'ngaita.

²⁹Nuna uulegtuq arulaluni ATANREM picirkiurani atuaku Babylon-aaq nunakarniirutnaluku yuirulluku.

³⁰Anguyagtai Babylon-aam callunrirluteng asvairqumalriani uitavimeggni uitaluteng. Alingem tuc'ateng qaillun-llu pisciiganateng. Ayuqliriut enait ekualuteng nunarpiim iteryarai navgumaut, enet-llu ekualuteng.

³¹Kevgat qaneryartulriit kinguqliqluteng qanrucarturaat angayuqra Babylon-aam nunarpii iterniluku nau͡gg'un tamiinek.

³²Inglukestaita teguat kuigem qeraryaraa asvairqumalriit-llu ekuavkarluku. Babylon-aam anguyagtai tavluteng qaillun picirkaitut.

³³Ak'anun pivkenaki inglukestaita tuqurqeciqait tutmaulluki-llu mukaarkatun carrirviata natrani. Wiinga, ATANEQ Artuqailnguq, Israel-aam Agayutii, qanertua.”

³⁴Angayuqran Babylon-aam uklia Jerusalem-aaq nerluku-llu. Caqutun imairaa; carayagtun igluku. Piyullerminek tegutuq uitaskengani-llu eggluki.

³⁵Zion-aam yui qanerlit, “Babylon-aaq pinarqelriaruli nangyun anagutellria wangkutnun pimalleq pitekluku!” Jerusalem-aam yui qanerlit, Babylon-aaq pinarqelriaruli nangtequtelput pitekluku!

³⁶Taumek ATANREM Jerusalem-aam yui waten qanruskai, “Ikayurluci akinauruciiqamci inglukestevci pillritnek elpecen̄un. Babylon-aam mer'in qagatait kinerceciiqanka kuigi-llu kinertelluki.

³⁷Tauna nuna imenrurciiquq ungungssiaraat tau͡gaam uitaviksagulluku. Tangellra alingnariciquq; uitavikestairulluni, tangertem̄inun alingnarqelriarurciiqngami.

³⁸Babylon-aarmiut uirraniciqut yugtutulitun piyagaicetun-llu.

³⁹Ilateng-qaa piirasaalarait? Neqkiurciqanka taangiqevkarluki nunaniryugtelluki-llu. Qavarciqut tupanqigtevkenateng-llu.

⁴⁰Tugucimallerkaatnun ayauciiqanka, qusngiyagartun, qusngirngalngurtun, qusngirngalnguut-llu angucaluicetun. Wiinga, ATANEQ qanertua.”

⁴¹ATANEQ qanertuq Babylon-aaq piluku: “Nunarpak nunam yuin nanraraqellrat teguarurtuq. Angayuqauviit yuitnun alingnaqvagta Babylon-aam tangellra!

⁴²Imarpiim nalillrua Babylon-aaq patuluku-llu ellerrartellrianek qairnek.

⁴³Nunarpain tangellrat alingnariut mer'ilngurtun meriulluni qau͡gyaurrluni, uitavikestairulluni yuk-llu tamaaggun kiturnanrirluni.

⁴⁴Anucimirqecetaarciqaqa Bel-aq, agayutnguarat Babylon-aarmiut, teglegai angitelluki; atanruviit agayuarkaunrirtelluki elliinun. “Babylon-aam qacarneri navguumaut.

⁴⁵Israel-aam yuini, cukamek ayagci tuaken! Unguvasi qimauciu tuknilriamek eq'urtellemnek.

⁴⁶Ciunerkairuteksaunaci wall'u alingeksaunaci qanengssagnek niiteng'e'rpeci. Allamiaqan alla qanengssak sagtelartuq, qanengssiit nangyutellrianek nunami angayuqaanek-llu inglukuurutellrianek.

⁴⁷Taumek erenret agiirtut anucimirqecetaarillerkaqa Babylon-aam agayutnguarinek. Nuna tamarmi kasnguyugcecimaciquq, yui-llu tamarmeng tuqucimaluteng.

⁴⁸Cat tamarmeng qilagmelnguut nunamelnguut-llu qayagpagciqut angnirluteng Babylon-aaq cirlakekatgu piunriryarturtain neglirnermek.

⁴⁹Babylon-aam tuquvkallrui yuut ellarpiim iluani, waniwa-llu Babylon-aaq iivkaumaciquq tuqutaullrat amlleret Israel-aat pitekluku. Wiinga, ATANEQ qanertua.”

⁵⁰ATANEQ qanertuq Babylon-aam yuinun: “Tuqutaullrunrilngurni anguyagmi uitavkenaci ayagci! Yaaqsing'e'rpeci kingunerpecen̄ek, umyuaqekicia, elpeci ATANERCI, Jerusalem-aaq-llu nalluyagutevkenaku.

⁵¹Waten qanertuci, ‘Wangkuta caunrilkumaukut kasnguyugcecimaluta; casciigalngurtun ayuqluta allanret uitaviksagucatki tanqilriit Agayuvigpagmi.’

⁵²Taumek, qanertua pillerkaq agiirtut qaillukuarillerkaka Babylon-aam agayutnguarinek, kiliumalriit-llu yuuniararkaugut tamiini nunami.

⁵³Babylon-aaq qilagmun mayuryaaqsartuq, asvairqumalriamek-llu nauciluni tuani, tuaten pingraan piunrirtekainek wiinga ayagceciyartua tuavet.” Wiinga, ATANEQ qanertua.

⁵⁴ATANEQ qanertuq, “Niiciki nepiit qialriit Babylon-aami, qiatekaat nunam piunriumallra.

⁵⁵Tua-i-wa ATANREM piunriaku Babylon-aaq, cayunaitellrungraan nepairutelluku. Anguyiit curugaat qairtun ellerrartellriatun anguyagaat neplirluteng qayagpagaluteng.

⁵⁶Tailuteng piunriryarturaat Babylon-aaq; anguyagtai teguarurtut, urluvrit ayemqumaluteng. Wiinga Agayutnguunga, anucimirqecetaarilalriarulua assiilngurmek, Babylon-aaq-llu akinaurciqaqa pinarquciatun.

⁵⁷Atanirturtait taangiqevkarciqanka, angutet umyuartulriit, ciuliqagtet, anguyagtet-llu. Qavarciqut tupanqigtevkenateng-llu. Wiinga, angayuqaq, qanertua; Wiinga ATANRUUNGA Artuqailnguq.

⁵⁸Casgui pinilriim Babylon-aam imcimaciqut nunamun sugtulriit-llu iteryarai ekuavkaumaluteng. Atanruviit caliallrit ekuaciqut elliinginaq caliarurrluteng; cakviurutkellrit ekuamaluteng. Wiinga, ATANEQ Artuqailnguq, qanertua.”

⁵⁹Angayuqam Zedekiah-m nakmiin pistii atengqertuq Seriah, Neriah-m qetunraa, Mahseiah-m tutgaqluku. Allrakut cetamiitni Zedekiah-m angayuqrullran Judah-mi, Seriah-m maligteqatallrua Babylon-aamun, Jeremiah-m-llu ayuqucirturluku.

⁶⁰Jeremiah-m igautellrui kalikarnun assiitellriit tut'arkat Babylon-aamun, allat-llu cali igausngalriit Babylon-aaq piluku.

⁶¹Jeremiah-m alerquraa Seriah: “Babylon-aamun tekiskuvet pinritevkenak naaqekiki makut,

⁶²waten-llu qanerluten, ‘ATANEQ, elpet qanellruuten piunrirciqniluku man'a nuna uitavikestairulluku yugmek wall'u ungungssimek, akwarpak-llu qau͡gyarrlainaurciiqniluku.’

⁶³Qaqiskuvki naaqellrat ukut kalikat, teggalqumek kis'ucirluki egeskiki qukaanun Kuigem Euphrates-aam,

⁶⁴waten-llu qanerluten, ‘Waten ayuqluni Babylon-aaq kiciiquq, puglerrngairulluni, assiitellria tuc'etarkaungamku elliinun.’” Wani iquklitut Jeremiah-m qanellri.