Read Yupik Jeremiah 52 Bible Online

Jeremiah 52 - Yupik bible

Jeremiah 52

¹Zedekiah angayuqrurtellruuq allrakungeqerluni yuinaq ataucimek cipluku (21), angayuqruluni-llu Jerusalem-aami qula ataucimek cipluku (11) allrakuni. Aaniin atra Hamutal-aullruuq, Jeremiah-m Libnah-mi uitalriim panikluku.

²Jehoiakim-aatun-llu assiilnguq atullrua ATANREM tangvallrani.

³ATANREM cakneq qenrucamiki Jerusalem-aam Judah-m-llu yui tangvallerminek ayagcetai. Zedekiah-llu inglulituq Babylon-aam angayuqranun Nebuchadnezzar-aamun.

⁴Angayuqaullran Zedekiah-m allrakut qulngunritariitni, iralut qulngurutiit qulnek ernengqerluku, Nebuchadnezzar-aaq, Babylon-aam angayuqra, taiguq anguyagten̄i tamalkuita malikluki Jerusalem-aaq curugluku, avatairluku, marayanek-llu qerturiluki pililuteng nunarpak avatairluku kassutmun.

⁵Tua-i nunarpak avatairumaat allrakut qula ataucimek cipluku Zedekiah-m angayuqrullran engeliinun.

⁶Erenret qulngunritaraurteqerluki, iralut cetamiitni, piitnaq tuani nunarpagmi arenqialian yuut neqkairutut,

⁷nunarpiim qacarneri navgait. Babylon-aarmiut-llu avatairumangraatgu nunarpak, tamarmeng anguyagtet qimagtut unugmi. Ayagtut angayuqam naucetaarviakun, anluteng-llu ikirtuqakun qacarnerek akunliignelngurkun, qimagluteng-llu Arabah-m tungiinun.

⁸Tau͡gaam Babylon-aarmiut anguyagtaita malirqeraat Angayuqaq Zedekiah, teguluku-llu Jericho-m canimelkaini carr'ilqani, tamarmeng-llu anguyagtain uniqurluku cekavvluteng.

⁹Teguat-llu Zedekiah, ullautaat Angayuqamun Nebuchadnezzar-aamun, uitalriamun nunarpiini Riblah-m, Hamath-aam nuniini, tuani-llu Nebuchadnezzar-aam itengqallerkiuraa Zedekiah-m.

¹⁰Riblah-mi Zedekiah-m qetunrai tuqutai Zedekiah-mun tangvagtelluki, atanerruari-llu Judah-m tuqulluki.

¹¹Taum kinguani, Zedekiah-m iik qagercetak, kalivnercirluku-llu ayaulluku Babylon-aamun. Zedekiah-llu itercivigmi uitallruuq Babylon-aami tuqunatkaminun.

¹²Iralut tallimiitni, qulnek iraluq ernengqerluku, allrakut yuinaunritariitni (19) Angayuqam Nebuchadnezzar-aam Babylon-aami angayuqrullran, Nebuzaradan-aam, ayuqucirtuastiin angayuqam anguyagtain-llu atanirturtiita, itraa Jerusalem-aaq.

¹³Ekuavkarluki-llu Agayuvigpak, angayuqam-llu enii, Jerusalem-aami tamalkuita yuut piuranrita enait.

¹⁴Babylon-aam-llu anguyagtain navgurait Jerusalem-aam qacarneri.

¹⁵Nebuzaradan-aam-llu ayautai teguaqluki ilait yuut arrsaunrit, yuut-llu nunarpagmi unegtellret, uitaqallret-llu munalriit-llu calistet, ilautellret-llu Babylon-aam angayuqranun.

¹⁶Tau͡gaam Nebuzaradan-aam uitatai ilait yuut arrsaunkacagait, nunautailnguut, calivkarluki-llu wine-arkat naucetaarviitni allani-llu naucetaarvigni.

¹⁷Babylon-aarmiut-llu navgurait ciamlluki Agayuvipiim punerneret naparyai akalrialget-llu Agayuvigpagmi uitalriit, ilakluku angelria punerneq mervik, tamalkuita-llu punerneret ayaulluki Babylon-aamun.

¹⁸Cali-llu ayaulluki egatet, qanikciurutet, kenurranek nipcissuutet, ermigcuucet, qantat-llu tepkegcautmek aruviarmek imangqetulit, tamalkuita-llu punerneret atuulalriit Agayuvigpagmi agayuaqata;

¹⁹qantacuaraat, assigtait qamlleret kumalriit, ermigcuutet, egacet, kenurrarviit, qantat tepkegcilrianek imangqetulit, qantat kuvuurutet wine-amek elliitmek. Suulutaamek-llu piliaqumalriit qerrirlimek-llu nayurtet ciulirnerata ayaulluki.

²⁰Punernermek-llu piliaqumalriit, Angayuqam Solomon-aam piliallri Agayuvigpagmun malruk naparyak, akalrialget, angelria mervik, qula-llu malrugnek cipluku angucalut kuluviit merviim tusnganri uqamaitessiyaagameng uqamaltassiarciiganateng.

²¹Naparyak malruk ayuquk: tamarmek yuinaq malrunlegnek cipluku (27) it'ganernek sugtutalutek, akimiaq pingayunek cipluku ellegtalutek. Ilukek qerratalutek, cavik-llu pingayunek cuqnernek (3 inches) mamtutaluni. Taukuk-llu naparyak kangliumauk malrunlegnek avegmek aipirluku it'ganernek (7 1/2) quyigtalriamek, kassutmun tangnircaumaluni atsaruanek pomegranates-aanek, tamarmi punernermek piliaqumaluni.

²³Kassutmun tangnircautengqertuq yuinarnek tallimanek (25) pomegranates-aaruanek, tamakut-llu ilait yuinaat cetaman akimiaq ataucimek cipluku (96) alaunateng cailkamek.

²⁴Tamakunun ilakluki Nebuzaradan-aam, anguyagtet atanirturtiit ayautuq teguaqluki: Seriah Agayulirten͞guneq, Zephaniah agayulirta Seriah-m tunglia, pingayun-llu allat Agayuvigpagmi calilriit piuranrit.

²⁵Tuaken-llu nunarpagnek ayaulluni anguyagten̄un atanerruarullermek, malrunelgen-wa angayuqam nakmiin ayuqucirtuastai cali tamaanelnguut nunarpagmi, anguyagtet-llu atanerruarata ikayua, anguyagtet kalikaita qaunqestiit, allat-llu yuinaat pingayun (60) yuut piuranrit.

²⁶Taukut Nebuzaradan-aam ayautai Babylon-aarmiut angayuqratnun, nunarpagmi Riblah-mi uitallrani

²⁷Hamath-aam nuniini. Tuani angayuqam kaugtuarcetai tuqutelluki-llu. Tua-i Judah-m yui ayaucimaut nunameggnek nunakenrilkemeggnun.

²⁸Wani-wa igausngallrit yuut amllertaciit Nebuchadnezzar-aam ayautellrin teguaqluki: angayuqrullermi allrakut malrunelgatni ayautuq tiissitsaat pingayun yuinarnek pingayunek cipluku (4,600) yugnek,

²⁹allrakut akimiaq pingayunek cipteqerluku ayautuq yuinarnek, yuinaak malruk yuinaagnek malrugnek cipluku (832) Jerusalem-aamek;

³⁰yuinaq-llu pingayunek cipluku (23) allrakungeqerluku angayuqrullra, yuinaat akimiaq malrugnek cipluku talliman-wa (745), Nebuzaradan-aam ayautellrui teguaqluki Jews-aat. Quyurmeng yuut ayaucimallret amllertaluteng tiissitsaat cetaman yuinarnek yuinaq akimiarmek cipluku (4,600).

³¹Allrakumi tuani Evilmerodach-aam, angayuqrurtellermini Babylonia-mi, takumcukellrua Jehoiachin-aaq, Judah-m angayuqra, itercivigmek-llu anevkarluku. Man'a tuaten pillruuq allrakut yuinaq akimiaq malrugnek cipteqerluku (37), iralut qula malrunelgatni, yuinaq tallimanek cipluku (25) ernengqerluku Jehoiachin-aam teguaruluku ayaucimallran.

³²Evilmerodach-am pilaraa takumcukluku caliarkilluku-llu quyinruluku allani angayuqani teguarullgutaini Babylon-aami.

³³Jehoiachin-aam itercivigmi aturat atullni yuugai. Unuaquaqan-llu unguvallmi taktaciatun nerlartuq angayuqam estuuluani.

³⁴Cali-llu pinariaqan cikiumalallruuq aturyugarkai cuqluki unguvallran taktaciatun.