Read Yupik Jeremiah 6 Bible Online

Jeremiah 6 - Yupik bible

Jeremiah 6

¹Benjamin-aam yuini, qimagci picurlak avilluku! Qimagci Jerusalem-aamek! Cupu'uryaraq cupiciu Tekoa-mi, keneq-llu kumarrluku ilaci elpengcarciki Beth Haccherem-aami. Picurlak piunririlria-llu taiqataagnek negeqvam tungiinek.

²Tangssunarquq Zion-aaq, tau͡gaam piunriumaciquq;

³tuani angayuqat pelateka'arciqut anguyagteteng ilakluki, tamarmeng-llu pelatekateng naparciiqait piyullermeggnun.

⁴Qanerciqut, “Curugyuumaciu Jerusalem-aaq! Upci! Curugciqukut erenrem qukallrani!” Tau͡gaam cali qanerciqut, “Kinguqsigissiyaagtuq, unugniarartuq, atakuyartum-llu talinri uyaturiluteng.

⁵Unukan curugciqukut; navgurciqaput nunarpiim asvairqutai.”

⁶Waten-wa qanran Artuqailnguq ATANEQ, “Iqurqiciki napai mayuryariluku-llu Jerusalem-aam qacarnera, waniwaungan una nunarpak anucimirqecetaarumaarkaq; tua-i-wa nangcilrianek yungqerran.

⁷Elakam mer'a nutaraurrlainalauciatun, tuaten-llu Jerusalem-aam assiilucini nutaraurrlainarcet'laraa. Niitua pinerrlugtaarutmek piunririnermek-llu nunarpagmi; naulluunaq kilinret-llu kiingita tangerkengaqanka.

⁸Jerusalem-aam yuini, uitacurlagnarqelriit makut aarcirtuutngulit elpecen̄un, ilagaryuumirucuamci; nunarpagci kinertelluku qau͡gyarrlainaurceciiqaqa, kina tamaani uitangaunani.”

⁹ATANEQ Artuqailnguq qanertuq wangnun, “Israel-aaq perriumaciquq wine-arkanek naucetaarvigtun atsai nangqapiggluki iqvaumalriatun. Taumek aviutnarqaten yuut tamalkuita piyugngakten pillerkartangqellrani.”

¹⁰Wiinga kiugua, “Kia niicugniciqanga qalaruskumteng aarcirtuqumteng-llu? Atam ciutait umgumaut niitesciiganateng.

¹¹Wangni-llu kumauq eq'urtellren tungiitnun, ATANEQ, nuqingasciigaliaqa-llu.” ATANEQ-llu qanertuq wangnun, “Kuviu eq'urtelqa mikelngurnun tumyaranelngurnun, ayagyuanun-llu quyungqalrianun. Uingulriit nulirrulriit-llu ayaucimaciqut, ak'allaqapiaraungermeng-llu uitacimangaunateng.

¹²Enait tunumaciqut allanun yugnun, naucetaarviit-llu tunumaciqut, nulirrit-llu. Anucimirqecetaaqataranka nunam mat'um yui.

¹³Yuut tamarmeng, cakegtaunrilnguut pinilegpaulriit-llu tukuurtengnaqut piciunrilngurteggun; prophet-aat tuaten agayulirtet-llu piciuvkenateng caliamegteggun.

¹⁴Yum'a kilinrit tallegneruartun pitarrluki pilarait, qanraqluteng, ‘Uitanqegcinarquq,’ uitanqegcinailengraan.

¹⁵Kasnguyullruut-qaa uuminarqelriit makut atullerteng pitekluki? Qang'a, watqapik kasnguyullrunritut; kavingallallerkarteng tuaten nalluat. Taumek iquciqut allat iqullruciicetun; anucimirqecetaaqumteng tuani piunrirciqut. Wiinga, ATANEQ, qanertua.”

¹⁶Waten qanertuq ATANEQ, “Tumyarat taqruatnun nangerrluci kiarrluci. Apqaurutkiciki ak'allaat tumyarat, assilria-llu tumyaraq nanlucianek. Piyuavikiciu, uitanqegciluten yuunaurtuten.” Tau͡gaam qanertut, “Wangkuta piyuavikngaitaput.”

¹⁷Tua-llu ATANEQ cucuklillruuq nayurten̄ek niicugniarkanek cupu'uryaram elpengcautiinek. Tau͡gaam ellait qanertut, “Niicugningaitukut.”

¹⁸Taumek ATANEQ qanertuq, “Atanruvigni, niicugnici, nallunrirnaurci qaillun piqatauciit yum'a.

¹⁹Nunaa, niicugni! Ukunun yugnun anucimirqecetaarutekluku tamalkuitnun caliallritnun taiteqatartua piunrillerkamek, tua-i-wa qaneryaranka piyuumiitellruatki maligtaqullruvkenaki-llu qanellrenka.

²⁰Wangnun cauciqat aruviarkat taitelallrit Sheba-mek, wall'u neqkat avukait taitelallrit nunanek yaaqvanek? Elliitait akurturngaitanka, ilukegcitekngaunaki-llu ekualuki elliitait.”

²¹Taumek waten qanertuq ATANEQ “Elliiciqua ukut yuut ciuqerratnun paallautekaatnek. Angayuqaulriit mikelnguut-llu tuquciqut, tuaten-llu cali yugnikutellriit elaqliqellriit-llu.”

²²Waten qanertuq ATANEQ, “Yuut taiciqut nunamek neglirnermi uitalriamek; yaaqvanelnguq angayuqauvik pinilegpaulria uptuq anguyagmun.

²³Urluvteng narulkarcuuteteng-llu teguit; taukut aaryuyuitut takumcuyuyuunateng-llu. Nepiit, ayagaqameng horse-aatgun, imarpiim ellerrartellratun nepengqertuq. Upingariut anguyakatarluku Jerusalem-aaq.”

²⁴Jerusalem-aam yui qanertut, “Tamana ak'a niitellruarput, unateput aturluki casciigatukut; nanikuanaq wangkutnun tut'uq akngirnaqluni, akngirnaq-llu arnatun teggiurcilriatun.

²⁵Natmun ayakarciiganata yuilqumun, wall'u tarritesciiganata tumyarani, tua-i-wa ingluput caskungqerrata, alingnarqelriim-llu angelriim avatairumaakut.”

²⁶ATANEQ qanertuq yum'inun, “Missuullernek all'uci akaguarci qamllermi; qivruyaraq aturciu aluviliurluci piyaucirpeciutun qivrukuvci kiingan irniamek, tua-i-wa taum taigarkam piunrircarturluci piqatarraarpek'nani anguyagciqngaci.

²⁷Jeremiah, naspaagiki yuunka, cavik naspaayaucirpetun, qaillun ayuquciat nallunrirniaran.

²⁸Tamarmeng ciumualriaruut inglulicugluteng, tegtaluteng punernertun cavigtun-llu. Tamarmeng carrluulriaruut, cen̄irtaarluteng qannguanek sagciluteng.

²⁹Kaminiarpak ekurpalaryaaquq, tau͡gaam caviit urugluteng qurrluyuitut. Catngunrituq menuircarturiuralqa yumnek, tua-i-wa assiitellriit yuut au͡gaumaksaitelaata.

³⁰Carangllugkuanek cakaunrilngurnek aterpagcimaciqut, tua-i-wa Wiinga, ATANEQ, piyuumiirutellruamki.”