Read Yupik Jeremiah 7 Bible Online

Jeremiah 7 - Yupik bible

Jeremiah 7

¹ATANREM ayagcetaanga iteryaraanun Agayuvigpiim Judah-m yuin it'larviatnun agayuyarturluteng. Qanrutaanga tuavet nangerrlua qanrutkesqelluku ATANREM Artuqailnguum, Israel-aam Agayutiin, ellaitnun qanerkaa: “Umyualinqigci ayuqucirpecen̄ek caliarpecen̄ek-llu, tuatnakuvci maani uitaurceciiqamci.

⁴Ukvekenrirciki iqluurutet ukut qaneryarat, ‘Cam pingaitaakut! Una ATANREM agayuvigpakaa, una ATANREM Agayuvigpakaa, una ATANREM Agayuvigpakaa.’

⁵“Tua-i ilumuuluci umyualinqigeskuvci ayuqucirpecen̄ek caliarpecen̄ek-llu, piciulriaruluci-llu elluaryaraq atunem atuquvciu,

⁶nangciksailkuvci ilakenrilkevcen̄ek, elli'irnek wall'u aipainernek, cacetaanrilngurnek-llu tuquciksaunaci maani nunami, allanun-llu agayutnun cauksailkuvci elpecen̄ek picurlaulluci,

⁷uitavkarciqamci maani nunami, ak'a cikiuteklemnun ciuliarpecen̄un akwarpak pikesqelluku.

⁸“Atam tangerqerci, ukvek'laraci elliinginaq iqluurutet qaneryarat.

⁹Tegliurciquci-qaa, tuquciluci, akusrarutekiluci, akqiluci piciuvkenaci, aruviarluci Baal-amun, agayutnguanun-llu ciungani nallullerpecen̄un cauluci,

¹⁰tailuci-llu ciuqamnun nangerrluci uum enem iluani, aterpagcimalriim wii atemnek, qanerluci-llu, ‘Wangkuta aviucimaukut!’ tau͡gken cali aturluki makut pellernarqelriit?

¹¹Umyuartequci-qaa una Agayuvigpaka iirvigkaurcukluku teglengalrianun? Wiinga tangellruanka caliaci, qanertuq ATANEQ.

¹²Ayagci Shiloh-mun,[2] ciuqliuluku wangnun agayularvikesqumallemnun, tangerrniarci qaillun wangnun pillrucia yum'a, Israel-aam yuin, assiilnguit pitekluku.

¹³Tua-i tamalkuita makut assiilnguut atullruavciki, qanertuq ATANEQ, pulengtaq-llu taqsuarirlua qalarutengramci niitellrunrilavci, qayagaullemci-llu kiuvkenaci,

¹⁴taumek Shiloh pillrucimtun, tuaten-llu piciqaqa una Agayuvigpaka, cacetuqutek'ngarci, nuna-llu cikiutekelqa elpecen̄un ciuliarpecen̄un-llu.

¹⁵Ayagceciiqamci wiinga tangerqemnek, Israel-aam yui tungelquci ayagcetellrucimtun.”

¹⁶ATANEQ qanertuq, “Jeremiah, yuut ukut piicaucaqunaki. Qiateksaqunaki wall'u piicaulluki; takumcucarauteksaqunaki-llu wangnun, niisngailamken.

¹⁷Tangenrritan-qaa caliarat nunarpaini Judah-m tumyaraini-llu Jerusalem-aam?

¹⁸Mikelnguut avuqiirtut muragnek, atait-llu kenermek kumarciluteng, arnat-llu keliparkamek enegtaarluteng, cake-aalinaluteng agayutnguamun cikiutekameggnek arnamun apeqmeggnun Qiliim Queen-aanun; wine-amek-llu elliitmek kuvuuriluteng allanun agayutnun, akngirrnalua.

¹⁹Ilumun-qaa wanguuq akngireskengaat? qanertuq ATANEQ. Qang'a, ellmeggnek akngirtut ellmeggnun-llu kasnguyuutmek tailluteng.

²⁰Taumek waten qanertuq ATANEQ Agayun: Taumek wiinga angelriamek qenertelqa kuvumaciquq uumun Agayuvigpagmun, yugnun ungungssinun-llu, napanun tuaten atsainun-llu naucetaarviim. Eq'urtelqa ayuqeciquq kenertun nipcimangailngurtun.

²¹“Yumaa, ilait elliitet ekualaraci tamalkuuciicetun ekuavigkun, ilait-llu nerlaraci. Tau͡gaam, Wiinga ATANEQ qanertua nerngerpeciki tamalkuita ayuquq.

²²Tuani anutellemni ciuliaci Egypt-aamek, camek picirkillrunritanka ekualuki elliillerkaatnek wall'u allanek elliiyaranek.

²³Uumek tau͡gaam alerqullruanka, Niisngakuvcia pisqutkaa-llu aturluku, wiinga Agayutekciqerpecia, elpeci-llu wii yuk'eciqamci; ca-llu tamarmi elpecen̄un elluarrluni piciqut.”

²⁴Tau͡gaam niitenritut murilkevkenateng-llu. Umyuateng tau͡gaam pisqesciigalnguut assiitellriit aturluki, arcariinallruut-llu utumarivkenateng.

²⁵Ernermek ciuliarpeci Egypt-aamek anellratnek ayaglua una erneq tekilluku, taqeksaunii ayagcecilaryaaqua elpecen̄un pistemnek prophet-aanek.

²⁶Tau͡gken niicugnillrunritaatnga murilkellruvkenii-llu, tau͡gaam pengegnairutevsiartut inglulilluteng-llu arcaqanruluteng ciuliameggni.

²⁷“Taumek, Jeremiah, qanrutarkaugaten makunek tamalkuitnek, tau͡gaam niisngaitaatgen. Qayagaurciqaten tau͡gaam kiungaitaatgen.

²⁸Cali waten qanqina ellaitnun, ‘Waniwaugut ukut yuut niicunrilnguut qaneryaraanek ATANREM Agayutmeng, wall'u anucimirqecetaaruceteng eliyutkevkenaki. Piciuneq tamartuq; Qanrutkumayuirulluni-llu.’”

²⁹“Angniici qivruluci, Jerusalem-aam yuini; nuyaci kepluki egciki. Aturci tungmagcissuutnek yuarutnek qemit kangritni, tua-i-wa wii, ATANEQ, eq'urcama cakaallruluki-llu yuunka.

³⁰“Tua-i Judah-m yui assiilngurmek caliata ciuqamni, qanertuq ATANEQ; uumikek'nganka agayutnguateng elliluki Agayuvigpama iluanun menuurrluku.

³¹Hinnom-aam-llu Kuignayuani ekuavigmek piliut at'legmek Topheth-aamek, ekuaginaluteng qetunrameggnek panimeggnek-llu elliitekluki. Waten pisqelluki alerqullrunritanka, umyuaqellruvkenaku-llu.

³²Taumek erenret tekiciqut, qanertuq ATANEQ, aterpagcimangairutlerkaa Topeth-aamek, Kuignayuanek-llu Hinnom-aam, tau͡gaam aterpagciiqaat Tuqurqiyaram Kuignayuanek. Tuani yuut tungmagtelarciqait nani allami tungmaggvigkaiciiqngata.

³³Ukut-llu yuut temait neqkaksaguciiqait ellam yaqulgin, nunam-llu ungungssiin; kia-llu ayagcaurngaitai alingcetaarluki.

³⁴Niitnaunrirceciiqanka-llu Judah-m nunarpainek tumyarainek-llu Jerusalem-aam angnilriit quyaluteng-llu yuut erinait, angnirluteng-llu niitnaullrit kassuutellriit nerevkaritiitni; tua-i nuna yuiruciiqngan nunakarniirulluni.