Read Yupik Jeremiah 8 Bible Online

Jeremiah 8 - Yupik bible

Jeremiah 8

¹“Taum nalliini, qanertuq ATANEQ, enrit angayuqrin Judah-m, atanerruarin, agayulirtain, prophet-aat-llu, Jerusalem-aam-llu yuin, qunguitnek anucimaciqut;

²sagcimaluteng-llu akertem, iralum, agyat-llu aciatnun kenkellrita kevgiullrita-llu, ellacessurvik'lallrita agayuvikelallrita-llu; quyurcimangaitut-llu elausngangaunateng-llu, tau͡gaam cekavtarkauluteng anatun nunam qaingani.

³Uum-llu wani assiilngurtulriim angayuqauviim yui unguvaqallret, nunani sagtellemnun uitalriit, tuqu cucukenrurciiqaat unguvallerkameggni. Wiinga, ATANEQ Artugailnguq qanertua.”

⁴ATANREM waten qanrutesqai yun'i, “Yuut-qaa iquaqameng, ataam-qaa nangerteksaitelartut?

⁵Ciin-mi tua-i ukut yuut iqlutmun ayagyugtat kingupiaryugluteng? Assiilnguq atullerteng ciumurulluku utercuuminateng.

⁶Niicugninqegcaaralaryaaqanka, tau͡gaam piciulriamek qaneqsaitut: assiilngillermeggnek-llu umyuarniuqsaunateng, qanerluni, ‘Qaillun wiinga pisia?’ Tamarmeng piyullermegteggun ciumuartut, horse-aam cukaluni anguyagmun ciumuulauciatun.

⁷Yaqulgung'e'rmeng upallerkarteng nallunrit'laraat. Tau͡gken, elpeci yumni, nalluaci alerquutai ATANREM.

⁸Qaillun piluci qaneryugngaceci, ‘Wangkuta umyuartuukut, ATANREM-llu alerquutai avaliqaput?’ Atam tangerqerciki, piciunrilnguut igartet alerquutet igautelaqait iqluurutngurrluku.

⁹Umyuartulriit yuut kasnguyugcecimaciqut, nanikuaciqut qaillun picirkaunateng; tua-i-wa qessakngamegteggu qaneryaraa ATANREM, tua-llu-qaa cali umyuartulriaruciqut?

¹⁰Taumek nulirrit allanun piksaguceciiqanka naucetaarviit-llu cirlakestaitnun piksagutelluki, tua-i cakegtaunrillmeggnek yugnek ayagluteng piuranteng tekilluki, tamarmeng tukuurtengnaqngata piciunrilnguut aturluki; prophet-aat tuaten agayulirtet-llu piciuvkenateng caliamegteggun.

¹¹Yum'a kilinrit tallegneruartun pitarrluki pilarait, qanerluteng-llu, ‘Uitanqegcinarquq,’ uitanqegcinailengraan.

¹²Kasnguyullruut-qaa assiilnguq atullermeggni? Qang'a, kasnguyullrunritut; qaillun kavingallallerkarteng nalluat. Taumek iqumalriit ilalirluki iquciqut: anucimirqecetaaqumteng tuani piunrirciqut, qanertuq ATANEQ.

¹³“Quyurcularyaaqanka yuunka, nauceciiyurtem naucetaaminek quyurcilauciatun, qanertuq ATANEQ, tau͡gaam wine-arkatun napayaartun atsailngurcetun ayuqut, napatun-llu figs-aatun naugailngurtun; cuyai nalamaluteng. Taumek nunalgutkumanrilngurnun nuniit teguvkallrukeka.”

¹⁴Agayutem yui aptut, “Ciin uitaurluta aqumgaceta? Quyurrluci, ayagnaurtukut nunanun asvairqumalrianun tamaani tuquniartukut; tua-i-wa ATANREM Agayutemta piunrirarkaurcetaakut, cikirluta-llu tuqunarqelriamek mermek merkamten̄ek, assiilngillruamta ATANERMUN.

¹⁵Uitanqegcitmek mam'illerkamten̄ek-llu yuaryaaqellruukut, tamana catngunrituq; alingnarqelria tau͡gaam tekituq.

¹⁶Inglukestemta horse-aarita qengagmiarallrit niitnariuq Dan-am nunarpiinek. Nuna tamarmi qiivaqluni horse-aarit qalriagaqata. Taigut inglukesteput nunavut piunrirrnaluku tamalkuita-llu tamaanelnguut tapeqluki, nunarpak yui-llu tamalkuita.”

¹⁷ATANEQ qanertuq, “Ayagceciqatartua ciissirpagnek akunlevcen̄un, tuqunarqelrianek ciissirpagnek nuyurriutesciigalngurnek, tamakut-llu keggmarciqaiceci,” qanertuq ATANEQ.

¹⁸Iluteqenrirciigatua; Ircaqumkun nangtequa.

¹⁹Niicugnici! Tamiini nunami niitanka yuunka qayagalriit, “ATANEQ-qaa Zion-aami uitanrirtuq? Zion-aam-llu-qaa angayuqra tuantenrirtuq?” ATANEQ-llu, angayuqrat kiuguq, “Ciin eq'urcetatnga agayutngualiamegteggun ciktaarluteng yuut allat agayutnguaritnun.”

²⁰Yuut-llu kiugut, “Quyurciyaraq pellugtuq, kiak-llu iquklilluni, wangkuta-llu anirtuumavkenata.”

²¹Ircaquqa navguumauq yuunka navguumiita; angniitua qivrulua, nanikuanaq-llu wangnetuq.

²²Gilead-aami-qaa iinrutaituq?[3] Yungcaristetaituq-qaa tuani? Ciin-mi tua-i yuunka canrircecimanritat?