Read Yupik Jeremiah 9 Bible Online

Jeremiah 9 - Yupik bible

Jeremiah 9

¹Qamiquqa-tuq mer'uluni elakauli, iigka-llu ulvelriarurrlutek mermek, qiaguryalrianga ernerpak unugtuumaan yuunka tuqutaullret pitekluki.

²Kitak enengqerrlii mer'ilngurmi nunami, tuani qimaumayaqenka yuunka. Tua-i tamarmeng akusrarutekilriaruata, alingnarqelriaruluteng.

³Upingarrlainartut iqluluteng qanllerkameggnek; piciunrilnguum piciulria enairluku ataniumaa nuna. ATANEQ qanertuq, “Yum'a assiilnguq tungliqu'urluku aturluku, ellaita-llu nallulua wiinga, qanertuq ATANEQ.”

⁴Tamarpeci aaqiciki elaqlici, cacetuqutekevkenaki-llu anelguceci; tua-i tamarmeng tungelquci umyuarrliqelriaruata, elaqlici-llu qanerrluutekiyugluteng.

⁵Tamarmeng ukvertaqluki elaqliteng, atauciunge'rmi piciulriamek qanelriartaunani; alunguteteng elitelluki iqluyaramek assiilngurmek aturluteng umyualinqegtellerkarteng pillerkairulluku.

⁶Akngirkengengnaqu'urluteng tau͡gaam kina-llu piciulriamek qanyuunani, nallunringnaqlerkaqa-llu tengrukevkenaku, qanertuq ATANEQ.

⁷Taumek waten qanertuq ATANEQ Artuqailnguq, “Wiinga yuunka caarrluirciqanka cavigtun nutaan-llu naspaaluki. Yuunka assiilngurmek calillruut camek-mi tua-i allamek ellaitnun piyarcia?

⁸Alungutait tuqunarqelriatun pitegcaucetun ayuqut; iqluuryukapiggluteng; Qanenqegcaarautelarait elaqliteng, tau͡gaam ircaqumegteggun umyuangcalartut qaillun picurlagcetlerkaatnek.

⁹Anucimirqecetaarngaitanka-qaa makut pitekluki? qanertuq ATANEQ; akinaurngaitua-llu-qaa angayuqauviim yuinun waten ayuqelrianun? Wiinga, ATANEQ, qanertua.”

¹⁰Qanertua, “Wii qiatekciqanka nepliutekluki-llu ingrit ilutequtekluki-llu marat yuilqumi, caarrluurcata kinernerurrluteng, yuk-llu tamaaggun pekcuirulluni, kuluvagnek-llu qalrialrianek niitnairulluni; yaqulget ungungssiaraat-llu ak'a qimallruluteng cataunateng.”

¹¹ATANEQ qanertuq, “Jerusalem-aaq imumalriarurciiqaqa jackal-aanun kaviarngalngurnun uitaviksagutelluku; Judah-m-llu nunarpai nunatun mer'ilngurtun ayuqliriciqut, yungqelarngaunateng.”

¹²Angucetangqertuq-qaa umyuartum ugaani taringumastiinek mat'um? Kitumun-llu ATANREM qanrutkellruagu ilainun qanrutkesqelluku? Ciin nuna assiiruta nunakarniirulluni yuilqutun, yuk tamaaguirnanrirtelluku?

¹³ATANEQ-llu qanertuq: “Tua-i-wa alerquutenka cakaaramegteki ellaitnun cikiutekellrenka, niicugpek'naku-llu qaneryaraqa, aturpek'naku-llu,

¹⁴tau͡gaam ciumuarluteng umyuarteng aturluku agayutnguanun Baal-anun caullruut ciuliameggnek elitellermeggnek.

¹⁵Taumek ATANEQ Artuqailnguq, Israel-aam Agayutii qanertuq: Ukut yuut nerevkarciqanka qatlinarqelrianek, mertelluki-llu tuqunarqelriamek.

¹⁶Cekavciiqanka-llu nunanun ellaita ciuliarita-llu nallukaitnun; anguyagnun malirqeravkarciqanka, nangluki piunrirnatkamnun.”

¹⁷Waten qanertuq Artuqailnguq ATANEQ, “Umyuangcarci, kelegnaluki arnat tuquigaqavci aluviliutulit, cali arnat tungmagcissuutnek yuarutnek atutulit.”

¹⁸Yuut qanertut, “Qanruciki cukangnaqluteng-gguq atuullitkut tungmagcissuutmek yuarutmek, iiput aluvimten̄ek imangviitnun, qemiryaput-llu mecungluteng qiallemten̄ek.”

¹⁹Neplialriit nepiit niitnarquq Zion-aamek: “Wangkuta navguumaukut! Kasngunarqelriarurtukut! Tua-i-wa nunavut unicamteggu uitauviput navguitki.”

²⁰Wii qanertua “Niiciu elpeci arnani murilkelluku ATANREM qaneryaraa; Elicarciki panici angniicaramek yugnikek'ngaci-llu elitnaurluki tungmagcissuutmek yuarutmek.

²¹Tua-i tuqum itrakut uitavimten̄i tuqulluki irniaput tumyarani ayagyualriaput-llu tuneniarvigni uitalriit.

²²Qanra elpet, Waten qanertuq ATANEQ: Tuqumalriit temait cekavciiqut carr'ilqani ciqitartun, mukaarkatun-llu kepliarumalriatun kepliarilriim kingunrani, kia-llu avurngaunaki.”

²³Waten qanertuq ATANEQ, “Umyuartulriim yuum ucuryagutekenrilliu umyuartucini, pinilriim-llu yuum ucuryagutekenrilliu piniucini, wall'u tukuulriim ucuryagutekenrilliki tukuutni.

²⁴Tau͡gaam ucuryagutekiyulriim ucuryagutekliu una, taringumallni nallunritellni-llu ATANRUCIMNEK kenkilua caqtaarpek'nii, aturluku elluaryaraq nunami, tua-i wii ilukegcitekngamki makut, qanertuq ATANEQ.”

²⁵“Tangerrluku, erenret tekiciiqut, qanertuq ATANEQ, anucimirqecetaarillerkaqa Egypt-aam, Judah-m, Edom-aam, Ammon-aam, Moab-am yuinek, nunami-llu mer'ilngurmi uitalriit, nuyateng kep'laqait nanililuki.[4] Makut yuut tamarmeng nuugiumalriaruut, tau͡gaam nuugiumacimeng nallunairutii akqun catkenritaat. Iliita ukut yuut iliita-llu yum'a Israel-aam maligtenritaa akquyutelqa.”