Read Yupik Lamentations 1 Bible Online

Lamentations 1 - Yupik bible

Lamentations 1

¹Alianaqvagta Jerusalem-aaq, ciungani yugyalleq! Qigcikumallruyaaqluni ellarpiim yuinek, tau͡gaam watua aipainertun ayuqliriluni; Nunarpiit takarnarqenqurrallrat watua pistepayuartun ellirluni.

²Unugpak qiamalartuq; aluvii qurrlurluteng ulluviigken'gun. Yugnikesterugallri atauciunge'rmi unegtenrilami qarutestekaituq. Ililirtellrin picetaarucamegteggu waniwa-llu tamarmeng ingluksagulluku.

³Judah-m yui pistepayuaraurcameng, qessange'rmeng ayagcecimaluteng nunameggnek. Nunakenrilkem̄eggni uitaluteng, ellaita pimeggnek qanerciiganateng— Inglukestaita avatairumaluki, qaillun qimagciiganateng.

⁴Kina imna taiksaituq Agayuvigpagmun agayuyarturluni agayuyarani. Nasaurluut aturtet nangtequt, agayulirtet-llu yuuniarluteng tau͡gaam. Nunarpiim ikirtuqai yuunateng uitaut, Zion-aaq-llu cakneq nangteqluni.

⁵Inglukestain pingnaqlerteng unakaat; tegumiaqaat casciigaliluku. ATANREM nangteqevkaani assiilngui amllellriit pitekluki; lrniari ayaucimaluteng inglukestaita teguaqsagulluki.

⁶Ucurnarqellra Jerusalem-aam pellugtuq. Ciuliqagtai ayuqliriut tuntutun paluqatalriatun, Piniarulluteng qimallermeggni pissurtemeggnek.

⁷Jerusalem-aam nangteqlermini umyuani-llu assiitellrani umyuaqai assilriit cat piksunarqellriit pikellni ak'a ernerni pellullerni. Inglukestem̄inek tegumallermini, kitumek ikayurtekaitellruuq; Inglukestain-llu ucuryaggluteng picingssautekaat piunriumallra.

⁸Jerusalem-aaq cakneq iluteqnarqellriamek assiilngiami, pellernariuq; takaqestellrin caunrilleksagutaat matangqaluku tangellruamegteggu; Yuuniaraluni ulurmiaguq kasnguyuami. Jerusalem-aaq ellminek menuurtellruuq assiitqapigtellriakun assiilngurkun.

⁹Menuurcimallra nallunaicaaquq, tau͡gaam elliin catkenritaa. Piunriumallra anagutuq; kia qarucesciigataa. Inglukestai anagkengellruut, qayagaurtuq-llu ATANERMUN takumcukesqelluni.

¹⁰Inglukestain uayaaraat tamalkuita tukuutainek. Tangvallrui Agayuvigpagmun itellratni, ATANREM inerquutellranun Jews-aarunrilngurnun itresqevkenaku.

¹¹Yui yuuniaraut neqkameggnek yuallermeggni; Tukuuteteng navrut'larait neqkanun piniritkameggnun. “Tangerrnga, ATANEQ, nangteqlemni,” nunarpak qayagaurtuq.

¹²“Tangerrnga!” qayagauq tamalkuitnun kitulrianun. “Kina imna watqapik akngirniuqsaituq akngirniurutma ayuqiinek, Akngirniurun ATANREM wangnun tuc'etellra eq'uqertellermini.

¹³“Keneq pakmaken taivkaraa, keneq ekualria ilumni. Kuvyamun nagcetai it'ganka iquvkarlua nunamun. Cakaarlua-llu unitaanga taqsuunii nangteqevkarlua.

¹⁴“Assiilnguunka tamalkuita nallunairturluki quyurrluki qillertellrui; Uyaqumnun uyamiliutellrui, wiinga-llu uqamailata cirliq'ngellruunga. ATANREM inglukestemnun tunellruanga, qaillun-llu ingluliurciigatellruanka.”

¹⁵“ATANREM temciarautekellrui tamalkuita anguyagtem̄a pininqurrait; Anguyagten̄ek-llu taivkarillruuq ayagyualriit yum'a piunrirtekaitnek. Passillrui-llu yuunka wine-arkanek atsanek passiilauciicetun.

¹⁶“Makut pitekluki aluviliurtua; iigka qurrlurlutek aluvimnek; Kia qarutesciigataanga; kia pinirivkarciigataanga. Inglukestem cirlakellruanga; yuunka camek pikairulluteng.

¹⁷“Unatenka yagingayaaqanka, tau͡gaam kia ikayurngaitaanga. ATANREM ingluksagucetai Jacob-aam yui avaqliitnun; Jerusalem-aaq ellaitni pellernariluni.”

¹⁸“ATANEQ canganarqenrituq, tua-i-wa wiinga inglulitellruama qaneryarainun; Tau͡gaam niicugnicia, tamarpeci yugni, tangerrluku-llu nangteqelqa: Yuunka yun'erraat neviarcaraat-llu ayaucimiita teguarurrluteng.

¹⁹“Wiinga-llu qayagauryaaqanka ililirtek'lallrenka, tau͡gaam ikayuryuumiitaatnga; Agayulirtenka ciulirneret-llu tuquagut nunarpagni, Yuarluteng neqkameggnek unguvatkameggnek.

²⁰“Tangrru, ATANEQ, nangtequteka, yuuciqa uitacurlagluni! Ircaqumkun umyuarniurtua wiinga assiilngillruama. Tuqurqiut tumyarani; enet-llu ilukengraitki tuqualuteng.

²¹“Yuuniaralqa niisgu yugmek qarutestekaunii. Inglukestem̄a niicamegteggu picurlaumaciqa, quyaut elpenun tuaten pivkaucimnek. Piciurcessgu akqutkellren erneq; nangteqevkarluki inglukestenka nangteqlemtun.

²²“Pinarqelriarureski assiiluciat pitekluku; Anucimirqecetaarluki wiinga anucimirqecetaallrucirpetun assiilngillemni. Yuuniaraunga, nangteqlua umyuarniurlua.”