Read Yupik Lamentations 2 Bible Online

Lamentations 2 - Yupik bible

Lamentations 2

¹ATANREM qenerrluni Zion-aaq tan'gerivkaraa. Ucurnaqluni tangssunarqellra cimiraa navguumavkarluku. Eq'urtellermi-llu nalliini Agayuvigpak cakaarluku.

²Nunat Judah-mi ATANREM piunrirai takumcukevkenaki Asvairqutai navgurluki kasnguyugtelluku angayuqauvik atanirturtai-llu.

³Eq'uqertellermini piniarucetaa Israel-aaq; ikayuryuumiinaku inglukestem̄inek anguyallrani; ingluliuraakut tuarpiaq kenerpagkun ca tamalkuan piunrirluku.

⁴Pitgaryuumaakut inglukestemcetun, pinimikun inglulirluta; tuqurqelluki qunukataput kenkek'ngaput. Wangkutnun maani Jerusalem-aami elpegnaqluni eq'urtellra.

⁵ATANEQ inglukestemcetun ayuqliriuq, piunrirtellrua Israel-aaq; piunrirtellrui tamalkuita angayuqat enait, imerqelluki asvairqumalriartait; angniitellrat-llu Judah-m yuin ilalqerluku.

⁶Agayuvigpak agayuvikelallerput ciqumtaa; Erenret tanqilriit, Sabbath-aat-llu taqevkarluki. Eq'urcami cakneq ciuniuryuumiitellrui angayuqat agayulirten͞gunret-llu.

⁷ATANREM ekuavini qessayagutaa Agayuvigpak-llu cakaarluku; inglukestainun tunaa taukut-llu qacarneri navgurait. Cirlakillermeggnek quyaluteng neplirtut, agayuvikelallemta nunaniryugluta iluani.

⁸ATANREM ciumuarutaa navguumallerkaat Zion-aam qacarnerin; cuqtaarluki-llu caunriqapiggluki piunriumasqelluki.

⁹Ikirtuqam canirutai navguumaut, ikirtuqat-llu nanrumaluteng ciqumllernek. Angayuqra atanirturtai-llu ayaucimaut nunanun allanun. Alerquutet-llu elitnaurutkumayuirulluteng, prophet-aat-llu ATANREM nasvicuirulluki.

¹⁰Ciulirnerurtellriit Jerusalem-aami aqumgaut nunam qaingani nepaunateng, qamiquteng urr'amek kanevluki missuullernek aturluteng. Nasaurluut-llu Jerusalem-aami cikluteng qamiquteng nunamun agtuulluki.

¹¹Iigka assiirutuk qiamallma ugaani, yuuciqa angniitqapiggluni. Piunriumiita yuunka angniitua mernulqa tekilluku, mikelnguut, mikelnguyagaat-llu tangerrluki nalluqaqulriit tumyarani.

¹²Kaigluteng meqsugluteng, qayagaurait aanateng; kilirtuumalriatun iquagut tumyarani, tuquluteng tuaten aanameng tegumiaqnginanratni.

¹³Qaillun qanrutkeqatarcia, elpet Jerusalem-aaq, camun-llu ayuqestassiiguciiqsia? Qaillun-llu qaruteqatarcia, waten pitaluni nangteqelriartangqeksailan. Navgumallren imarpigtun iquituq, kia-kiq tua-i tum'arrniartaten.

¹⁴Prophet—aarpeci iqluularaiceci nasvicimanguarluteng; qaneryariurluteng iqluurluteng assiilnguci nallunrircecuunaki. Umyuarteqevkarluci assiilngurmek umyuarniurutkaicukluci.

¹⁵Tamaaggun kitulriit ciritekaiceci qamiquteng ungauluggluki qanraqluteng; “Waniwa-qaa una nunarpak ayuqailnguq? Nunam-qaa yuin wani-wa una ucuryagutiit?”

¹⁶Tamarmeng inglukestevci picingssautekaiceci tangcurlagaluci tuaten eq'ukluci. Ciritekluci qanertut: “Wangkuta piunrirarput! Unuamek nerinik'lallerput tangrrarput!”

¹⁷ATANREM akeqnerrluguteklallni piurainaraa: Piunriraakut takumcukevkenata ak'a picirkiurallni aturluku. Inglukestevcen̄un nunaniryuutekevkaraci, inglukesteci pininrurcecamiki elpecen̄i.

¹⁸Qayagaurciu qastuluci ATANEQ, Jerusalem-aam yuini! Aluvici qurrlurtelluki kuigtun carvuralriatun ernerpak unugtuumaan-llu. Arulaiqsaunaci aluviliurutkici elpecen̄ek.

¹⁹Unugpak pinqigtaarluci makluci qayagauraqluku ATANEQ! Apervikualuku kaigavikiciu takumcukesqelluki irniaci palualriit tumyarani.

²⁰ATANEQ tangvagkut! Ciin waten anucimirqecetaarcikut? Arnat nerait irniameng kenkek'ngameng temait! Agayulirtet prophet-aat-llu tuqurqumaut agayuviim ilukengraaku!

²¹Ayagyuat, ak'allaat ayuqluteng taklaut tuqumaluteng tumyarani, nasaurluut arnat-llu nuussirpagkun tuqurqait. Elpet-wa tuqurqellruaten takumcukevkenaki eq'uqerrluten.

²²Kelgaten nerevkarilriatun nangteqnarqelrianun alingnarqelrianun avatairtellua. ATANREM eq'uqertellran nalliini yugmek analriartaituq unguvalriartaunani; inglukestem̄a piunrirai mikelnguut irnianka kenekluki anglicallrenka.