Read Yupik Lamentations 4 Bible Online

Lamentations 4 - Yupik bible

Lamentations 4

¹Suulutaaq qevleriutuq ayuqucimitun ayuqenrirluni! Agayuvigpiim teggalqurri cekavcimaluteng tumyarani.

²Ayagyualriartaput angutet Zion-aami qununarqetayaaqut suulutaatun, tau͡gaam maa-i qikutun assigtatun pitarrluki pilarait.

³Keglunrunger'meng aamarcilartut piyagameggnek, tau͡gaam wiinga yuunka yaqulegtun ayuqut murilkevkenaki irniateng.

⁴Alungutait emuumalriit qilagaitnun neptelartut; meqsuum ugaani; mikelnguut-llu kaigalaryaaqut neqkameggnek, tau͡gaam cikirtaitelartut.

⁵Yuut neqkegtaarnek nerlallret paluagut tumyarani; anglillret-llu camek nuuqitevkenateng nerangnaq'lartut ciqitallernek.

⁶Anucimirqecetaarutiit wiinga yum'a arcaqanruan anucimirqecetaarutiini Sodom-aam, carrarmi piunriumallrem yuum unatain agtunrilengratni.

⁷Atanerruari caarrluitellruut menuillruluteng qanikcarmi, segganqeggluteng, pinirluteng, naulluutaunateng.

⁸Tau͡gaam maa-i tangllermegteggun puyuqnermi tungunrurtut, elitaqnaunateng taklaluteng tuqumaluteng tumyarani; amiit nepluteng enritnun kinengluteng ciilerrluteng muragtun.

⁹Anguyagkun tuqullret piluaqanruut piitnakun tuqullerni, taukut paluangameng neryuumiryaaqluteng naucetaarviit naugillritnek.

¹⁰Takumcutalriarung'e'rmeng arnat nakmiin irniameggnek kenirluteng nerlartut, anagucan nangteqnarqelria tut'elleq yumnun.

¹¹ATANREM eq'uqertellni tamalkirrluku, kumarciuq kenermek Zion-aami ekuavkarluku nangqapiggluku.

¹²Nunam angayuqrin, nunam-llu yuin ukveqellrunritaat allat nunat anguyagtait iternayukluki Jerusalem-aamun.

¹³Tau͡gaam tuaten ellillruuq, prophet-aat agayulirtet-llu assiilngillrat pitekluku pinarqenrilnguut yuut tuquavkarluki.

¹⁴Ciuliqagtait tarratut tumyaratgun cikmiumalriatun augmek uqlarluteng. Taumek yuut agturyuumiilkait aturaitgun.

¹⁵“Ayagci!” Yuut qayagpagaut. “Menuulriaruuci! Agturyaqunacia!” Tua-i calligtaartut atanruvignun ciuniurtaunateng.

¹⁶ATANREM elliin cekavcamiki catkenritai; caukumavkenateng agayulirten͞gunger'meng ciulirnerunge'rmeng-llu.

¹⁷Kiarcimayaaqukut ikayurtekamten̄ek elliinginaq; neryuniuryaaqluta ikayurkamten̄ek ikayuq'ngesciigalngurmek.

¹⁸Inglukestemta murilken͞gatkut tumyaramten̄i tarratesciigatukut; tuqullerkarput mallgiinararput pillerkarput tekican.

¹⁹Cukanruluteng qakurtarni qilagmek ellu'urvikluta malirqeraitkut ingrinun, yuilqumi tuaten nayurluta.

²⁰Teguat unguvaluugutvut, angayuqaq ATANREM cucukellra, cacetuquteklerput akiurucesqelluta inglukestemten̄ek.

²¹Nunaniryugluci angnirci, Edom-aam Uz-am-llu yuini; Elpeci-llu nangteqlerkarci agiirtuq; elpeci-llu taangiqluci matarqeciquci.

²²Zion-aam yui akiliumariut assiilngurmek atullratnek, ATANREM nunakenrilkemten̄i uitavkarngairutaakut. Edom-aaq ATANREM anucimirqecetaarciqaaten, assiilnguten nallunrirtelluki.