Read Yupik Lamentations 5 Bible Online

Lamentations 5 - Yupik bible

Lamentations 5

¹Umyuaqiki, ATANEQ wangkutnun tut'ellret, tangrru kasnguyugcecimallerput.

²Akluput allanret piksagutait; tangnerranarqelriit enemten̄i uitaluteng.

³Inglukestemta aataput tuqurqait, aanaput uilgaurtelluki.

⁴Meq mell'erput akililangarput, muragkaput-llu kipucaurrluki.

⁵Qimugtetun cakviurcet'laraitkut mernurtelluta, mernuinercirciiganata-llu.

⁶Unguvangnaqluta neqkangengnaqukut kaigaluta Egypt-aamek Assyria-mek-llu.

⁷Wangkuta ciuliaput assiilngillruut, tau͡gaam maa-i catairulluteng, wangkuta tau͡gken maa-i nangtequtekaput tamakut assiilnguut atulallrit.

⁸Pistepayugni cangallrunrilnguut ataniumaitkut, yugmek-llu aviucestekaunata ellaitnek.

⁹Tuqutarayulit tarratelartut tamaani nunami; taumek wangkuta nerangnaq'lalriakut unguvavut qevvluku.

¹⁰Kaigem puqelvagcetaakut kiituani amirput kaminiam kelipissuutiitun uuqnarqetariuq.

¹¹Nuliaput akusrarutekait Zion-aami, neviarcaraat-llu cali Judah-m nunaini.

¹²Ciuliqagteput qemitelarait agarrluki, angukaraat-llu qigcikumavkenateng.

¹³Ayagyuartaput qessangraata calivkarait itumcivkarluki mukaarkanek pistetun; tan'gaurluut cirliqluteng atmagturluteng muragnek.

¹⁴Angukaraat-llu aqumgananrirluteng nunarpiit iteryaraitni, ayagyuat-llu aturcetaarnanrirluteng.

¹⁵Angnirciigaliukut; yurarciigaliluta aluviliurluta tau͡gaam.

¹⁶Ucuryagutek'lalput nang'ut. Wangkuta assiilngiamta aarnarqellriamek ciunerkangqertukut.

¹⁷Umyuamteggun nangtequkut kiarcesciiganata aluvilium ugaani.

¹⁸Zion-aaq alianaqngan yuunani, ungungssiaraat tau͡gaam tarralluteng imenrini.

¹⁹Tau͡gaam elpet, ATANEQ, angayuqruciquten akwarpak atanirturiarkauluten iquklitlerkamun.

²⁰Ciin ak'anun nalluyagusngasikut, cakaarumamaluta-llu?

²¹Uterceskut ataam elpenun, ATANEQ! Ucurnarquciqellerput ataam piksagutelluku.

²²Wall'u-qaa iquilngurmek cakaaqatararpekut? Caknerpak-qaa qenrucimaqatararpekut?