Read Yupik Ezekiel 1 Bible Online

Ezekiel 1 - Yupik bible

Ezekiel 1

¹Allrakumi yuinaq qulnek cipluku (30) iralut cetamiitni, tallimanek ernengqerluku, wii, Ezekiel-aaq agayulirta, Buzi-m qetunraa, uitallruunga ilagarluki Jews-aat, nunameggnek ayagcecimallret, Kuigem Chebar-am caniani Babylonia-mi. Qilak ikirtuq, tangrruartua-llu Agayutmek.

²Iralum erenrin tallimiitni (tauna allrakut tallimakellruat Angayuqaq Jehoiachin-aaq nunaminek ayagcecimarraanranek.)

³ATANREM qanrutaa Ezekiel-aaq agayulirta, Buzi-m qetunraa, tuani Babylonia-mi Kuigem Chebar-am caniani, niitaqa ATANEQ qanellrani wangnun, pinia-llu elpekluku.

⁴Ciugtua tangerrluku-llu ellarayak anuqa tailria negeqvamek. Kalluum kenra tanqigpallaraluni amirlurpall'e'rmek, qilak-llu avatii tanqigcen̄ani. Kalluum tanqigpallarallran nalliini pitangqertuq camek tanqigcetellriamek punernertun ayuqluni.

⁵Ellarayiim-llu qukaani tangertua cetamanek unguvalriatun ayuqellrianek. Waten tangellrat ayuqluni: yugtun elucingqerrluteng,

⁶tau͡gaam tamarmeng cetamanek kegginarluteng, tamarmeng-llu cetamanek yaqurluteng.

⁷Irungqertut nakercetellrianek, it'gaita-llu aluit ayuqut kuluvayagaam it'gaatun; qevleqtaarluteng qevlercaumalriatun punernertun.

⁸Yaqumeng aciatgun yinrarnek unaterluteng. Taukut cetaman kegginait cetaman-llu yaqruit waten ayuqluteng:

⁹yaqruit agtuusngalluteng; pektaqameng tamarmeng ataucikun pektaqluteng temteng tuigcuunaki.

¹⁰Kegginait-llu ayuqluteng: tamarmeng ciuqamegteggun kegginarluteng yinrarmek, qamiqumeng-llu tallirpilirnerakun kegginarluteng yugtutulinrarmek, iqsulirnerteggun-llu kegginarluteng kuluviim angucalum kegginaanek, tunumegteggun-llu kegginarluteng yaqulegpinrarmek.

¹¹Kegginait tuaten ayuqut. Yaqruit nengingaut qulaitgun, tamarmeng yaqurluteng malrugnek, allam yaquk agtuumalukek, malruk yaqugkenka temseng patumaluki.

¹²Tamarmeng cetamatmun caumallerteng caumaluteng, tua-i quyurmeng piyullermeggnun ayagyugngaluteng, tuigtevkenateng.

¹³Qukaatni taukut unguvalriit ekualriatun kenurratun ayuqellriamek pitangqertuq, uitaksaunani kesianek angitaarturalriamek taukut unguvalriit akuliitgun. Keneq ek'ullalartuq kalluum kenrinek pircirluni.

¹⁴Taukut-llu unguvalriit cukaluteng utqetaarluteng kalluum kenerpallartellratun cukataluteng.

¹⁵Tangvainanemni taukut cetaman unguvalriit tangertua cetamanek akalrianek nunamun tut'ellrianek, tamarmeng unguvalriit caniitnun.

¹⁶Tamarmeng cetaman akalriit ayuqurluteng; tangellrat taqumallrat-llu waten ayuqut: teggalquqegtaartun qevlercetellriatun; tamarmeng cetaman akalriit ayuqurluteng, piliaqumaluteng akalriak malruulutek atateklutek canirusngalutek.

¹⁷Ayagaqameng ayalartut tuigcuunateng iliitnun cetaman caumallermeng tungiitnun.

¹⁸Taukut cetaman akalriat menglerluteng tegguterluteng-llu; menglait kassutmun iinek patumaluteng.

¹⁹Unguvalriit-llu ayagaqata, akalriat maligtelarait caniatgun; nunamek-llu qerratartaqata taukut-llu akalriat qerratartaqluteng.

²⁰Taukut unguvalriit ayagalartut piyugtacimegcetun, akalriat maligtaquuralarait elucirtuumiiceteng taukut unguvalriit.

²¹Tua-i unguvalriit ayagaqata, taukut-llu akalriat ayalartut; nangertaqata nangertaqluteng; qerratartaqata nunamek akalriat maliggluki qerratartelartut; tua-i-wa unguvalriit anernerat uitiimi akalriani.

²²Taukut-llu unguvalriit qamiqurrita qulait pitangqertut qilakutarngalngurmek piliaqumalriamek qitngirnarqelriamek cikunguamek.

²³Taum-llu qilakutarngalnguum aciani nangengqaut yaquit nengingaluteng, ilameng tungiitnun; allagnek-llu yaqumeggnek temseng patumaluku.

²⁴Tengellratni niitaqa yaqruita nepiit; nepengqertut imarpiim qairin ellerrartellratun, anguyagterugaat nepiicetun, Artuqailnguum Agayutem eriniitun. Mic'ameng yaquteng atrartait,

²⁵tau͡gaam cali nepmek pitangqertuq quliitni qilakutarngalnguum uitalriim quliinek.

²⁶Tamatum-llu qilakutarngalnguum quliini atanruviim aqumlleratun ayuqellriamek pitangqertuq, tangellra teggalquqegtaartun sapphire-aatun ayuqluni; aqumgalriartarluni-llu atanruviim aqumllerani tangellra yugtun ayuqluni.

²⁷Quliigni uategken tangertua qevlercelngalngurmek punernertun, tuar-tang kenrungalnguum caqumaluku, aciagni-llu uategken cali kenrungalngurtun ayuqluni tanqigcen̄ani tamarmi avatiini.

²⁸Tamalkuitnek qaralirluni ellallirqan agluryam qaraliqtukainek. Una qitngirnarqeqapiaralria tanqiuguq nasvagtii ATANREM uitacian. Man'a tangrramku putua nunamun. Tua-llu erinamek niitua.