Read Yupik Ezekiel 10 Bible Online

Ezekiel 10 - Yupik bible

Ezekiel 10

¹Kiartellemni-llu tangertua qilakutarngalngurmek quliitni cetaman unguvalriit[6] quliitni-wa atanruvigtun aqumllertun ayuqellria sapphire-aaruluni teggalquqegtaaraunganani.

²Agayutem-llu qanrutaa angun 'lumarraqegtaarnek aturalek, “Akalriat akunliitgun piluten acianelnguut unguvalriit unateten imirluki kumalrianek kangiplugnek teguten. Tua-llu saggluki tamalkuan nunarpiim quliinun.” Wiinga-llu tangvagaqa ATANREM pisqellratun pillrani.

³Tauna itellrani unguvalriit nangerngallruut ungalalirnerani Agayuvigpiim, amirlum-llu imirluku iluqliat carr'ilnguq.

⁴Qitngirnarqelria-llu ATANREM ucurnarqucia mayurtuq taukunek unguvalrianek, arulairluni-llu Agayuvigpiim iteryaraanun. Amirlum-llu imiraa Agayuvigpak, elaqlia-llu tanqigpagluni ATANREM ucurnaanek.

⁵Taukut-llu unguvalriit yaqruita nepait niitnaqluni elaqlirmek carr'ilngurmek. Nepiitun Agayutem Artuqailnguum eriniitun ayuqluni.

⁶Imna-llu 'lumarraqegtaarmek aturalek ATANREM alerqullrani kenermek tegutesqelluku akalriat akuliitnek acianelnguut unguvalriit, tauna angun iterluni nangertellruuq taukut akalriat iliita canianun.

⁷Unguvalriit-llu iliit yaggluku unatni kenermun akunlemeggni uitalriamun, tegutuq kumalrianek kangiplugnek elliluki-llu unatainun taum 'lumarraqegtaarmek aturalgem. Taum-llu teguluki kumalriit kangipluut an'uq.

⁸Cali murilkanka taukut unguvalriit yinraungalngurnek unatengqellinilriit yaqumeng aciitgun.

⁹Cali-llu tangrranka cetamanek akalriartangqellinilria, tamarmeng ayuqluteng, caniitni taukut unguvalriit. Taukut-llu akalriat teggalquqegtaartun chrysolite-atun ciqinqerluteng.

¹⁰Tangellrat taukut akalriat ayuqu'rtut, akalriak malruulutek atateklutek canirusngalutek.

¹¹Taukut unguvalriit ayagaqameng ataucikun ayagyullermeggnun ayalartut tuigtevkenateng.

¹²Taukut temait, tunuit, unatait, yaqruit, akalriat-llu patumaluteng iinek.

¹³Niitua-llu erinamek aterpagtelluki taukut akalriat waten, “Uivaalriit akalriat.”

¹⁴Tamarmeng unguvalriit cetamanek kegginarluteng. Ciuqliq kegginaq angucalum kuluviim kegginaqluku, aipaa-llu yinrauluni, pingayuak-llu yugtutulim kegginaqluku, cetamiit-llu yaqulegpiim kegginaqluku.

¹⁵Taukuuluteng unguvalriit tangellrenka Kuigem Chebar-am caniani. Unguvalriit qerratartaqata

¹⁶pektaqata-llu unguvalriit ayagaqata, taukut akalriat maligtelarait. Yaquteng-llu nenglluki tengqata'arqata, taukut cali akalriat maligtelarait.

¹⁷Unguvalriit arulairaqata akalriat-llu arulailartut; teng'aqata-llu, akalriat maligtaqluki, tua-i-wa unguvalriit ataniumiimegteggu akalriat caurallrat.

¹⁸Qitngirnarqellriim-llu ATANREM ucurnarqucian unitaa Agayuvigpiim iteryaraa nugtarrluni unguvalriit quliitnun.

¹⁹Tangvainanemni unguvalriit yaquteng nenglluki teng'ut qulmun nunamek, taukut-llu akalriat maliggluki. Agayuvigpagmun-llu iteryaramun calaralirnermi arulaiqerluteng, imna-llu qitngirnarqelria tanqik quliitni uitaurluni.

²⁰Taukut unguvalriit elitaqanka, imkuuluteng tangellrenka aciani Agayutiin Israel-aam Kuigmi Chebar-ami.

²¹Tamarmeng cetamanek kegginangqertut, cetamanek-llu yaqurluteng, yinrarnek-llu unaterluteng yaqumeng aciitgun.

²²Kegginait-llu ayuqluteng tangllemtun Kuigem Chebar-am caniani. Tamarmeng-llu ciutmun ayagaqluteng caqirteksaunateng.