Read Yupik Ezekiel 11 Bible Online

Ezekiel 11 - Yupik bible

Ezekiel 11

¹Agayutem Anerneran naluglua ayautaanga calaralirnermun iteryaraanun Agayuvigpiim. Tuani caniani iteryaram tangertua angutnek yuinaq tallimanek cipluku (25), ilaluteng malrugnek ciuliqagtegnek, Jaazabiah-mek Azzur-aam qetunraanek, Pelatiah-mek-llu Benaiah-m qetunraanek.

²Agayutem qanrutaanga, “Tuquarkaulriami yugmi, ukuk angutek picirkiulartuk ayuqucirturiaqlutek-llu assinrilngurmek wani nunarpagmi.

³Qanlartuk, ‘Ataam enenek pililangniarartukut. Una nunarpak egalvagtun ayuquq, wangkuta-llu kemegtun ugkiusngalriatun ayuqluta, tau͡gaam egatem tungliliumalaraa keneq.’

⁴Taumek, tuquarkaulriami yugmi, pinarqutmek piki.”

⁵ATANREM Anerneran tutaanga, ATANREM-llu qanrutaanga mat'umek yuut qanrutesqelluki: “Israel-aam yuini, nallunritaqa camek qalarucirci, camek-llu picirkiurucirci.

⁶Tuqurqelci yuut amllerrata wani nunarpagmi amlleriameng tumyarat imangqertut tuqumalriit temaitnek.

⁷“Taumek, wii, ATANEQ Agayun waten qanertua elpecen̄un. Tua-i ilumun una nunarpak egalvauguq, tuqutellerpeci-llu temait kemguluteng! Qessange'rpeci anciiqamci Jerusalem-aamek!

⁸Nuussirpiit-qaa alikaci? Anguyaitnek taivkariciqua nuussirpalegnek anguyaasqelluci.

⁹Nunarpagmek waken anulluci tunciqamci ilakumanrilngurnun allanernun. Nunulillruamci tuqumek,

¹⁰nakmiin nunavcen̄i anguyagkun tuqucimaciquci. Nutaan yuut tamarmeng nallunriciiqaat wiinga ATANRUCIQA.

¹¹Nunarpiim uum capkuciumangaitaaci egatem kemget imani capkuciumalauciatun. Anucimirqecetaarciqamci nani uitang'e'rpeci Israel-aam nuniini.

¹²Elpeci nallunrirciqerci wiinga ATANRUCIQA, cali nallunrirciqerci nunat allat alerquutait maligtellerpecen̄i navgullruaci wiinga alerquutenka niisngavkenaki-llu wiinga picirkiutenka.”

¹³Qanrinanemni-llu Pelatiah tuquqertuq. Wiinga-llu ciklua nunamun qayagpaglua, “Qang'a, ATANEQ Agayun! Tuqurqeqataraten-qaa nangluki unegtaulriit Israel-aam yui?”

¹⁴ATANREM qanrutaanga:

¹⁵“Tuquarkaulriami yugmi, yuut Jerusalem-aami uitalriit qalarutkaatgen nunalguteten-llu nunameggnek ayagcecimallret. Qanerluteng, ‘Nunameggnek ayaucimallret yaaqsissiyaagameng agayusciigatut ATANERMUN. Man'a nuna wangkutnun cikiutekellrua pikesqelluku.’

¹⁶“Taumek waten qanqina, ‘Waten Agayun ATANEQ qanertuq: Ayagcetellrungramki allanun nunanun, cekavtelluki ayuqenrilngurnun nunanun, tamaani nunani uitallratni wiinga nayurciqanka.’

¹⁷“Taumek cali waten qanqina, ‘Waten ATANEQ Agayun qanertuq: Ataam quyurciiqamci nunanek cekavcimallerpecen̄ek, Israel-aam-llu nunautii ataam elpecen̄un piksagutelluku.’

¹⁸Tekiskuneng tamaavet nunamun ciqitniarait uuminarqellriit agayutnguat tamaanelnguut.

¹⁹Wiinga-llu ircaqruit nutaraurceciiqanka, umyuangevkarluki-llu cali nutaramek. Asvaunateng niicuipakallrat au͡g'arluku niisngalriarurceciiqanka.

²⁰Nutaan alerquutenka atulangciqait picirkiutenka-llu niisngariluki. Wiinga-llu yuksagutarkauluki, ellaita-llu Agayuteksagullua.

²¹Tau͡gaam imkut taqsugpek'nateng pellernarqellrianun agayutnguanun agayutulit anucimirqecetaararkauganka ellaita caliaratgun.” ATANEQ Agayun waten qanertuq.

²²Imkut unguvalriit tengaurata akalriat maligtait. Qitngirnarqelria-llu ucurnarqucia Israel-aam Agayutiin quliitni uitaurluni.

²³Tauna-llu qitngirnarqellria nunamek ayiimi arulairluni ingrimun calaralirnermi uitalriamun.

²⁴Tangrruamni-llu Anerneran Agayutem naluglua ut'rutaanga nunameggnek ayagcetanun Babylonia-mi. Tangrrualqa-llu catairulluni.

²⁵Taukut-llu nunameggnek ayagcecimallret qanemcitanka makunek ATANREM nasvallrinek wangnun.