Read Yupik Ezekiel 12 Bible Online

Ezekiel 12 - Yupik bible

Ezekiel 12

¹ATANREM qanrutaanga waten,

²“Tuquarkaulriami yugmi, ingluliculriit yuut akunliitni uitauten, iingqeng'e'rmeng tangerciigalnguut, ciutengqeng'e'rmeng-llu niitesciiganateng, arenqialameng inglulicukapiggluteng.

³“Kitaki, tuquarkaulriami yugmi, missuugmek upeskina qimagaulriim uptetukiinek, ayagluten-llu unugpailgan. Tamakunun yugnun tangertelluten ayagniartuten allamun nunamun. Aipaagni taukut taringyuartut inglulitaaryulriit.

⁴Erenruluku upeskiu missuugen ayagcetaulriim pilauciatun, yugnun tangvagtelluten. Taum atakuani cali tangvagtelluten ayagcecimalriatun ayagniartuten.

⁵Tangvallratni enevet qacarnerakun ukiyulluten atmagkiuran tuaggun anetniaran.

⁶Nutaan-llu tangvagtelluten missuugen atmagluku, iigken paturraarlukek, natmun ayaucin tangerciigaliluku, tan'germun aneniartuten. Tamana tuaten pillren aarcirtuutnguuq Israel-aam yuinun.”

⁷Alerquumacimtun-llu tuaten pillruunga. Uptua missuugmek atmagarkamnek ayagcetaulriit pilauciicetun, atakuluni-llu tan'geraarallrani elagluku unatemkun ukiqaarluku enem qacarnera anua. Tangvagtellua-llu atmiurraarlua ayaglua.

⁸Unuaqunqigcan ATANREM qanrutaanga,

⁹“Tuquarkaulriami yugmi, tamakut Israel-aam yuin apqaungareskatgen qaillun picirpenek,

¹⁰qanruski camek wangnun ATANERMUN Agayutmun tamaaggun qalaruyuciat: Man'a qaneryaraq tusngauq atanerruamun Jerusalem-aam atanirturtiinun, yugnun-llu tamalkuitnun tuani uitalrianun.

¹¹Qanruski tuaten pillruniluten nallunailkutauvkarluku ellaita qimagaullerkaatnun teguarurtellerkaatnun-llu.

¹²Atanerruam atanirturtiita atmagkiurani atmagluki unugmi qimagciquq qacarnerkun ellaita ukitellratgun. Iigni-llu caplukek patuciqak tangerciiganaku natmun ayaucini.

¹³Tau͡gaam wiinga kuvya nenglluku tuavet napceciiqaqa; ayaulluku-llu Babylonia-mun. Tauna-llu nunarpak tangerpailegmiu tuquciquq.

¹⁴Cekavceciiqanka-llu piciatun pistekellri atanirturillermini, ayuqucirtuastai, anguyagtai-llu, yuut-llu yuarciqait tuqutnaluki.

¹⁵“Cekavcimarikumteng-llu nunanun allanun nallunrirciqaat wiinga ATANRUCIQA.

¹⁶Amllenrilngurnun tau͡gaam pellugceciiqaqa unguvaluki anguyak, piitnaq, cangerliit-llu. Nunat tamakut yuita akunliitni uitallratni elpekesqelluki pellernarqellriit atulallrit nallunrirluku-llu wiinga ATANRUCIQA.”

¹⁷ATANREM cali waten qanrutaanga,

¹⁸“Tuquarkaulriami yugmi, qiivekina nerkuvet, uuleggluten-llu alingluten meq'uvet.

¹⁹Qanrutniaten atanruviim yui tamalkuita man'a qanruyutnguniluku ATANERMEK Agayutmek Jerusalem-aam yuinun unguvaluteng nunameggni uitalrianun: qiivluteng nerlarciqut, uuleggluteng-llu alingluteng mer'aqluteng. Nuniit-llu uayaumaciquq cairulluni, tua-i-wa tuani uitalriit alerquun atunrilatgu.

²⁰Nunarpiit wanirpak yugyalriit piunriumaciqut, nuna-llu yuilqururrluni. Nutaan-llu nallunrirciqerci wiinga ATANRUCIQA.”

²¹ATANREM waten qanrutaanga,

²²“Tuquarkaulriami yugmi, ciin Israel-aam yuin una ayuqestassiigun qanrutkenqigtaalartatgu: ‘Sass'at pellugturalartut, cali-llu cat-llu tuaten piciqningraiceteng piyuitelartat?’”

²³Waten qanruski, Waten qanertuq ATANEQ Agayun, ayuqestassiigun una taqevkarciqaqa Israel-aam yuin qanrutkenqigtenritniaraat. Waten tau͡gaam qanruski: Pillerkaq tekituq, cat-llu piciqniluki qanrutkelallrit piarkaurrluteng!

²⁴“Israel-aam yui piciunrilngurnek tangrruanqiggngaitut, iqluurluteng-llu ciunerkamek qalartellrianek.

²⁵Wiinga, ATANEQ, qanrut'larciqanka, qanellrenka-llu piciurtelararkauluteng. Yaaqvaqaniumangairulluni-llu pillerkaat. Unguvainanerpecen̄i, inglulitaaryugpakalriani, aarcirtuutekellrenka elpecen̄un piciurceciiqanka. Waten qanertuq ATANEQ Agayun.”

²⁶Cali ATANREM qanrutaanga,

²⁷“Tuquarkaulriami yugmi, Israel-aam yui umyuartequt tangrrualten qalarutkelten-llu tekicugnaicukluki.

²⁸Taumek waten qanruski, Waten qanertuq ATANEQ Agayun: Qanrutkellrenka tamarmeng pinaciarngairutut, qanrutkellrenka tamarmeng piciurtarkaurtut. Wiinga ATANEQ Agayun qanertua.”