Read Yupik Ezekiel 13 Bible Online

Ezekiel 13 - Yupik bible

Ezekiel 13

¹Waten qanertuq ATANEQ Agayun,

²“Tuquarkaulriami yugmi, caunrilkuurki Israel-aam yuin prophet-aari ellaita umyuangutmeggnek qalartellriit. Qanrulluki-llu, niicugnilitgu-gguq ATANREM qaneryaraa.”

³Waten qanertuq ATANEQ Agayun: “Prophet-aat ukut usviilameng aarnarqellriamek ciunerkangqertut! Umyuangutmeggnek qalartelartut, tangrruaraqluteng-llu ellaita piyullermeggnek.

⁴Israel-aam yuini, prophet-aangqertuci catngunrilngurnek cangallruvkenateng kaviarni tarratellriani nunarpiit imenritni.

⁵Nayuryunritait nunarpiim qacarneri imumalriit, napartenqigcugpek'naki-llu qacarneret asvaicalriit anguyakata ATANREM erenrani.

⁶Tangrrualartut piciunrilngurnek, iqluaqluteng-llu ciunerkamek qalartaqameng. Qanlaryaaqut wiinga ellmegteggun qalartelarnilua neryuniularyaaqluteng-llu wangnun qanllerteng piciurcetnayukluku, tau͡gken wiinga ayagcetellruvkenaki.

⁷Qanrut'laranka: Piciunrilngurnek tangrrualartuci, iqluurluci-llu ciunerkamek qalartelartuci. Qanlaryaaquci-llu wiinga qanllemnek qanlarniluci, amta-llu wiinga qaneqsaunii.”

⁸Taumek waten qanertuq ATANEQ Agayun, “Iqluurluci qalartelaavci, piciuksaunateng-llu tangrrualci, tamakut pitekluki wiinga ingluliramci.

⁹Anucimirqecetaararkaurtanka piciunrilngurnek tangrrualallret iqluurluteng-llu ciunerkamek qalartelallret. Ilalilarngaitaci yuunka quyurtaqata arenqiirturluteng; ateci-llu igausngangaunateng ilaulluki Israel-aam yuin atritnun. Nunavcen̄un uterrngaunaci. Nutaan nallunrirciqerci wiinga ATANRUCIQA Agayutngulua.

¹⁰“Tua-i-wa ukvercecatki yuunka iqluluki iqlutmurtelluki qanerluteng, ‘Uitanqegciluta yuuciqukut,’ uitanqegcinarqellriartailengraan. Yuunka qacarneliluteng teggalqunek nepyucirpek'naki, prophet-aat-llu taingameng tamana qacarneq qatellriamek mingugluku.

¹¹Prophet-aat qanruski qacarnerat im'arkauniluku. Ellarvauceciiqaqa, kavciutelluku-llu, anuq'vautelluku-llu cali.

¹²Qacarneq-llu imkan yuut apciiqaiceci catngullrucianek qatellria mingullerci.”

¹³Taumek ATANEQ Agayun waten qanertuq, “Eq'uqerrlua anuq'vagceciiqaqa, ellarvagtelluku-llu, kavcirtelluku-llu qacarneq piunrirtelluku.

¹⁴Navgurciqaqa-llu qacarneq qatellriamek mingullerci tusnganri alairnatkaatnun. Qacarnerem imkuni tamarpeci tuquciiqaaci; elpeci-llu nallunrirciqerci wiinga ATANRUCIQA.

¹⁵“Qacarnerem imkut-llu qatellriamek mingugtellrin naspetarkaugaat eq'uqertellma tuknitacia. Nutaan-llu qanruciiqamci qacarneq catairutniluku imkut-llu qatellriamek mingugtellri,

¹⁶prophet-aat qanrutestellri Jerusalem-aam uitanqegciluki yuugarkauniluki uitanqegcinarqelriartailengraan.” Waten qanertuq ATANEQ Agayun.

¹⁷ATANEQ qanertuq, “Kitaki elpet, tuquarkaulriami yugmi, tangerki arnat yugpet akunliitni qalarucilriit tekitarkanek. Qalaruski caliarat inglulirluku

¹⁸qanrulluki, Waten ATANEQ Agayun qanertuq: “Elpeci arnani aarnarqelriamek ciunerkangqertuci! Mingqelartuci yuut iinrukaitnek talliranek, pelatuugnek-llu yuut aturarkaitnek, yugnun tamakunun niisngarisqelluci. Piksugyaaqaat piniq unguvamek cikiqengyugngalria tuqumek-llu yuunka tamaaggun tegumiaqnaluki ellaita-llu aturnaluku pikameggnek tegutaarutekluku.

¹⁹Caunrilkelararpecia yum'a ciuqerratni unangengnaqluci mukaarkarrarmek kelipaquinermek-llu. Yuut pinarqutailnguut tuqutelaraci, tuqutnarqellriit tau͡gken unguvavkaraqluki. Tuaten iqluularaci yuunka, ellaita-llu ukveq'laraaci.”

²⁰Taumek ATANEQ Agayun waten qanertuq: Eq'ukanka iinrukiuraci tallirat. Aturluki tamakut yuum qaillun pimallerkaa nallunringnaq'laavciu. Tallirpecen̄ek tamakut qecugciqanka tamakutgun teguaqsagutelci teguaqenrirtelluki.

²¹Pelatuuci-llu cali qecugciqanka yuunka tamakutgun ukverrluki tegumiaqelci angilluki tuaten elpecen̄un pimavkanqiggngaunaki. Nallunrirniarci wiinga ATANRUCIQA.

²²“Iqluqullerpeciuggun tengruirucetelaraci ellualriit yuut, wiinga akngircuumiilkenganka. Assiitellriit-llu yuut umyualinqigcesciigatevkalaraci assiilngurmek atullratnek, ellmeggnek anirturyalriit tuqullerkameggnek.

²³Tau͡gaam maa-i iqluurluci tangrrualalci piciunrilngurnek-llu ciunerkamek qanlallerci iquklituq. Aviuciiqanka yuunka elpecen̄ek. Nallunriisqelluku elpecen̄un wiinga ATANRUCIQA.”