Read Yupik Ezekiel 14 Bible Online

Ezekiel 14 - Yupik bible

Ezekiel 14

¹Israel-aam yuin ilaita ciuliqagtet ullagaatnga nallunriryugluteng ATANREM pisqutiinek.

²ATANREM qanrutaanga,

³“Tuquarkaulriami yugmi, ukut yuut cumigucilriaruut agayutnguanek assiilnguq-llu tamakutgun aturluku. Umyuartequt-qaa wangnun kiunayukluteng?

⁴“Taumek waten qanruski, Waten qanertuq ATANEQ Agayun: Kina imna Israel-aam yuin iliit cumigucilria agayutnguanek assiilngiutekluki, tauna ullauskan prophet-aamun ellatessurvikluku, kiuciqaqa wiinga agayutnguarugain pikiuraatnek.

⁵Tamakut-wa agayutnguat alarcecatki Israel-aam yui avtelluki wangnek. Wiinga-llu umyuarteqsaaqngama kiutemkun ataam utercetnayukluki wangnun.

⁶“Taumek waten qanruski Israel-aam yui: Waten qanertuq ATANEQ Agayun, umyualinqigci agayutnguanun caumallerpecen̄ek; caumanrirciki-llu pellernarqelrialiaci.

⁷“Tua-i-wa Israel-aam yuini ilasi wall'u allanrulria nunavcen̄i avveskan wangnek agayutnguanun, tua-i-llu prophet-aamun ellatessuqan, wiinga ATANEQ kiugarkaugaqa!

⁸Inglulirarkauluku-llu, cuqyutngurrluku-llu ilainun. Yumnun ilausngallranek au͡g'arciqaqa, tamarpecen̄un nallunriisqelluku wiinga ATANRUCIQA.

⁹“Yuum-llu prophet-aaq iqluuqaku piciunrilngurmek kiuvkarluku, tuaten piciquq wiinga, ATANEQ pivkaamni. Wiinga-llu au͡g'arciqaqa Israel-aam yuinek.

¹⁰Prophet-aaq ellatessurvikestii-llu ayuqellriamek anucimirqecetaarumaciquk.

¹¹Waten piciqua Israel-aam yui avtesqevkenaki wangnek, caarrluurtesqevkenaki-llu assiilngillratgun. Wiinga yuk'arkaungamki, ellaita-llu wiinga Agayuteklua.” Waten qanertuq ATANEQ Agayun.

¹²ATANREM-llu qanrutaanga,

¹³“Tuquarkaulriami yugmi, nuna assiilngiqan piciuvkenani-llu wangnun, yagglua piunrirciqanka neqkangutek'lallrit. Ayagceciciqua piitnamek tuqurqeciqanka-llu ayuqluki yuut ungungssiaraat-llu.

¹⁴Ukut-llu pingayun angutet, Noah, Daniel-aaq[7] Job-aq-llu tuani yuullrung'e'rmeng elluaruciata anirturyarai kiingita ellaita nakmiin unguvait.” Qanertuq ATANEQ Agayun.

¹⁵“Ungungssiarnek-llu ayagcecikuma yuut tuqurqestekaitnek, nunakun tamaaggun tarratellerkaq alingnarivkarluku,

¹⁶taukut angutet pingayun tuani uitang'e'rmeng, wiinga, ATANEQ Agayun, unguvalua Agayutngucimtun, irniaqeng'e'rmegteki anirturciigacarait. Ellaita tau͡gaam kiingita unguvateng anirturyugngayarait, nuna-llu tamana yuilqurrurrluni.

¹⁷“Wall'u anguyagmek taivkarikuma tamaavet nunamun; tuqurqevkarluki yuut ungungssiaraat-llu ayuqluki,

¹⁸taukut angutet pingayun tuani uitang'e'rmeng, wiinga ATANEQ Agayun, unguvalua Agayutngucimtun, irniaqeng'e'rmegteki anirturciigacarait, ellaita tau͡gaam unguvaseng.

¹⁹“Cangerlak-llu tut'eskumku tamatumun nunamun, eq'uqerrlua-llu tuqurqilua amllernek yugnek ungungssiarnek-llu,

²⁰ukut-llu Noah, Daniel, Job-aq-llu tuani uitang'e'rmeng, wiinga, ATANEQ Agayun, unguvalua Agayutngucimtun irniaqeng'e'rmegteki anirturciigacarait. Ellaita tau͡gaam elluaruciata anirturyarait.”

²¹Waten qanertuq ATANEQ Agayun: Jerusalem-aamun tuc'etarkauganka cetaman arcaqanrulriit anucimirqecetaarutkanka; anguyak, piitnaq, yuilqum ungungssii, cangerliit-llu, piunrirnaluki yuut ungungssiaraat-llu ayuqluki.

²²Ilaita-llu tamakut pellukatki irniateng-llu anirturluki, murilkekici ullakaceci. Tangerrluku qaillun pitalriamek assiiluciat, nallunrirluci-llu anucimirqecetaarilqa Jerusalem-aamek ellmikuunrilucianek;

²³cali-llu nallunrirluku ellmikun tamakunek pillrunriluciqa, waten qanertuq ATANEQ Agayun.