Read Yupik Ezekiel 16 Bible Online

Ezekiel 16 - Yupik bible

Ezekiel 16

²“Tuquarkaulriami yugmi, qanrusgu Jerusalem-aaq nallunrirtelluku uuminarqellrianek atulallrinek.

³Qanerluten-llu, waten qanertuq ATANEQ Agayun Jerusalem-aamun: “Yuurtellruuten Canaan-aam nuniini, ataluten Amorite-amek, aanaluten-llu Hittite-amek.

⁴Yuurtellerpeni qallaciirumallrunrituten eruumallruvkenak-llu. Taryumek-llu qain mingullrunritaat 'lumarrarmun-llu imgucimallruvkenak.

⁵Takumcukestaitellruavet kenkestaunak-llu makunek pimallrunrituten, tau͡gaam egcimallruluten carr'ilqamun.

⁶“Wiinga-llu kitullemni tangrramken qiperrlullerpeni augpeni, wiinga tuqusqumanritellruamken.

⁷Wiinga-llu anglirivkallruamken naunratun nauluaqalriatun. Piniriavet-llu sugturiluten neviarcaraurrluten. Aamagken elucinglutek, nuyaten-llu nauluteng, tau͡gaam cali matangqaluten.

⁸“Uumikuani-llu kitunqigtellemni maaten tangrramken uingnarillinilriaten. Matangqiivet-llu paltuumnek ac'etamken akeqluten-llu wiinga kenkeciqniluten. Cali-llu akeqluten nuliqsaguciiqniluten, tuakenirnek-llu wiinga piksagulluten.” Waten qanertuq ATANEQ Agayun.

⁹“Mermek-llu pilua auk erullruaqa qaivnek mingugluten-llu olive-aam uquanek.

¹⁰Aturirluten-llu tangnircaumalrianek aturanek, qeciignek-llu sap'akirluten, 'lumarraqegtaarmek-llu qamiqurrilicirluten, suukumek-llu paltuugluten.

¹¹Tangnircautnek-llu at'elluten, talliranek uyamignek-llu.

¹²Cigvilirluten-llu aqlicirluten-llu, tangnirqellriamek-llu nasqerrucirluten.

¹³Kenugutkalirluten-llu suulutaanek qerrirlimek-llu, aturaqegciluten-llu tangnircaumalrianek 'lumarraqegtaarnek suukunek-llu. Ner'aqluten-llu kelipanek mukaaqegtaarmek piliaqumalrianek, evegtaat neqautiitnek, olive-aat-llu uquatnek. Kenegnarikacagarluten angayuqam-llu nuliqsagulluten.

¹⁴Kenegnaucin-llu niitnaurrluni angayuqauvigni tamalkuitni, tua-i-wa wiinga tuaten ayuqlirivkallruamken, qanertuq ATANEQ Agayun.

¹⁵“Tau͡gaam kenegnaucirpenun alarcavet niitnaullerpenun-llu akusrarutekevkalanguten tekitellrianun tamalkuitnun.

¹⁶Aklukegtaarpet-llu ilait aturluki kenuggluki agayuyaraten, akissutun-llu piciatun angutnun akusrarutekevkarluten.

¹⁷Qerrirlit-llu suulutaat-llu cikiutekellrenka aturluki angutnek agayutnguanek pilillruuten akusrarutekevkarluten-llu tamakut aturluki.

¹⁸Cikiutekellrenka-llu aturat tangnircaumalriit ac'etaten agayutnguanun, elliitekluki-llu olive-aat uquit aruviarkat-llu tamakunun.

¹⁹Neqkat-llu cikiutekellrenka, assinkacagait mukaat, olive-aat uquat, evegtaat-llu neqait elliitekaten assikesqelluten agayutnguanun.” Waten qanertuq ATANEQ Agayun.

²⁰“Qetunrapuk-llu panipuk-llu elliitekaten tuqutarkauluki agayutnguanun. Akusrarutekevkallren-qaa carraukngavgu

²¹irnianka-llu tuqurqaten elliitekluki ekuavkarluki agayutnguanun?

²²Uuminarqellriaruluten-llu akissuullerpeni qaillun yuurtellren umyuaqeqaqsaitan, matangqaluten, qiperrlullren-llu augpeni.”

²³ATANEQ Agayun qanertuq, “Nakleng elpeci assiilnguut tamakut aturraarluki, cali

²⁴pilillrulriaci tumyarat taqruitni agayuvigkarpecen̄ek agayutnguanun akissurvigkarpecen̄ek-llu.

²⁵Kenegnallerpet alarcetaaten, akusrarutekevkarluten angutnun ullagtevnun tamalkuitnun, akissullren-llu ciumurusngiinarluku.

²⁶Yaaqlirpenun-llu Egypt-aarmiunun aglumauralrianun akusrarutekevkalartuten elpenek ilalqerluten, eqcirlua wiinga.

²⁷“Yaggvikluten anucimirqecetaararkaurtamken allurrluten-llu atawaqautmek elpenun cikiuteksaaqellemnek. Tunluten-llu Philistine-anun eq'ukestevnun kasngukestainun tun'ernarqellriim ayuqucirpet.

²⁸“Camircesciigaliavet-llu Assyria-rmiunun cali akissuurtuten, cali tau͡gken taukut camirutkevkenaki.

²⁹Tuamta-llu cali Babylon-iarmiuni, taukut kupcaarulriit, akissuryaaqellriaten, taukut-llu cali camirutkenritaten.”

³⁰Waten qanertuq ATANEQ Agayun, “Makunek piurallruuten takailngurtun akissutun.

³¹Tumyarani-llu tamalkuitni agayuvigkarpenek agayutnguanun, akissurvigkarpenek-llu piliaqluten. Tau͡gaam elpet akingellerkan pitekluku akissunrituten.

³²Akusrarutekevkalartuten allanernun uin kenkevkenaku.

³³Akissut akilirtelluteng pilartut, tau͡gaam elpet akusrarutekesteten tamalkuita cikiutnek cikirluki pilaraten, akilirluki aipaqaqluki.

³⁴Allatun akissutun ayuqenrituten, kia-llu qessange'rpet akissurcetellruvkenak. Elpet akilircetevkenak ellait tau͡gaam akililaraten, ilumun allatun akissutun ayuqenrilavet.

³⁵“Taumek, Jerusalem-aaq, akissuuq! Niisgu ATANREM qanellra.

³⁶Waten ATANEQ Agayun qanertuq: matarrluten akissutun aglumakestevnun agayutnguarpenun-llu akusrarutekevkalaavet, tuqulluki-llu irniaten elliitekaqluki agayutnguanun,

³⁷taumek wiinga quyurtarkaukenka akusrarutekestelten, kenkelten eq'ukelten-llu. Nutaan-llu avatevnun kassugulluten quyurqaarluki matarqeciqamken, taukunun matarpet tangertelluten.

³⁸Pinarqellriarurceciiqamken akusrarutekevkallerpegun tuqurqillerpegun-llu, eq'urtellma-llu pitaciatun anucimirqecetaarciqamken tuquvkarluten.

³⁹Ellaitnun tunciqamken, ellaita-llu navgurciqait akissurvikelten agayutnguanun-llu agayuvikelalten. Aturaten teggalquqegtaaraat-llu kenugutkelalten teguciqait matkacagarpet ellirtelluten.

⁴⁰“Eguaquriciqut teggalqunek miluqustekarpenek, nuussirpamegteggun-llu uluarluten itumciiqaatgen.

⁴¹Eneten ekuavkarciqait arnarugarnun-llu tangvagtelluten anucimirqecetaarumallerpeni. Akissurciigalivkarciqamken cikirciigalivkarluki-llu akusrarutekilriit elpenek.

⁴²Nutaan-llu wiinga eq'urtenrirciqua qungyanrirlua-llu. Uitanqegciciqua qenertenrirciqngama.

⁴³Tua-i-wa nalluyagucavgu ayagyuallren, eqcirlua tau͡gaam makunek pillerpegun. Taumek wiinga tuc'etarkaukenka makut atulten elpenun. Ciin-llu pellernarqelriit atulten ilaluki akusrarutekevkarcit?” Waten qanertuq ATANEQ Agayun.

⁴⁴ATANEQ qanertuq, “Ayuqestassiigutmek qalartetulit uumek ayuqestassiigucirciqaatgen, ‘Panian aanani ayuqaa.’

⁴⁵Elpet-wa ilumun aanavet panikekiiten. Caukellruvkenaku-llu uini irniani-llu. Alqaagpetun cali ayuqluten eq'ukilriignek uimegnek irniamegnek-llu. Elpet alqaagken-llu nunarpiik aanangqerravci Hittite-amek ataluci-llu Amorite-amek.[8]

⁴⁶“Alqaan-llu Samaria-ruluni nunarraat-llu avatiinelnguut, uitaluni neglirnerpeni; nayagaan-llu Sodom-aaruluni nunarraat-llu avatiinelnguut ungalalirnerpeni uitalria.

⁴⁷Umyuan-qaa engelkaringallruuq maligtaqullerpeni ayuqeliluki pellernarqelriit caliakek? Qang'a, ak'anun pivkenak callerpegun tamalkuan arcaqanrurtellruuten elkegni.

⁴⁸“Unguvalua Agayutngucimtun, ATANEQ Agayun qanertuq, alqerpet Sodom-aam nunarraat-llu avatiinelnguut assiilnguq atulallren atullrunritaat.

⁴⁹Elliin panini-llu umyugaat quyillruuq neqkaliameng uitanqegciluteng-llu uitiimeng, tau͡gaam aulukellruvkenaki arrsaulriit nuuqitellriit-llu.

⁵⁰Qutegngaut niicugpek'nateng-llu, caliluteng uumikek'ngamnek, taumek nallunrilucirpecetun piunrillrukenka.

⁵¹“Samaria assiilngillerpet avgitnek assiilngirtallrunrituq. Elpet pellernarqellria atullren arcaqanrullruuq. Assiilnguum atullerpet alqaagken elpenun pitassiaruskunek assiilngiqsailngurtun ayuqevkaryarak.

⁵²Kasngunarqellren aturarkaurtan. Assiilngilten arcaqanruameng alqaagpeni, canivni assiilngiqsailngurtun ayuqliriuk. Kavingluten kasngunarqucin aturru, alqaagken ellualriatun ayuqlirivkaragken.”

⁵³Sodom-aankuk Samaria-llu nunarraat-llu avaqlikek ataam tukuurceciiqanka. Elpet-llu cali, Jerusalem-aaq, tapqulluten tukuurceciiqamken.

⁵⁴Elpenek kasngukciquten, kasngunarqellerpet-llu nasviciiqak alqaagken nakiciagnek.

⁵⁵Ciungani ayuqucillermegtun ellirciquk, elpet-llu cali nunarraat-llu avatevni uitalriit ciungani ayuqucillerci ayuquciqsagulluku.

⁵⁶Picingssautek'lallrunritan-qaa Sodom-aaq umyuan quyillrani

⁵⁷assiilnguq-llu atullren nallunrirpailgatgu? Elpet maa-i elliitun ayuqliriuten picingssauteksagulluten Edom-aarmiut, Philistine-at, allat-llu eq'ukestevvet avatevni uitalriit.

⁵⁸Elpet-llu nangtequtekarkaugaten assiitellriit tun'ernarqellriit atulalten. ATANEQ waten qanertuq.

⁵⁹ATANEQ Agayun qanertuq, “Elpet caliallren cuqluku wiinga tuaten piarkaugamken, tuaten piciqnirraarluten nallungualaavki akqutkellren-llu aturpek'naku.

⁶⁰Tau͡gaam wiinga elpenun akqutkelqa ayagyuallerpeni pinricen̄arngaitaqa, akqut'liarkaulua-llu pillgutekluten akwarpak piugarkamek.

⁶¹Umyuaqeciqan ayuqucillren kasngukluku-llu alqaan nayagaan-llu ut'reskagnek. Panikellriatun elpenun ayuqevkarciqagka, akqutkellma elpenun man'a ilakenrilengraaku.

⁶²Nutarciiqaqa akqutkelqa elpenun, nallunrirniaran wiinga ATANRUCIQA.

⁶³Alarqaqlerpenek au͡g'ariciiqamken. Tau͡gaam elpet umyuaqluki kasnguyugluten qanerkaiciiquten.” ATANEQ Agayun waten qanertuq.