Read Yupik Ezekiel 17 Bible Online

Ezekiel 17 - Yupik bible

Ezekiel 17

¹ATANREM qanrutaanga,

²“Tuquarkaulriami yugmi, Israel-aam yui ayuqestassiigutmek qanruski

³nallunritesqelluki camek wiinga, ATANEQ Agayun, ellaitnun qanruciqa: Angtuarpagmek yaqulegpagtangqellruuq tangnirqellrianek melqurluni yaqurpiigni nengingalukek. Tengluni ayagtuq Lebanon-aam ingriinun asmulluni-llu napam cedar-aam kangranek,

⁴ayautaa tuneniartet nuniitnun elliluku-llu tuneniartet nunarpiitnun.

⁵Naugaaralriamek-llu tegulluni Israel-aam yuin nuniitnek nauceciiraa tauna nunamun naungignarqelriamun meriucuunani-llu.

⁶Tauna-llu naungami sugtuvkenani sagtuq napayagaurrluni wine-arkanek atsanek naugituliuluni. Avayai-llu qulmun nauluteng taum yaqulegpiim tungiinun, acilqungluni-llu aciqvanun. Napayaaq-llu patumaluni avayanek cuyanek-llu.

⁷“Tau͡gaam cali allamek yaqulegpagtangqertuq yaqurpaulriamek melqulilriamek-llu. Taum-llu napayagaam acilquni cuyani-llu ayagcetai taum yaqulegpiim tungiinun umyuarteqluni mermek cikirnayukluni amllenranek mer'an naucetaarviim nauvimi.

⁸Tau͡gaam tauna napayaaq ak'a nauceciirumallruuq naungignarqellriamun mel'ilriamun nunamun naugisqelluku cuyanek atsanek-llu wine-arkanek, nauluaqaasqelluku-llu.

⁹“Qanra waten, Waten qanertuq ATANEQ Agayun: Napayaaq-qaa una nauluaqerluni nauciquq? Yaqulegpiim-qaa ciuqliim qecugngaitaa acilqurtuumaan atsat naugillri qecugtelluki avayai-llu ayemqelluki nalavkarluki? Pinialeng'e'rmi wall'u atanruvigpaunge'rmi qecugyugngaa.

¹⁰Ak'a nauceciirumariyaaquq. Tua-i-qaa nauciquq? Nalangaituq-qaa calaramek anuqenguskani? Tuani-llu-qaa naumavimini nalangaituq?”

¹¹ATANREM cali waten qanrutaanga,

¹²“Qanruski ukut inglulitaaryulriit, Makut-qaa ayuqucingumaaci? Waten qanruski, Babylonia-m angayuqra tailuni Jerusalem-aam angayuqra atanerruartuumaan ut'rutai Babylonia-mun.

¹³Taum-llu angayuqam ilainun akqut'lirraarluni ukvernarcarivkallrua akqut'liara navgarkaunritniluku. Yuut-llu piuranrit teguluki

¹⁴anguyagyailkutnguvkarluki akqut'liaranun-llu navegyailkutnguvkarluki.

¹⁵Tau͡gaam Judah-m angayuqra inglulicami ayagceciuq Egypt-aamun horse-aanek, anguyagterugarnek-llu aqvatelluki. Tua-i-qaa piciurciiquq? Picurlautekngaitaa-qaa tuaten pillni? Akqut'liani-qaa navkuniu anucimirqecetaarumangaituq?”

¹⁶ATANEQ qanertuq, “Unguvalua Agayutngucimtun tauna angayuqaq tuquciquq Babylonia-mi ukvernarcarirraarluni tuaten pinrilami, akqutkellni-llu cali aturpek'naku Babylonia-m angayuqranun, atanrurcetlerminun.

¹⁷Anguyagtain Egypt-aam angayuqran pinilriarung'e'rmeng ikayurciigaciiqaat anguyagmi, Babylonia-m anguyagtai nuna qerturiluku pilikata elagluteng-llu ilutulriamek avatairrluku nunarpak, yugnek amllernek tuqucinaluni.

¹⁸Elliin ukvernarcarillni akqut'liani-llu atunrilaki, taumek waniwa anagarkaunrirtuq.”

¹⁹“Taumek waten qanertuq ATANEQ Agayun: Unguvalua agayutngucimtun, anucimirqecetaararkaugaqa akqutellni atunrilaku ukvernarcaritekellni atemkun aturciqniluku.

²⁰Kuvyirluku cangtaqciqaqa, ayaulluku-llu Babylonia-mun tuani anucimirqecetaarciqaqa, piciuvkenani pian wangnun.

²¹Anguyagtai avurat tuquciqut anguyauskuneng, ilakuarit-llu cekavcimaciqut tamiinun anuqem ayagallrinun. Nutaan-llu nallunrirciqerci wiinga, ATANEQ tuaten qanellruciqa.”

²²Waten qanertuq ATANEQ Agayun: “Wiinga tungaunii teguciqaqa sugtulriim napam cedar-aam kangra naugaarmek-llu au͡gauqaarlua; nauceciiciqaqa ingrim qertulriim kangranun,

²³Israel-aam nuniini quyinkacagaatnun ingrit. Naugiciquq avayangluni naucetaarkangluni ucurnaqluni naparpaurciiquq. Yaqulget ayuqenrilnguut uitavikelarciqaat talisvikluku tuaten.

²⁴Napat tamarmeng nunami nallunrirciqaat ATANRUCIQA. Naparpiit iquvkalaranka napayagaat-llu sugturivkaraqluki. Meculget napat nalavkalaranka, nalamalriit-llu napat mecungevkarluki. Wiinga ATANEQ, qanertua. Qanelqa piciqnilua pinrilngaitaqa.”