Read Yupik Ezekiel 18 Bible Online

Ezekiel 18 - Yupik bible

Ezekiel 18

¹ATANREM qanrutenqigtaanga:

²“Cauga una ayuqestassiigun Israel-aam yuin qanrutkenqigtaaqiit? ‘Angayuqrita nerait quulqallri wine-arkat atsat, Tau͡gaam irniarit neqnialqitut quulerninarqellriamek.’”

³ATANEQ qanertuq, “Unguvalua Agayutngucimtun, ayuqestassiigun una qanrutkenqiggngaitarci Israel-aam yuini.

⁴Yuut tamarmeng unguvait wiinga pikanka, angayuqrita unguvait irniarita-llu. Yuk tau͡gaam assiilngiquni tuquarkaurciiquq.

⁵“Angun ellualriarukuni, alerquutnek-llu maligtaquilriaruluni iqluyuunani-llu,

⁶agayutnguaritnun-llu Israel-aam yuin agayuyuunani, nereksaunani-llu elliitekumalrianek agayutnguanun agayuyaraitni, allam-llu nulirranek iqlutmun unayaqliqsaunani, akusrarutekiksaunani-llu agelrumalriamek arnamek.

⁷Teglegikengyuunani-llu yugmek. Navrallrem-llu akilicisciigacailkutkellra egmianun tun'aqluku; kailrianek-llu nerevkariluni, aturarkailnguut tuaten aturkaitnek cikirluki.

⁸Akimek-llu navriskengyuunani navrautiin akingutkellerkaa umyuaqluku. Assiilngurmek atullerkani qessakluku, arenqiallugutellget-llu elluarrluki arenqigillerkaat caliaqaqluku.

⁹Tuaten ayuqellriim alerquutenka aturai, pisqutenka-llu mulngakluki aturluki. Ellualriaruuq, unguvaarkauluni-llu. ATANEQ Agayun waten qanertuq.

¹⁰“Tauna-llu angun qetunrangqerquni tegliuryulriamek, tuquciyugluni-llu, aturyugluki-llu makut

¹¹atami atuyuilkai. Ner'aqluni elliitekumallernek agayutnguanun agayuyaraitni, allat-llu nulirritnek unayaqliraqluni.

¹²Teglegiaqluki-llu arrsaulriit navralriit-llu akilicinricailkutait piksagutaqluki. Ayagaqluni-llu agayumanrilnguut qigcikekaitnun, agayuaqluni-llu agayutnguaritnun,

¹³akinek navriskengaqluni navrautait akingutkengnaqluki. Unguvaciquq-qaa? Qang'a, unguvangaituq. Makunek pellernarqellrianek atullruami tuquarkauguq. Tuqullra-llu elliinun tau͡gaam tusngaarkauluni.

¹⁴“Tau͡gken tauna cali qetunrangkuni, tangvagluku-llu atani tamakunek assiilngillrani, tau͡gken ellii tuaten pillratun pivkenani.

¹⁵Agayuksaunani-llu Israel-aat agayutnguaritnun, neryuunani-llu elliitekumallernek inerquusngalriani agayutnguanun agayuyaraitni, allat-llu nulirritnek unayaqiksaunani,

¹⁶wall'u nangciyuunani, tegliuyuunani-llu. Navralriit-llu akilicinricailkutait tun'aqluki. Kailriit-llu nerevkaraqluki atu'urkailnguut-llu aturkaitnek cikiraqluki.

¹⁷Assiilngurmek aturyuumiitaqluni, navriskengyuunani-llu navrautaita akingutkellerkaat umyuaqevkenaku. Alerquutenka atularai picirkiutenka-llu maligtaquluki. Atiin assiilngillran tuquvkarngaitaa, unguvaarkauguq tauna.

¹⁸Atii tau͡gaam yugnek teglegissaagyullruuq tegliuryugluni-llu, assiitellrianek yugnun piyugluni. Taumek elliin assiilngillni pitekluku tuqullrulria.

¹⁹“Tau͡gaam elpet aptuten, ‘Ciin-mi qetunraan nangtequtekenritaki atami assiilngui?’ Tua-i-wa qetunraa elluarrluni piurallruan. Alerquutenka aturluki mulngakluki maligtaquurluki, taumek unguvaarkaulria.

²⁰Assiilnguum tau͡gaam aturtii tuquarkauguq. Qetunraan nangtequtekarkaunritai atami assiilngui, atiin-llu cali qetunrami assiilngui nangtequtekngaunaki. Ellualria angun nunuliutengqerciquq assilrianek caliamikun, elluanrilnguum-llu nangtequtekarkauluki assiilnguut atullni.

²¹“Assiileng'e'rmi angun umyuarnayaguciluni assiilnginriquni, alerquutenka-llu atungluki, yuut-llu assikekaitnek elluakekaitnek-llu aturluni, tuqungaituq tau͡gaam unguvaarkaurciiquq.

²²Assiilngui-llu tamarmeng au͡gaumaarkauluteng, unguvaarkaurrluni-llu piciulria atulangamiu.

²³ATANEQ Agayun qanertuq, Umyuartequci-qaa wangnun ilukegcitkelaryukluki tuqulriit assiilnguum aturtai? Tuaten piyuitua. Umyualinqigtesqumalaryaaqanka tau͡gaam unguvasqelluki.

²⁴“Tau͡gken ellualria angun assilriamek calinrirluni assiitellriit yuut pellernarqellrianek atutukaitnek atungluni, tauna-qaa unguvaurciquq? Unguvangaituq! Ellualriit-llu caliaqelallri umyuaqumangaunateng. Piciunrilngurkun yuungami assiilngurmek-llu atullruami tuquciquq.

²⁵“Elpet tau͡gken qanerluten, ‘ATANREM piciryaraa piciunrituq.’ Niicugnicia, Israel-aam yuini: Wiinga-qaa piciryaraqa piciunrituq? Elpeci-qaa tau͡gaam piciryaraci piciunritut?

²⁶Ellualria assilriamek atunrirqami, assiilngurmek tau͡gaam atungluni, tauna tuquaqami assiilnguum atullran tuquvkalaraa.

²⁷Assiitellria-llu angun assiilnginrirqami assilriamek calingluni ellminek anirtulartuq.

²⁸Elpekaqamiu atullni assiilnginrirluni-llu tuqungairuciiquq, tau͡gaam unguvaarkaurrluni.

²⁹Elpeci-llu, Israel-aam yuini qanlartuci, ‘ATANREM piciryarai elluanritut.’ Umyuartequci-qaa piciryaranka elluanricukluki? Elpeci-wa tau͡gaam piciryaraci elluanrilnguut.

³⁰“Wani-wa, wiinga, ATANEQ Agayun, qanrutamci Israel-aami yuini, wiinga atauciuqaqluci cuqtarkaugamci caliarpeciuggun. Umyualinqigci assiilnginrirluci, assiilngurpecen̄un piunrircecaqunaci.

³¹Assiilngurmek atunrirluci, ircaquci umyuaci-llu nutarciki. Ciin elpeci Israel-aam yuini tuquyugceci?

³²Wiinga tuqusqumanritamci, umyualinqigci unguvaniartuci. ATANEQ Agayun qanertuq.”