Read Yupik Ezekiel 19 Bible Online

Ezekiel 19 - Yupik bible

Ezekiel 19

¹ATANREM mat'umek angniitnam yuarutiinek atuusqaanga angniiluteklukek malruk Israel-aam atanerruak:

²Aanan yugtutuliluaqaullruuq! Piyagiurluni-llu yugtutulit angucalut akuliitni alingnarqengraata.

³Anglicariuq piyagami iliitnek elitnaurluku-llu pissuryaramek; tauna-llu elituq yugnek nertuliurrluni.

⁴Atanruviit niiskengaqsagucamegteggu petmililuteng tuaggun pitaqaat. Negcigteggun-llu qamurluku ayaulluku Egypt-aamun.

⁵Aanii utaqalgiryaaquq cacirkairutnatkaminun. Piyagami-llu cali iliitnek piluni anglicaraa, tauna angliami cakneq alingnarqellriaruluni.

⁶Taqmigcami allat yugtutulit maligtaquluki ayagalartuq. Elicamiu-llu pissuryaraq yugnek nerlangluni.

⁷Anguyagcuutet asvairqumalriit navgularai nunat-llu uitaviksunairutaqluki. Tamatum-llu yui alingaqluteng cakneq uirraniaqan.

⁸Atanruviit quyurtut anguyagnaluku, yuut taiguraluteng tamiinek. Kuvyateng pissurcuuteteng cagtait negamegteggun-llu pitaqluku.

⁹Negcignek aturluteng casgumun ekaat Babylonia-m-llu angayuqranun ayautaat. Nayurcirluku-llu uitavkarluku, uirranillra niitnausciigalivkarluku Israel-aam ingriini.

¹⁰Aanan napayaartun wine-arkanek atsanek naugitulitun ayuqellruuq, nauceciirumalriatun kuiggaam caniani. Mermek nuuqitenrilami, napayaaq naugiuq cuyangluni atsangluni-llu.

¹¹Avayangqertuq elngulrianek, nauluteng-llu septer-aarkarnirluteng. Napayaaq-llu nauguq sugturiluni amirlut tekicugngaluki; yuut-llu tamarmeng tangerrluku nauluaqertacia, cuyalirluni sugtuluni-llu.

¹²Tau͡gaam tauna napayaaq mulngakevkenani qecuumallruuq nunamun-llu egcimaluni. Calaramek-llu anuqem kinercetaa qakinrurtelluku; atsai-llu igqaqluteng. Avayai au͡g'arqumaluteng; qakinrurtut kenrem-llu ekualuku.

¹³Maa-i-llu nauceciinqigcimaluni yuilqumi, kinreskiini mertailngurmi nunami.

¹⁴Acilqurrakun kenrem akuqeraa; ekualuki-llu avayai atsai-llu. Avayai elngurinqiggngaitut septer-aarkarniirulluteng. Una angniitem yuarutkaa; atunqigtaarturalaraat-llu.