Read Yupik Ezekiel 2 Bible Online

Ezekiel 2 - Yupik bible

Ezekiel 2

¹Waten qanrutaanga, “Tuquarkaulriami yugmi, nangerten. Qanellguteksugamken.”

²Erinam qalarusnginanrani Agayutem anerneran tutaanga nangercellua-llu; niitaqa-llu qalarutellrania.

³Qanrutaanga-llu, “Tuquarkaulriami yugmi, ayagcetqataramken Israel-aam yuinun, atanruviatnun inglulitaaryulriit wangnun; maa-i cali inglulitaalartut, ciuliateng ayuqluki.

⁴Asvaitut takaqevkenii-llu, taumek ellaitnun ayagcetqataramken qanrutesqelluki Wii, Artuqailnguq ATANEQ, qanerkamnek ellaitnun.

⁵Niicugning'e'rmeng wall'u niicugniyuumileng'e'rmeng (tua-i-wa inglulicukapigcameng) nallunriciiqaat prophet-aaq akunlemeggni uitallrucianek.

⁶“Tau͡gaam elpet, tuquarkaulriami yugmi, aliksaqunaki, qalarutengraatgen-llu qanellritnek alingyaqunak. Umyuarteqsaaqeciquten naunerrluut cukilanat-llu akuliitni uitayukluten, ilagallrat ayuqeciquq ciissirpagnun nunalguciutellriatun. Tuaten pingraan, qanellritnek alingyaqunak, wall'u tangcurlagallritnek caceskicaqunak, tua-i-wa inglulicukapigcameng.

⁷Qanrutkesqellemnek qanrutniaten niiciiqut wall'u niisngaitut. Neq'akekiu inglulicukapigtellriaruciat.

⁸“Tau͡gaam elpet, yugmi tuquarkaulriami, niicugniu elpenun qanerkaqa; inglulitaalriaruyaqunak taukucetun. Qanren aitaresgu nerluku-llu cikiuteka elpenun.”

⁹Tangertua unatmek yagingalriamek tungemnun kalikarmek imegyaramek tegumiarluni.

¹⁰Unatet ciuqamnun kalikaq sagtaat, maaten piaqa igangqellinilria manumikun tunumikun-llu, tuani igausngaluteng umyuiqnat, qivrum nepuatai, nangtequtet-llu.