Read Yupik Ezekiel 20 Bible Online

Ezekiel 20 - Yupik bible

Ezekiel 20

¹Allrakut malrunelgatni, iralut tallimiit qulnek ernengqerluku nunamten̄ek ayagcecimarraanemten̄ek, Israel-aam yuin ciulirnerit taillruut ellatessurviknalua ATANREM pisqutiinek, aqumluteng-llu ciuqamnun.

²ATANREM qanrutaanga:

³“Tuquarkaulriami yugmi, Israel-aam yuin ciulirnerit waten qanruski, Waten qanertuq ATANEQ Agayun: Tua-i-qaa taiguci apyuteksarturluku wiinga pisqutka? Unguvalua Agayutngucimtun elpecen̄un camek aptessngaitua.

⁴“Tuquarkaulriami yugmi, cuqciiqaten-qaa? Kiiki kitaki cuqeski. Neqaarturiski pellernarqelrianek ciuliarita caliallritnek.

⁵Waten-llu qanrulluki, waten qanertuq ATANEQ Agayun: Ernermi tuani Israel-aam yui cucukellemni, wiinga akqellruanka, nallunrirtellua-llu ellaitnun Egypt-aami qanrulluki: wiinga ATANRUUNGA elpeci Agayutkarpecia.

⁶Tuani-llu ernermi akqellruanka anutarkauniluki Egypt-aamek ayaulluki-llu nunamun wiinga cucukekemnun ellaitnun pikesqelluku, nunamun tukuulriamun naungignarqellriamun, nunat assinqurraatnun.

⁷Qanrulluki-llu ciqitesqelluki pellernarqellriit agayutnguat kenkekait, menuurutkesqevkenaki-llu piciunrilnguut agayutait Egypt-aarmiut, wiinga ATANEQ Agayutekngatnga.

⁸Tau͡gaam inglulitellruut wangnun niicugpek'nateng-llu. Agayutnguateng pellernarqellriit Egypt-aarmiut-llu agayutait pegcugpek'naki. Wiinga-llu umyuarteqsaaqua Egypt-aamelnginanratni naspetevkarnaluku eq'uqertellma tuknitacia.

⁹Tau͡gaam tuaten pillrunritua, atqa caunrilleksagutesqumanrilamku, taukut yuut uitaviita takuatni qanrutellruamki Israel-aam yui anutarkauniluki Egypt-aamek.

¹⁰“Wiinga-llu anutellruanka Egypt-aamek mer'ilngurmun nunamun.

¹¹Alerquutemnek-llu cikirluki elitnaurluki-llu picirkiutemnek, yuum atuquniki unguvatkarkaungaki.

¹²Sabbath-aam-llu atullra nallunailkutaurtellruaqa akqut'liallemegnun umyuallguteklunuk, ellaitnun neq'akesqelluku wangnun ATANERMUN qigcignarivkalauciat.

¹³Tau͡gaam tamaani-llu yuilqumi mer'ilngurmi cali catkellrunritaatnga. Alerquutenka aturyugpek'naki pisqutenka-llu cakaarluki, yuum atuquniki unguvatkarkai. Sabbath-aaq menuurteqapigtellruat. Wiinga-llu umyuarteqsaaqua eq'uqertellma tuknitacia ellaitnun naspecetnaluku piunrirluki tamaani mer'ilngurmi nunami.

¹⁴Tau͡gaam tuaten pillrunritua, caunrilleksagutesqumanrilamku atqa atanruvignun tamaanelngurnun, tangvagtellemnun yuunka anutellemni Egypt-aamek.

¹⁵Taumek wiinga akqut'lillrulrianga tamaani mer'ilngurmi yuilqumi ayautarkaunrirluki nunamun cikiuteklemnun ellaitnun, nunamun tukuulriamun naungignarqellriamun, nunat assinkacagiit.

¹⁶Tuaten akqut'lillruunga alerquutenka cakaaratki, picirkiutenka aturyugpek'naki, Sabbath-aaq-llu menuurrluku, agayutnguanun agayullerkarteng arcaqakenruluku.

¹⁷“Tau͡gaam takumcuyagulluki tuqucuumiirutellruanka tamaani mer'ilngurmi yuilqumi.

¹⁸Tau͡gaam inerqullruanka ayagyuanertait: Niisnganriciki ciuliarpeci taqellrit alerquutet; piciryarait maligtaqunriciki, wall'u menuurcaqunaci agayutnguaritgun.

¹⁹Wiinga ATANEQ Agayutkarpecia. Niisngaciki alerquutenka picirkiutenka-llu.

²⁰Sabbath-aaq qigcignarqelriarurceskiciu nallunailkutauniartuq akqut'liallemten̄un, neq'akevkalarniaraa-llu wiinga ATANEQ elpecen̄un Agayutkuciqa.

²¹“Tau͡gaam taukut-llu caukenritaatnga. Alerquutenka atunritait picirkiutenka-llu maligtaquvkenaki, unguvatkai yuum atuquniki. Sabbath-aaq menuurrluku. Wiinga-llu umyuarteqsaaqua eq'uqertellma tuknitacia ellaitnun naspetelluku tuquqnaluki tamaani mer'ilngurmi yuilqumi.

²²Tau͡gaam tuaten pillrunritua, caunrilleksagutesqumanrilamku atqa atanruvignun tamaanelngurnun, tangvagtellemnun yuunka anutellemni Egypt-aamek.

²³Taumek allamek akqut'lillrulrianga tamaani yuilqumi. Cekavcetarkaurrluki tamalkuan ellarpiim iluanun.

²⁴Tuaten pillruunga alerquutenka atunrilatki, picirkiutenka-llu cakaarluki, Sabbath-aaq-llu menuurrluku, agayuaqluteng-llu agayutnguanun ciuliameng kevgiullritnun.

²⁵“Wiinga-llu cikiranka alerquutnek assinrilngurnek picirkiutnek-llu unguvavkarisciigalngurnek.

²⁶Menuurtelluki-llu ellaitnek elliitaitgun, elliitekevkarluki tan'gaurluut yung'eqarraarutait. Tuaten pivkallruanka anucimirqecetaarluki nallunriisqelluki-llu wiinga ATANRUCIMNEK.

²⁷“Taumek, tuquarkaulriami yugmi, Israel-aam yui qanruski waten, Waten qanertuq ATANEQ Agayun: Maaggun cali ciuliarpeci caunrilkellruatnga wangnun piciunritlermegteggun.

²⁸Ayautellemni nunamun akqutkellemnun ellaitnun cikiutekciqniluku, tangrramegteki qertulriit qemit napat-llu cuyalilriit, elliivik'larait tamalkuita tuqutarkanek. Qenngevkaraqlua elliigaqameng ekuagiluteng, wine-amek-llu taitellermeggnek elliitekameggnek.

²⁹Wiinga-llu aptanka: Caugat makut qertulriit ayagvik'lalci? Tuaken-llu ayagluteng tamakut aterpagtelangellruit ‘Qertulriit.’[9]

³⁰Taumek waten cali qanruski Israel-aam yui, Waten qanertuq ATANEQ Agayun: Elpeci-qaa elpecen̄ek carrluurteqatartuci ciuliarpeci atulallrit aturluki agayuaqluci agayutnguanun?

³¹Maa-i cali mat'um nalliini elliilartuci elliitek'lallrita ayuqaitnek carrluurtaqluci tuaten elpecen̄ek elliitekluki irniaci ekuavkarluki agayutnguaqellritnun. Tau͡gken cali elpeci, Israel-aam yuini, taigaqluci apcarturluci pisqutka caucianek. Wiinga-llu ATANEQ Agayun unguvalua Agayutngucimtun, elpecen̄un camek apcessngailngua.

³²Umyuarpeciuggun ak'a taqutellruuci allatun atanruvigtun ayuqsugluci, yugtun allani nunani uitalriatun agayutulitun napanun teggalqunun-llu. Tau͡gaam tuaten piarkaunrituci.

³³“Wiinga ATANEQ, unguvalua Agayutngucimtun, aarcirturamci qenercimallemni atanirturarkaugamci unatemkun pinilriakun, piniqa tamalkuan aturluku.

³⁴Piniqa qenruciqa-llu elpecen̄un tangerceciiqaqa quyureskumci ut'rulluci-llu tamaitnek nunanek cekavcimallerpecen̄ek

³⁵ciuliqaggluci-llu nunamun mertailngurmun angayuqauvillgutkenrilnguut avatairumakiitnun, tuani-llu kegginavcen̄un pinarqelriarurciiqamci.

³⁶Anucimirqecetaarluci-llu, ciuliaci anucimirqecetaallrucimtun nunami mer'ilngurmi Egypt-aam yaaqsinrilkiini. Waten qanertuq ATANEQ Agayun.

³⁷“Asvailngurkun ataniumaciqamci akqutka-llu aturtelluku.

³⁸Akunlevcen̄ek au͡g'arciqanka assiilngiryulriit ingluliculriit-llu. Nunanek uitallritnek anevkarciqanka, tau͡gaam utercessngaunaki Israel-aam nuniinun. Tamaaggun nallunrirniarci wiinga ATANRUCIQA.”

³⁹ATANEQ Agayun qanertuq, “Kitaki, elpeci Israel-aam yuini, nutaan umyuarci aturciu! Kiiki agayutnguanun kevgiurci! Tau͡gaam aarcirturamci mat'um kinguani qaillun piviinaci niisngaarkaugarpecia, tanqilriim-llu at'ma qigcikenritellra taqluku agayutnguarpecen̄un elliilallerpeciuggun.

⁴⁰Tamaani nunami qigcignarqellriim ingrima qaingani[10] Israel-aam ingriani qertulriami, tamarpeci Israel-aam yuini agayuciquci wangnun. Wiinga-llu ilukegcitekluci neryuniurciqua elliitnek assilrianek qigcignarqellrianek-llu taitarkarpecen̄ek.

⁴¹Ut'ruskumci nunanek cekavcimallerpecen̄ek, ilukegcitkeciqamci, ilukegcilaucimtun narellranek aruviat elliitevci. Tamarmeng-llu atanruviit nunam qaingani tangerciqaat wiinga tanqilriaruciqa.

⁴²Elpeci-llu nallunrirarkaugarci ATANRUCIQA ut'ruskumci Israel-aamun, ciuliarpecen̄un akqutkellemnun cikiutekciqniluku.

⁴³Nutaan-llu umyuaqeciqerci tamalkuita kasngunarqellriit calialci qaillun-llu menuurtellerci elpecen̄ek. Elpecen̄ek-llu cumacikciquci tamalkuita assiilnguut atulalci pitekluki.

⁴⁴Takarnarquciqa piusqumaluku elpeci Israel-aam yuini, qaillukuaruskumci nallunrirciqerci wiinga ATANRUCIQA, anucimirqecetaayuunaci-llu assiilnguum atullerpeci pitatiinek.” ATANEQ waten qanertuq.

⁴⁵ATANREM cali waten qanrutaanga,

⁴⁶“Tuquarkaulriami yugmi, ungalam tungiinun caugi. Qalarten inglulirluku ungalaq, tekitarkaanek-llu qanrulluku napalilria nuna Negeb-aamelnguq.

⁴⁷Waten qanrusgu napalilria nuna Negeb-aamelnguq, Niiciu ATANREM qaneryaraa: Waten qanertuq ATANEQ Agayun, kenermek kumarciqatartua napat-llu tamalkuita elpeni naumalriit meculget qakinret-llu ekuaciqai; kurpalria keneq nipcimangaituq. Sagtarkauluni-llu ungalamek negeqvamun, yugnun-llu tamalkuitnun matnera elpegnarqeciquq.

⁴⁸Tangerciqaat wangnun, ATANEQ, kumartellrucia kia-llu yuum niptesciiganaku.”

⁴⁹Wiinga-llu qanertua, “ATANEQ Agayun, tuaten pivkaryaqunii! Yuut tamarmeng ak'a qanemyuugangata nallunarqellriatgun qalarterrlainalarnilua.”