Read Yupik Ezekiel 21 Bible Online

Ezekiel 21 - Yupik bible

Ezekiel 21

¹Cali ATANEQ qanertuq wangnun,

²“Tuquarkaulriami yugmi, pinarqellriaruniu Jerusalem-aaq yuut-llu agayularviit. Aarcirturluku-llu Israel-aam nunii

³waten qanrulluku, waten qanertuq ATANEQ: Inglukarpenga. Nuussirpaka amuluku tuqurqeciqamci assingraata assiilengraata-llu ayuqluki.

⁴Nuussirpaka aturluku inglulirarkauganka yuut tamalkuita ungalamek ayagluku negeqvaq tekilluku.

⁵Tamarmeng-llu nallunrirciqaat wiinga ATANEQ nuussirpaka amullrucianek caquanek qemagtenqiggngaunaku.

⁶“Tuquarkaulriami yugmi, yuuniara ciunerkairutellriatun nanikualriatun-llu. Yuuniara angniinak tangvagtelluten yugnun.

⁷Qanruskatgen-llu, ‘Ciin yuuniarasit?’ Qanrutniaraten, ‘Niitarkanka-wa pitekluki waten pilrianga.’ Tekiskan ircaqruit alingmek imangeciqut, talliit-llu aqevlaluteng cacirkaunateng, uluryayuum tekiciiqai, ciisqurrit-llu piniaciiqut mertun ayuqluteng. Pillerkaq tekituq; ak'a maa-i tekisngauq.” ATANEQ Agayun qanertuq.

⁸ATANREM qanrutaanga,

⁹“Tuquarkaulriami yugmi, qanruski yuut wiinga, ATANEQ qanertua: “Nuussirpak, nuussirpak ipegcaumauq qevlercaumaluni-llu.

¹⁰Ipegcaumauq tuquciarkauluni, qevlercaumaluni tanqigpallaraarkauluni kalluum kenratun. Nunaniryulriartaiciiquq, yum'a-wa pamatekellrunrilatki tamalkuita aarcirtuutet anucimirqecetaarutet-llu.

¹¹Nuussirpak qevlercaumauq, atullerkaanun upluku. Ipegcaumauq qevlercaumaluni-llu, tunumaarkauluni tuqutarayulim unatainun.

¹²Nangteqluten eriniagi, tuquarkaulriami yugmi; una nuussirpak taqumiin atuugarkauluni yumnun, Israel-aam-llu ciuliqagtainun. Tuqucimaarkaurcata ilakluki wiinga yuunka. Nanikualuten qat'gaten patguurki.

¹³Naspaaganka wiinga yuunka, umyualinqigcuumiilkata, makut tamarmeng ellaitnun tut'arkaugut.

¹⁴“Watua tekitarkamek qalaruski, tuquarkaulriami yugmi. Unateten kacguuruski, nuussirpak kapuqengniartuq pinqigtaarluni. Tuquciyugngaluni nuussirpauguq, nuussirpak alingnarqelria tuqurqituli.

¹⁵Alingluki unairesqelluki, iquasqelluki-llu iteryaraitni nunarpagnun. Nunarpak uitaviat alingcira'arqa nuussirpagmek tanqigpallaralriamek kalluum kenratun tuquciyukaarluni.

¹⁶Nuussirpaak, kilirturikina tuigtaarluten tallirpitmun iqsutmun-llu.

¹⁷Wiinga-llu unatenka kacguurusmiciqanka, qenertelqa-llu pellugciquq. Wiinga, ATANEQ qanertua.”

¹⁸ATANREM cali qanrutaanga:

¹⁹“Tuquarkaulriami yugmi, nallunailkucirikina tumyaragnek malrugnek Babylonia-m angayuqran tumkagkenek taikan nuussirpalgirluni. Tamarkenka tumyarak ayagnirtellukek nunamek ataucimek. Nallunailkutamek-llu naparciluten tumyarak avtellragnun.

²⁰Aipaakun nallunairturluku tumyaraq Rabbah-mun Ammonite-at nunarpiitnun, aipaanun-llu cali nallunairturtelluku tumyaraq Judah-mun, asvairqumalriamun nunarpagmun Jerusalem-aamun.

²¹Babylonia-m angayuqra nangengqauq tumyarak kassuutellragni. Nallunriryugluku nau͡gg'un ayaucirkani, pitegcautni arulatai[11] agayutnguani-llu ellatessurvikluki; yuvrirluku-llu tengua ekuagarkauluku elliitekumallrem.

²²Nall'arcetaarillermini-llu pitegcautetgun tallirpilirnemikun tegua pitegcaun Jerusalem-aamek nallunailkuciumalria. Taum-llu qanrutpigainarluku ayagluku ikirtuqat navgurcuutekaitnek upcartuusqelluku, qayagpaasqelluku-llu anguyiim qayagaurutiinek, ellisqelluki ikirtuqat navgurcuutait muragpiit ikirtuqanun, nunamek qerturiluku pilisqelluki, ilutulriamek-llu elaasqelluki nunarpak avatairluku.

²³Jerusalem-aam yuin man'a ukveqngaitaat akqut'lialteng umyuaqluki. Tau͡gaam mat'um tekitarkam qanrutkumallra piuq neq'angevkaasqelluki assiilngillrit, aarcirturluki-llu teguarurtellerkaatnek.

²⁴Taumek wiinga ATANEQ Agayun waten qanelrianga: Assiilnguci manimaut. Yuut tamarmeng pinarqelriarucirci nallunriraat. Ayuqucirpeciuggun nallunaitelartuq assiilngilriarucirci. Pinarqelriaruavci, inglukestevcen̄un tunciqamci.

²⁵“Elpet assiilngiumalriami, elluanrilngurmi atanirturtiini Israel-aam, erenren, erenra nangneqlirmek anucimirqecetaarumallerkarpet agiirtuq.

²⁶Wiinga, ATANEQ Agayun qanertua. Qamiqurpet nemra nasqurruten-llu yuukek. Cat ayuqucimegcetun ayuqngairutut. Nalugciki arrsaulriit pinimun! Iivkarciki atanirturilriit au͡g'arluki!

²⁷Imenrurrli, imenrurrli! Nunarpak imenrurtarkaurtaqa. Tau͡gaam tamana tuaten pingaituq cucukelqa tekipailgan anucimirqecetaaresqelluku nunarpak. Elliinun wiinga nunarpak tunciqaqa.

²⁸“Tuquarkaulriami yugmi, qalarten tekitarkamek. Qanruski Ammonite-at Israel-aam caunrilkuurtai, wiinga, ATANEQ Agayun qanllemnek. Waten qanrulluki, “Nuussirpak piunririarkaq upingariuq; Qevlercaumauq tuquciarkaurrluni, tanqigpallaraarkaurrluni-llu kalluum kenratun.

²⁹Tangrruaqelalci piciulriarunritut, iqluurluci-llu qalartelartuci tekitarkanek. Assiilavci umyuarrliqelriaruluci ernerkiurarci agiirtuq, nangneqlirmek anucimirqecetaarumallerkarci. Nuussirpak uyaqurpecen̄un tut'arkaurtuq.

³⁰“‘Nuussirpak caquanun qungaciu! Cuqciiqamci piliaqumallerpeci nuniini, nunami yuurrvillerpecen̄i.

³¹Qenertelqa kurpalriatun kenertun elpegnariluku elpecen̄un tuc'eciiqaqa. Tunciqamci-llu nangcitulinun yugnun, piunririnermek elisngalrianun.

³²Piunriumaciquci muriusngaluci kenermun. Nakmiin nunavcen̄i augci kuvumaciquq, kia-llu yuum umyuaqenqiggngaunaci. Wiinga, ATANEQ tuaten qanertua.’”