Read Yupik Ezekiel 22 Bible Online

Ezekiel 22 - Yupik bible

Ezekiel 22

¹Waten cali ATANREM qanrutaanga,

²“Tuquarkaulriami yugmi, upingariuten-qaa cuqtellerkaanun nunarpak tuqutarayulinek yul'ek? Kitaki taringevkarki pellernarqellriit caliallri.

³Waten qanqina, Waten qanertuq ATANEQ Agayun: Tuqurqellruavki amlleret nakmiin yut'en, elpenek-llu menuurrluten agayutnguanun agayulallerpegun, pillerkan agiirtuq.

⁴Tuqurqillerpegun pinarqelriarurcavet, menuurrluten tuaten elpenek agayutngualiarpegun, pillerkiuran erneq tekitarkaulleq maa-i tekituq! Taumek wiinga caukenrirceskemken atanruvignun, nunanun-llu tamalkuitnun temciarautngurtelluten.

⁵Nunat canimelnguut yaaqsilriit-llu picingssautek'larciqaatgen assiilucin pitekluku.

⁶Tamarmeng Israel-aam atanirturtain cacetuqutekngamegteggu pinirteng tuqucilartut.

⁷Nunarpagni uitalriani angayuqaci takaqenritaci. Teglegilaraci allanret, aipainret-llu elliraat-llu piyunalitekluki elluarrluki piksaitaqluki.

⁸Qigcignarqellriit qigcikenritaci, Sabbath-aaq-llu atuyuunaku.

⁹Ilavci-llu yuullguteteng iqluurutekluki tuqucetengnaq'larait. Ilaci-llu ner'aqluteng agayutnguanun elliitekumallernek. Ilavci tuaten aglumallerteng aturluku assiilnguliuraqluteng.

¹⁰Ilaita-llu atameng nulirrit tutgaqluki, ilaita-llu tuaten arnat qessangraata akusrarutekaqluki agelrumangraata.

¹¹Ilaita tuaten akusrarutekluki nunalgutmeng nulirrit, ilaita-llu ukurrateng, ilaita-llu alqateng, atameng paniit.

¹²Ilaci tuaten akilirtelluteng yugnek tuquciaqluteng. Ilaci-llu navriskengaqameng ilangurtelluki pilarait akilirinatkaatnun, tukuurtaqluteng ilameggnek usviilqik'ngellermegteggun. Nalluyagutarpecia.” ATANEQ Agayun qanertuq.

¹³“Tengluugemkun arulairceciiqanka tegliullerci tuqucillerci-llu.

¹⁴Taqkumci-qaa cali cacetunayukluci umyuartequci wall'u piningqerrnayukluci unaceci nalugyugngaluki? Wiinga, ATANEQ, Agayun qanertua, qanelqa pinricen̄ayuitaqa.

¹⁵Cekavciiqamci atanruvignun nunanun-llu assiitellriit-llu caliaci arulairtelluki.

¹⁶Wiinga-llu atanruviit caunrilkeciqaatnga elpeciuggun, tau͡gaam elpeci nallunritarkaugarci wiinga ATANRUCIQA.”

¹⁷ATANREM qanrutaanga,

¹⁸“Tuquarkaulriami yugmi, Israel-aam yui wangni cakarniirutut. Cakarniilngurtun ayuqliriut cavigtun, punerneruli, qerriryauli, caviuli, imarkauli, unegtaullertun qerrirliq avurrluirumarraartelluku kaminiarpagkun.

¹⁹Taumek waten qanertuq, ATANEQ Agayun: Tamakucetun cakarniirucavci quyurciiqamci tamarpeci Jerusalem-aamun

²⁰ekluci-llu kaminiarpagmun avurrluirissuutmun qerrirlimek, punernermek, cavigmek, imarkamek, qerriryagmek ek'ilauciicetun. Tuani eq'urtellma tuknitacian urugciqai, kenrem urugcecilauciatun cavigmek.

²¹Quyurciiqamci, tuani-llu eq'urtetacimtun kenermek kumarciciqua acivciuggun urugtelluci.

²²Qerrirliq urugcimalauciatun kaminiarpagkun, tuaten-llu elpeci pimaarkauguci; nallunrirniarci eq'uqengqalua tuaten pillruciqa elpecen̄un.”

²³Waten cali ATANREM qanrutaanga,

²⁴“Tuquarkaulriami yugmi, Qanruski Israel-aam yui nuniit menuulriaruniluku, wangnun-llu anucimirqecetaararkauniluku qenerrlua.

²⁵Ciuliqagtait yugtutulitun uirraniluteng pitameggnek allgurilriatun ayuqut. Tuquciaqluteng yugnek, tegulaulluteng tuaten akinek akitulrianek-llu qununarqellrianek. Tuqucillermegteggun tuaten arnat aipainrurcetaqluki.

²⁶Agayulirten͞gunge'rmeng atunrirait alerquutenka qigcignarqelriit-llu qigcikenrirluki. Nallunairciiganaki cat qigcignarquciit cat-llu qigcignailuciit. Elitnaurinanrirluteng-llu nallunrirtelluki menuulriit menuilnguut-llu, Sabbath-aaq-llu catkenrirluku. Taumek Israel-aam yuin wiinga qigcikenriqiitnga.

²⁷Atanerruarit keglunertun ayuqliriut pitameggnek allgurilriatun. Tuquciaqluteng tuaten tukuurtellerkarteng pitekluku.

²⁸Prophet-aatrita-llu makut assiilngillrit iirumalarait yuum qacarnermek mingugilauciatun tangnerrlugnarqellra patuluku. Piciunrilngurnek tangrruaraqluteng, iqluquluteng-llu ciunerkamek qalartaqluteng. Qanraqluteng-llu camek ATANERMUN qanelqen̄iluku, tau͡gken wiinga, ATANEQ, ellaitnun camek qaneqsaunii.

²⁹Nunam tamatum yuin ilateng teglegilarait, tegliuryugluteng tuaten; nangcilartut arrsaulrianek nuuqitellrianek-llu, allanret tuaten usviilqingnaqluki.

³⁰Yuaryaaqua kitumek qacarnermek naparciarkamek, nangengqaarkamek qacarnerem imumallrani ingluliurulluku-llu nuna qenerrlua nuniit piunriqataqumku, tau͡gaam atauciungraan nalaqutenritua.

³¹Taumek wiinga qenrutarkaureskenka, kenertun-llu piunrirarkauluki caliarit pitekluki.” ATANEQ Agayun waten qanertuq.