Read Yupik Ezekiel 23 Bible Online

Ezekiel 23 - Yupik bible

Ezekiel 23

²“Tuquarkaulriami yugmi, cat iliitni alqaqelriignek yugtangqellruuq.

³Egypt-aami ayagyuarlutek uitallermegni anguciullrulliniuk akissuurrlutek-llu.

⁴Ciuqlia atengqerrluni Oholah-mek[12] (una Samaria-ruuq), nayagaa-llu aterluni Oholibah[13] (una Jerusalem-aaruuq). Nuliqsagutellruagka tamarkenka, irnianglua-llu elkegnegun.

⁵Oholah nulirqengramni akissuugurallruuq, arenqianaki pissiyaagaqluki angutet kenkuurten̄i Assyrian-aat,

⁶anguyagtet qesurlinek aturalget, yuut piuranrit, quyilriit-llu atanerruat, tamarmeng aglumanaqluteng ayagyuaruluteng, horse-aatgun ayagatulit.

⁷Akissurtuq tamakunek Asyrian-aam anguyagtain atanerruaritnek, anguciuryullran-llu menuurtelluku, agayulangluni-llu tamakut agayutaitnun.

⁸Egypt-aami akissuullni arulairutevkenaku ayuquciqaa. Nasaurluullranek ayagluku angutet arnaq'laraat akissutun pitarrluku.

⁹Taumek wiinga tunellrukeka Assyrian-aanun arnaqestainun elliin aglumakek'ngainun.

¹⁰Taukut-llu matarqellruat cairulluku, irniari-llu tegurraarluki tuqutellruat nuussirpagkun. Arnat-llu tamiini qannguarutkelallruat qaillun ayuqellriakun tuqullra.

¹¹“Kinguqlian Oholibah-m tangvallruyaaqaa alqani, tau͡gaam elliini arcaqanruluni akissuuyaraq atullrua.

¹²Elliin-llu cali aglumakellruluki Assyrian-aat yuut piuranrit, atanerruat-llu anguyagtet aturaqegcilriit, anguyagtet-llu horse-aatgun pitulit atanerruarit, taukut tamarmeng ayagyuarluteng kenegnarluteng.

¹³Tangvallemni-llu arenqianani inerciigatuq, alqermini cangallruvkenani.

¹⁴“Arcariinartuq-llu ayuqucimikun. Tangllermini-llu Babylonian-aat atanerruat tarenraitnek qacarnermi minguumaluteng kavickellriamek, naqugcimaluteng 'lumarrarmek, qamiqurrit-llu cali 'lumarrarmek nemerluteng umyuamikun ayarikai.

¹⁵

¹⁶Tangrrucimitun aglumai, ayagceciuq-llu kevgamek taukunun Babylonia-mi qaneryartulriamek.

¹⁷Babylonian-aat-llu ullagluku akusrarutekaat. Anagulluteng akusrarutekngatni menuurrluku-llu taqsuqararutai.

¹⁸Matarmi tangercet'lartuq yugnun akissuucini nallunriisqelluku, wiinga-llu cali taqsuqulluku alqaa pillrucimtun.

¹⁹Nutaan akissuullni cumigut'ngaa, nasaurluuluni Egypt-aami akissuullermini ayuqucini ayuquciqsagulluku.

²⁰Aglumakluki angutet akusrarutekillermeggni camircesciigalnguut ungungssitun ciulvagtun nulirtetun nulirtellrata nalliini wall'u horse-aat angucaluacetun.”

²¹Oholibah, nasaurluuluten ayuqucillren Egypt-aami cali aturyugyaaqan, angutnun aamagken naanguaqevkarlukek, akusrarutekevkarluten tuaten.

²²Taumek, Oholibah, Waten ATANEQ Agayun qanertuq, “Taqsuqutaten angutet akusrarutekesteten, tau͡gaam wiinga ellaitnun qenruceciiqamken taivkarluki-llu avatairtelluten.

²³Taivkarciqanka Babylonian-aat Chaldean-aat-llu, angutet-llu Pekod-amek Shoa-mek Koa-mek-llu, tamalkuita-llu Assyrian-aat. Quyurciiqanka-llu tamalkuita kenegnarqelriit yun'erraat yuut piuranrit, atanerruat, tamalkuita-llu pirpakumalriit atanerruat, quyilriit-llu horse-aatgun pitulriit atanerruarit.

²⁴Taukut-llu curugciqaatgen neglirnermek, anguyagterugarnek maligluteng ayagassuutnek akalrialget, cali akalrialget aklumeng ayagatestait. Akngircailkuterluteng capkutanek nacanek-llu, kassuguciiqaatgen-llu. Wiinga-llu ellaitnun tunciqamken, ellaita-llu cuqciiqaatgen alerquuteteng aturluki.

²⁵Wiinga qenrucamken, ellaitnun caliaqevkarciqamken ellaita qenertellrat aturluku. Qengan ciutegken-llu kepciqait, irniaten-llu tuqulluki. Aa-ang, teguciqait qetunraten paniten-llu unguvaita-llu ekuaciqait.

²⁶Aturaten allgurluki matarqeciqaatgen teggalquqegtaaraat-llu kenuguteten teguluki.

²⁷Aglumanrirceciiqamken inerciigalliqenrirtelluten-llu atulallerpenek Egypt-aami uitarraanerpenek. Agayutnguanun caumanqiggngaituten Egypt-aaq-llu umyuaqenqiggngaunaku.”

²⁸Waten ATANEQ Agayun qanertuq, “Tunciqamken yugnun eq'ukekevnun taqsuquskengarpenun.

²⁹Eq'ukngamegteggen-llu caliarpegun unakelalten tamalkuita teguciqait matarpet-llu unilluten, matangqaluten akissutun. Aglumayullerpet akissuullerpet-llu

³⁰tuaten ayuqlirivkaraaten. Akissuullruavet atanruvigni menuulriarurrluten-llu agayutnguaritgun.

³¹Alqerpet ayuqucillrakun ayallruuten, taumek wiinga elliin saskallranek anucimirqecetaarutmek imalegmek cikirciqkemken mer'esqelluku.”

³²ATANEQ Agayun qanertuq, “Alqerpet saskaanek merciquten; ang'uq ilutuluni-llu. Yuut tamarmeng temciarautekciqaatgen caunrilkuurluten-llu; saskaq muirumauq.

³³Taangiqciquten angniitnam-llu imirciqaaten, taum saskam alingmek piunrirnarqellriamek-llu imalgem, alqerpet Samaria-m saskaa.

³⁴Mer'arkaugan nangluku, saskam-llu navenrinek aamagken kilirturciqagken. Wiinga, ATANEQ Agayun qanertua.”

³⁵Waniwa taumek ATANEQ Agayun waten qanelria; “Nalluyagucavnga tunullua-llu, nangtequtekciqan aglumayullren akissuullren-llu piteklukek.”

³⁶ATANREM qanrutaanga, “Tuquarkaulriami yugmi, upingariuten-qaa cuqtellerkaagnek Oholah-nkuk Oholibah-llu? Kitak qanruskek pellernarqellrianek aturyullregkegnek.

³⁷Akusrarutekevkallruuk tuqucilutek tuaten, akusrarutekilutek agayutnguanek tuqulluki tuaten elliitekluki tamakunun neqkesqelluki qetunraanka elkenka irnilkek. Elliitekaqluki ekuavkarluki qetunranka agayutnguamegnun.

³⁸Tuaten-llu kiingan pivkenatek, tau͡gaam cali menuurtaak Agayuvigpaka Sabbath-aaq-llu aturpek'naku elkartelqa.

³⁹Tuani-llu ernermi tuqurqillermegni irniamegnek elliitekluki agayutnguamegnun itellruak Agayuvigpaka menulirluku!

⁴⁰“Kiituani-llu kelgilanguk yaaqvarmiunek angutnek ayagceciaqlutek kelgilrianek, tamakut-llu kelelkek taigaqluteng. Taukuk-llu alqaqellriik kenugtelartuk ervuqerlutek kenugutnek-llu all'utek, iitek tuaten mingugluki.

⁴¹Aqumelartuk tangnirqelriignun aqumllerpiignun, estuulumek ciuqaqlilirlutek, qainganun assilrianek elliilutek, ilaluki aruviarnek olive-aat-llu uquatnek wiinga cikiuteklemnek.

⁴²Camek nagutailnguut yuut eriniit niitnarquq, angutet kelgumallret mertailngurmek yuilqumek. Taukut-llu angutet arnat tallirirait tangnirqellrianek-llu qamiqurrit nasqerrucirluki.

⁴³Umyuamkun-llu qanertua, arnaq akissurcetaak taqsuqellria akusrarutekevkallminek.

⁴⁴Taukuk-llu akissuk Oholah-nkuk Oholibah-llu ullanqigtaaragket, arnak kasnguyullerkamegnek nallulriik.

⁴⁵Ellualriit angutet pinarqelriaruniciqakek akusrarutekevkallragnegun tuqucillragnegun-llu. Tua-i-wa akusrarutekevkalallruagnek unatekek-llu augmek meciumalriatun ayuqngata.”

⁴⁶Waten qanertuq ATANEQ Agayun, “Taivkarici elkegnun yugugarnek alingnarqelrianek, alingcira'artekakegnek teglegistekakegnek-llu.

⁴⁷Taukunun-llu yugugarnun teggalqunek miluquvkarlukek nuussirpalegnun-llu curugtellukek, tuquqluki irniakek, eniik-llu ekuavkarluki.

⁴⁸Tuaten pilua iqukliceciiqaqa akusrarrluteng yuullrat nunami tamalkuan, aarcirtuutnguvkarluku arnanun akusrarutekevkanriisqelluki ayuqucillragcetun.

⁴⁹Elpetek-llu kinguqliqelriigni, anguciurlutek yuullruavtek agayutnguanun-llu agayuaqlutek anucimirqecetaarciqamtek. Nallunrirniartek wiinga, ATANRUCIQA Agayutngulua.”