Read Yupik Ezekiel 24 Bible Online

Ezekiel 24 - Yupik bible

Ezekiel 24

¹Allrakut qulngunritariitni iralut qulngurutiitni, erenret nunamten̄ek ayagcecimarraanemten̄ek, ATANREM waten qanrutaanga,

²“Tuquarkaulriami yugmi, igausgu unuamek erenrem caucia, tua-i-wa man'a erneq Babylonia-rmiut angayuqrata Jerusalem-aamek anguyallran ayagnilleqngaku.

³Qanrutniaten ukut ingluliculriit yuut mat'umek ayuqestassiigutmek. Waten qanertuq ATANEQ Agayun: “Egan maniciu kenermun mermek-llu imirluku.

⁴Kemget assinkacagiitnek ugkirluku kemganek keggasgem irum-llu picalqurrulrianek pukugkanek ilaluki.

⁵Qusngit assinkacagiita kemganek aturluci, egan-llu aciakun murirluku. Meq qallangevkarluku; qallaulluki kemget enret-llu.”

⁶Waten qanertuq ATANEQ Agayun: “Aarnarqellriamek ciunerkangqertut tuqutarayulit nunarpiit! Qalqiitun qallriumaksailngurtun egatetun ayuquq. Kemget egatem iluanek atauciugurluki anciki nangnatkaatnun.

⁷Tuqucilriartangqellruuq yugmek tuani nunarpagni, tau͡gaam auga kuvumavkenani nunamun urr'am patullerkaanun tangrruunrirluku; kuvumallruuq tau͡gaam alaicugngalriamun teggalqum qainganun.

⁸Wiinga eq'uqruteksugluku akinaurucimasqelluku-llu tuavet alailngurmun auk pivkallruaqa.”

⁹Taumek cali waten qanertuq ATANEQ Agayun, “Tuqutarayulit nunarpiit aarnarqellriamek ciunerkangqertuq! Wiinga wangnek muragnek amllernek murirciqaqa.

¹⁰Murirraarluku kumarrluku qallauciki kemget uunqegcaartelluki meriutnatkaatnun, enret-llu ekuavkarluki!

¹¹Nutaan-llu egan tauna punerneq elliluku imaunaku kangipluut kumalriit qaingatnun kenrurtelluku. Ataam uqlallra carriutniartuq qallriulluni-llu,

¹²mamtulria qallellra kenrem tamalkuan catairucetenrilengraaku.

¹³Jerusalem-aaq, elluanrilnguut caliarpet menuurtellruatgen. Carrillrungramken menuirutellrunrituten. Waniwa ataam carriumangairututen naspepailegpegu eq'uqertellma tuknitacia.

¹⁴Wiinga, ATANEQ, tuaten qanertua; piciurciiquq, tuaten piarkaugua; pinricen̄arngaitua; takumcuyugngaitua; umyualinqiggngaunii-llu. Wiinga anucimirqecetaarciqamken caliallerpet pitatiinek.” Waten qanertuq ATANEQ Agayun.

¹⁵ATANREM cali waten qanrutaanga,

¹⁶“Tuquarkaulriami yugmi, ataucirqumek kaugturluku ilukegcitek'ngan au͡g'aqatarqa elpenek. Tau͡gaam qiagarkaunrituten tuquillercetun, aluviigken-llu qurrlurcecaqunakek.

¹⁷Niicecaqunak qialuten. Nacaunak kamilarpet-llu piyuayaqunak tuquillercetun. Kegginan-llu patuvkenaku nerevkenak-llu tuquillret nertukaitnek.”

¹⁸Unuakumi yuut qalarutellruanka. Taum-llu atakuani aipaqa yuunrirluni. Ertenqigcan unuaquani wiinga pisqumacimtun pillruunga.

¹⁹Yuut-llu aptaatnga, “Nalqigusngaitarpekut-qaa makut cauciitnek, ciin tuaten picirpenek?”

²⁰Wiinga-llu qanrutanka, “ATANREM qanrutellruanga,

²¹elpeci, Israel-aam yuini, waten qanrutesqelluci: Ucuryagutek'lararci Agayuvigpiim pinia, tangvagyunqelararci-llu ullagyunqeggluku-llu, tau͡gaam ATANREM menuurcetqataraa. Ilakuralriani-llu ilaci ayagyuat unegtaullret Jerusalem-aamun anguyagkun tuqucimaarkauluteng.

²²Elpeci-llu wangtun piciquci. Kegginaci patungaunaki, nerngaunaci-llu tuquillret nertukaitnek.

²³Nacaunaci kamilarpeci-llu piarkaunrituci cali-llu tuquilriit atutukait aturngaunaku qiangaunaci-llu. Assiilngurpeci cirlaurcetarkaugaiceci, yuuniaratarkauluci-llu atunem.

²⁴Wiinga-llu Ezekiel-aaq nallunailkutaurciiqua elpecen̄un; wiinga atullrenka aturciqngavciki. ATANEQ-llu qanerluni, tuaten pikuvci nallunrirciqniluku elpecen̄un ATANRUCINI Agayutngucini-llu.”

²⁵ATANEQ qanertuq, “Tuquarkaulriami yugmi, teguiciqanka piniutekellratnek Agayuvigpagmek nunaniryuutekluku ucuryagutek'lallratnek, tangvagyunqekiitnek ullagyunqeggluku-llu. Cali-llu teguiciqanka qetunraitnek paniitnek-llu.

²⁶Tuani ernermi man'a pikumku iliit qimagaulriit piunriumalriamek taiciquq makunek-llu qanrucarturluci.

²⁷Cali tuani ernermi qanerciigaqaarluten qaneryugngariciquten, taukut-llu qanellgutkiciqaten. Mat'ukun nallunailkutauciquci yugnun, ellaita-llu nallunrirarkauluku wiinga ATANRUCIQA.”