Read Yupik Ezekiel 25 Bible Online

Ezekiel 25 - Yupik bible

Ezekiel 25

¹ATANREM qanrutaanga,

²“Tuquarkaulriami yugmi, akeqnerrlugesgu Ammon-aam nunii.

³Qanrusgu niicugnisqelluku wiinga ATANEQ Agayun qanllemnek: Quyallruuten Agayuvigpaka menuurcimallrani, nuniit-llu Israel-aam yuin navguumallrani, tangllerpeni-llu Judah-m yui nunameggnek ayaucimallratni.

⁴Quyallruavet calaralirnermek nunamek mertailngurmek yugnun cirlakevkarciqamken. Nunavcen̄i uitavigkiurluteng tamakumiungurciiqut. Ner'aqluki atsat milget-llu elpeci pikaqsaaqelci.

⁵Nunarpak-llu Rabbah uitavigkaurceciiqaqa ungungssinun qulugnelegnun, Ammon-aam-llu nunii tamalkuan uitavigkaurtelluku qusnginun, nallunriisqelluku elpenun wiinga ATANRUCIQA.

⁶“Waten cali ATANEQ Agayun qanertuq: Unateci kacguurucavciki qecgaurluci tuaten nunaniryugluci umyuarrliqulluku nuniit Israel-aam yuin,

⁷taumek tuaten piavci, allanun atanruvignun tunciqamci tegliuresqelluki elpecen̄ek uayarluci tuaten. Piunriqapigciiqngamci atanruviusciigaliciquci nakmiin-llu nunairulluci. Nutaan-llu nallunrirciqerci wiinga ATANRUCIQA.”

⁸Waten qanertuq ATANEQ Agayun: “Moab-aq qanran waten, Judah-m yui allatun atanruvigtun ayuqut,

⁹nunarpiit Moab-am cayailkutai nunautiin engeliinelnguut anguyagceciiqanka, nunarpakegtaarait ukut tapqulluki: Beth-aq, Jeshimoth-aq, Baal Meon-aq, Kiriathaim-aaq-llu.

¹⁰Calaralirnermi-llu nunami mertailngurmi uitalrianun yugnun cirlakevkarciqaqa Moab-aq, Ammon-aamun tapqutelluku, Moab-aq atanruviungairutelluku.

¹¹Anucimirqecetaarciqaqa Moab-aq, nallunriisqelluku ellaitnun wiinga ATANRUCIQA.”

¹²“Waten qanertuq ATANEQ Agayun: Edom-aam yuin aaqevkenaku akinauratgu Judah, tuaten akinaullrata pinarqellriarurtaa Edom-aaq.

¹³Wani-wa qanertua anucimirqecetaararkauniluku Edom-aaq tuquqluki tamalkuita angutet ungungssiaraat-llu tamaani uitalriit. Yuiruceciiqaqa-llu, nunarpiinek Teman-aam ayagluku nunarpak Dedan-aam nunarpii tekilluku, yuut-llu anguyagkun tuqucimaciqluteng.

¹⁴Akinauruceciiqua yumnun Israel-aam yuinun, Edom-aam-llu naspececiiqaa eq'uqertellma tuknitacia. Akinaurillma-llu qaillun tuknitacia nallunrirciqaa, qanertuq ATANEQ Agayun.”

¹⁵Waten cali ATANEQ Agayun qanertuq, “Philistine-at-llu cali aaqevkenaki akinauratki ak'anek ayagluteng inglukesteteng, eq'ukluki-llu piunrirluki.

¹⁶Taumek wiinga qanertua anguyagarkaukenka Philistine-at tuquqluki-llu nangluki. Piunrirluki tamalkuita unguvalriit Philistine-at nuniitni.

¹⁷Mulngakevkenaki akinaurluki anucimirqecetaarciqanka. Eq'urtelqa naspeciiqaat. Nutaan-llu nallunrirluku wiinga ATANRUCIQA.”