Read Yupik Ezekiel 26 Bible Online

Ezekiel 26 - Yupik bible

Ezekiel 26

¹Qula ataucimek cipnengqerluki iralut, iralum ciuqliatni erenrin, ayaucimarraanemten̄ek nunamten̄ek, ATANREM waten qanrutaanga:

²“Tuquarkaulriami yugmi, nunarpiim Tyre-am yui uumek ucuryagucirtut. Qayagpagaluteng, ‘Jerusalem-aaq navguumauq! Tun'ilallmikun akingengnaqesciigaliluni! Inglulirciigaliakut!’”

³Taumek ATANEQ Agayun waten qanelria: “Tyre-aq, ingluksagutamken. Atanruvignun amllernun anguyagceciiqamken, taiciqut-llu imarpiim qairitun tagauskaitun.

⁴Navgurciqait qacarneri Tyre-am imerqelluki-llu qertulriit nayurviit. Nunii-llu keligciqaqa teggalqurrlainaq alairtelluku.

⁵Tyre-am nunallra qikertaurciiquq, kuvyastet-llu kuvyateng tuani kinercilarciqait. Wiinga, ATANEQ, tuaten qanertua. Atanruviit-llu uayaararkaugaat,

⁶nunat-llu cali cen̄amelnguut yuit tuqurqeciqait nuussirpagkun. Nutaan Tyre-am nallunrirciqaa wiinga, ATANRUCIQA.”

⁷ATANEQ Agayun waten qanran, “Angayuqat piunrat, Nebuchadnezzar-aaq Babylonia-m angayuqra, taivkarciqaqa anguyaasqelluku Tyre-aq. Neglirnermek taiciquq anguyagterugarnek maligluni horse-aalegnek, akalrialegnek-llu ayagassuutelget.

⁸Nunani-llu imarpiim cen̄iini nunalget tuqurqeciqai nuussirpagkun; elagciquq ilutulriamek avatairluten, nuna-llu qerturiluku pililuni, pengegnailngurmek-llu capkutanek qacarneliluni inglukluten.

⁹Nunarpagpeci qacarneri tugaurciqai muragpagmek caskirluteng, nayurvici-llu qertulriit imeqluki cavignek caskirluteng.

¹⁰Horse-aarin amlleqapigciiqngameng urr'am peksagtellrata patuciqaiceci, nepiita-llu horse-aalget, akalrialget-llu ekumassuutet, nunarpagmun piunrillermun itquni arulavkarciqait enevci qacarnerit.

¹¹Horse-aami cetumqurritgun tumyaraten tamalkuita tutmarciqai, tuqurqeciqai yut'en nuussirpagkun. Cayunailnguut-llu naparyaten iqucimaciqut nunamun.

¹²Tukuuteci akluci-llu piksaguciiqait; imerqeciqai qacarneten enekegtaaraci; teggalqut, muriit, imerqumalriit-llu quyurrluki egciiqait imarpigmun.

¹³Arulairciiqanka aturcetaarit yuarutevcen̄ek, lyre-at-llu aturcetaaci niitnaunqiggngaunateng.

¹⁴Qiururceciiqamken; neqsurtet kuvyameggnek kinerciriviksagulluku; ataam naucimangiggngaituten. Wiinga, ATANEQ Agayun qanertua.”

¹⁵ATANEQ Agayun waten qanerkangqertuq Tyre-amun: “Cirlakumallerpeni, yuut imarpiim cen̄iini nunalget cakneq alingeciqut niilluki aarpagallrit tuqurqek'ngaita.

¹⁶Atanruviit-llu imarpiliutulinek yulget angayuqrit atanruvimeggnek aqumllernek atrarciqut. Ulikutateng aturateng-llu qaraliliumalriit yuuciqait nunamun-llu aqumeciqut uuleggluteng. Alingem-llu ugaani waten pimallerpenek qiivenrirciigatarkauluteng.

¹⁷Mat'umek-llu tungmagcissuutmek atuuciiqaiceci: “Nunarpak nanraumalleq piunrirtuq! Sun'arpai imarpigmek kagimaluteng. Nunarpiim uum yuin ataniumallruyaaqaat imarpik Imarpiim cen̄iini nunalget alingciqu'urtelluki.

¹⁸Waniwa, nunarpak piunrirraanranek, Qikertat uulegtut, Yuit-llu ukverciigatut waten pitalriakun piunriumallranek.”

¹⁹ATANEQ Agayun qanertuq: “Nunauyunairuceciiqamken, imumalriatun nunarpagtun yuilngurtun. Imarpiim-llu mer'anun naligtelluten.

²⁰Ayagceciiqamken camavet tuqumalriit nuniitnun ilaliryarturtelluki ak'a yuullret. Camani uitavkarciqamken nangyuilnguut imenret nuniitnun, yuut tuqumalriit ilagarluki. Yuum uitavikenqiggngaitaaten unguvalriit-llu nuniitni uitanqiggngaunak.

²¹Alingnarqelriamun cuqyutngurceciiqamken piunqiggngairutelluten. Yuut yualarciqsaaqaatgen, tau͡gaam nalaqumanqiggngaituten.” Waten qanertuq ATANEQ Agayun.