Read Yupik Ezekiel 28 Bible Online

Ezekiel 28 - Yupik bible

Ezekiel 28

¹ATANREM qanrutaanga.

²“Tuquarkaulriami yugmi, Tyre-am atanirturtii waten qanrusgu, ATANEQ Agayun waten qanertuq: Ucuryaggluten qanertuten agayutnguniluten, agayucetun-llu aqumganiluten atanruvigmi aqumllermi imarpiim qukaani. Tau͡gken elpet agayutnguvkenak, yuuluten tau͡gaam, agayucetun-llu umyuartutayuk'ngerpet,

³umyuartequten umyuartunruyukluten Daniel-aami;[14] nallunarqengraata-llu nallunriryugngaluki.

⁴Umyuartullren elluatuullren-llu aturlukek tukuurtellruuten, quyurcillruuten suulutaamek qerrirlimek-llu akivigpenun.

⁵Akingengnaqutevgun-llu piluaqarallerpegun tukuuteten ulevkarluki, tukuurcavet-llu umyuan quyigiluni ucuryagtengluten-llu.

⁶“Taumek waten qanertuq ATANEQ Agayun: Umyuarteqngavet Agayucetun umyuartutayukluten,

⁷ulagceciiqamken takumcukevkenak curugtekarpenun. Piunrirciqait qununarqellriit piksagutelten umyuartullren elluatuullren-llu aturluku.

⁸Tuquciiqaatgen mermi tungmagcimaarkaurtelluten.

⁹Agayutnguniluten-qaa cali qanerciquten tuqutestekarpet ullakatgen? Yuunginaungavet agayutnguvkenak, tuaten ayuqeciquten tuqutestekarpet tegukatgen.

¹⁰Allanret agayutailnguut tuquciiqaatgen qimugtetun pitarrluten. Wiinga ATANEQ Agayun waten qanertua.”

¹¹Cali waten ATANREM qanrutaanga.

¹²“Tuquarkaulriami yugmi, angniilutkiu aarnarqelria tekitarkaa Tyre-am angayuqran, qanrulluku, Waten qanertuq ATANEQ Agayun: Canganarqutaicaramun cuqngullruyaaquten. Umyuartuqapiggluten kenegnarluten-llu!

¹³Agayutem naucetaarviani Eden-aami uitaluten, aturaqluten teggalquqegtaarnek ayuqenrilngurnek, makunek maa-i: ruby-nek, diamond-aanek; topaz-aanek, beryl-aanek, carnelian-aanek, jasper-aanek, sapphire-aanek, emerald-aanek, garnet-aanek-llu. Tangnircautengqerrluten suulutaanek. Tamakut piliaqumallruluteng elpenun pikesqelluki tuani ernermi piliaqumallerpeni.

¹⁴Nayurtekarpenek-llu pillruamken uluryanarqellriamek an'gilamek. Uitavikellruan-llu tanqilria ingriqa piyuagaqluten teggalquqegtaaraat akunliitgun.

¹⁵Piliaqumarraanerpenek ayagluni ayuqucin canganarqutaitellruuq assiilngurmek atullren engelkarrluku.

¹⁶Yagarcepallagluten tuneniarluten kipulluten tuaten, qenngariavet assiilngirtuten. Taumek wiinga ayagceskemken ingrimnek tanqilriamek, elluanrilngurtun pitarrluten, nayurteklerpet-llu an'gilam ayagtelluten teggalquqegtaaraat akuliitnek.

¹⁷Kenegnallerpet umyuan quyigivkaraa, niitnaullerpet-llu usviilngurtun ayuqlirivkarluten. Tamana pitekluku nunamun egtellruamken aarcirtuutngusqelluku allanun angayuqanun.

¹⁸Assiilngurkun kipurqellerpet tun'illerpet-llu menuurcetaa agayularvici. Taumek wiinga nunarpak ekuavkallrukeka nangkacagarluku. Maa-i tangertevvet tangrraatgen qamlleruluten.

¹⁹Tamarmeng-llu yuut nallunritesteten irriut tangerrluku irranarqellriakun piunrillren, piunqiggngairulluten akwarpak.”

²⁰ATANREM qanrutaanga,

²¹“Tuquarkaulriami yugmi, aniqlaagiu nunarpak Sidon-aaq.

²²Tuanelnguut yuut qanruski, wiinga, ATANEQ Agayun, ellait piluki qanllemnek: Sidon-aaq, wiinga inglukestekarpenga; yuut nanrarciqaatnga elpenun pilqa pitekluku. Nallunrirciqaat-llu wiinga ATANRUCIQA, tanqilriaruciqa nasvakumku anucimirqecetaallemkun elpeni uitalriit.

²³Cangerliit tuc'eciiqanka elpenun tumyaraten-llu augmek qurrlurtelluki. Anguyiit kassuguciiqaatgen, yut'en-llu tuqurqelluki. Tuani-llu nallunrirciqan wiinga ATANRUCIQA.”

²⁴ATANEQ qanertuq, “Israel-aam yuin avaqliit nakukestek'lallrit cukilanatun akngirnarqenqiggngaitut Israel-aam yuinun. Ellaita-llu nallunrirarkauluku wiinga ATANRUCIQA Agayutngulua.”

²⁵Waten qanertuq ATANEQ Agayun: “Israel-aam yui uterceskumki cekavcetlemnek atanruvignek, atanruviit tamakut nallunrirciqaat tanqilriaruciqa. Israel-aam-llu yui uitaarkauluteng nakmiin nunameggni, cikiuteklemni pistemnun Jacob-aamun.

²⁶Camek alingniurpek'nateng uitaciqut tuani. Eneliciqut naucetaarvililuteng-llu. Avaqliit-llu tamalkuita nakukestellrit anucimirqecetaarciqanka, Israel-aam-llu yui uitayugcaliluteng tamaani uitaciqut. Ellaita-llu nallunrirciqaat wiinga, ATANRUCIQA, ellaita Agayutiit.”