Read Yupik Ezekiel 29 Bible Online

Ezekiel 29 - Yupik bible

Ezekiel 29

¹Allrakut qulngurutiitni, iralut-llu qulngurutiit qula malrugnek cipluku ernengqerluku nunamten̄ek ayagcecimallerput, ATANREM waten qanrutaanga:

²“Tuquarkaulriami yugmi, aniqlaagiu Egypt-aam angayuqra. Qanrulluku-llu qaillun ellii, Egypt-aam-llu nunii tamalkuan, anucimirqecetaarumaarkaucianek;

³waten qanerluten, Waten qanertuq ATANEQ Agayun: Elpet, ciissirpak kuigmi uitalria, inglukesteksagutarpenga. Elpet qanertuten Nile-aq pikniluku piliaqellruavgu.

⁴Mananek agluqugpeggun kapuqvikqataramken, kuigpet-llu neqai nepucelluki qeltevnun. Kuigmek Nile-amek nugciiqamken nepingavikesteten tapqulluki.

⁵Eggluten-llu neqet tapqulluki yuilqumun mertailngurmun. Temen nunamun tuciiquq tungmagcimangaunani-llu. Ungungssinun yaqulegnun-llu cikiutekamken neqkaqesqelluten.

⁶Nutaan-llu Egypt-aam yuin nallunrirciqaat wiinga ATANRUCIQA.” ATANEQ qanertuq, “Israel-aam cacetuqutekellruaci elpeci Egyptian-aani ikayuqnaluci, tau͡gaam cangallrunrituci camlailngurtun muragatun.

⁷Iggaggvikellratgen navegtuten, kapluki unritgun, qukairtelluki-llu.

⁸Taumek waten qanertuq ATANEQ Agayun: Anguyagceciiqamken anguyagten̄un nuussirpalegnun, tuqurqerkaugait-llu yut'en ungungssiuteten-llu.

⁹Egypt-aam-llu nunii yuirutarkauguq nunakarniirulluni-llu. Nutaan-llu nallunrirciqaat wiinga ATANRUCIQA. “Tua-i-wa elpet qanellruavet Nile-aq piliaqellruavgu pikniluku,

¹⁰Inglukarpenga, inglukaanga-llu Nile-am. Egypt-aaq tamalkuan yuiruceciiqaqa nunakarniirutelluku. Neglirnermi uitalriamek nunarpagmek Migdol-amek ayagluku nunarpagmun Aswan-aamun ungalalirnelngurmun, Ethiopia-m nuniin engelii tekilluku.

¹¹Yuk tamaagguirngaituq, ungungssiq-llu tamaagguirngaunani, yuinaagni malrugni (40) allrakuni yungqerrngailan.

¹²Egypt-aaq arcaqerluku nunakarniillrurciiqaqa, nunakarniilngurni nunani allani arcaqanruluku. Allrakuni-llu yuinaagni malrugni (40) nunarpai Egypt-aam imumaciqut, imumaluteng arcaqanruluteng allani nunarpagni. Cekavciiqanka-llu Egyptian-aat atanruvignun, avverqevkarluki nunanun ayuqenrilngurnun.”

¹³Waten qanertuq ATANEQ Agayun, “Allrakut yuinaak malruk (40) kinguagni Egyptian-aat quyurciiqanka yugnek cekavcimavillritnek,

¹⁴uitavkarluki-llu Egypt-aam ungalalirnerani, nutem uitavillratni. Tuani angevkenateng cirlauluteng angayuqauviuciqut,

¹⁵cirlaunruluteng angayuqauvigni tamalkuitni, atanirturisciigatarkauluteng-llu allanek atanruvignek. Aciqsigiciqngamki allat angayuqauviit unakuularngaitait piyullerteng atuusqelluku pingraiceteng.

¹⁶Israel-aam yuin cacetuqutekenqiggngaunaki ikayuusqelluteng ellaitnun. Egypt-aam waten pimallran Israel-aamun neq'angevkarciqaa alangqallrucirteng ellait cacetuquteklermegteki. Israel-aaq-llu nallunrirciquq wiinga, ATANEQ Agayutnguciqa.”

¹⁷Ayagcecimallerput nunamten̄ek allrakungellrani yuinaq malrunlegnek (27) cipluku, iralut ciuqliatni, taum-llu iralum erenrin ciuqliatni, ATANREM qanrutaanga.

¹⁸“Tuquarkaulriami yugmi, Angayuqam Nebuchadnezzar-aam, Babylonia-m angayuqran, anguyagaa Tyre-aq. Uqamailngurnek anguyagten̄i atmagcecateng qamiqurrit nanguggluteng nuyairutut tusait-llu nanguggluteng, tau͡gken tuaten ping'e'rmeng angayuqrata wall'u anguyagtain camek unangutkevkenaku Tyre-aq.

¹⁹Taumek waten qanertuq ATANEQ Agayun: Egypt-aaq cikiutekaqa Angayuqamun Nebuchadnezzar-aamun. Uayarciqaa tukuutai-llu tamalkuita ayauciiqai anguyagtem̄inun akiliutekluki.

²⁰Egypt-aamek cikiraqa akiliutekluku kevgiullranun wangnun, tua-i-wa anguyagtai calistekellruamki. Wiinga, ATANEQ Agayun qanertua.

²¹“Tamana tuaten pikan Israel-aam yui pinirivkarciqanka elpet-llu, Ezekiel-aaq, qalarceciiqamken tamalkuitnun niitelluten, nallunrirniaraat wiinga, ATANRUCIQA.”