Read Yupik Ezekiel 3 Bible Online

Ezekiel 3 - Yupik bible

Ezekiel 3

¹Cali qanrutaanga, “Tuquarkaulriami yugmi, neriu una kalikaq; nutaan-llu ayagluten qalarucarturluki Israel-aam yui.”

²Tua-i qanqa aitartaqa, cikiraanga-llu kalikarmek imgumalriamek neresqelluku.

³Qanerluni, “Tuquarkaulriami yugmi, neriu una kalikaq cikiuteka elpenun; aqsaqun imirru taumek.” Wiinga-llu ner'aqa; nerellra saarralarninaqluni evegtaat neqkauciicetun.

⁴Agayun-llu qanertuq, “Tuquarkaulriami yugmi, ullagluki Israel-aam yui qanruski qanrutkesqellemnek.

⁵Ayagcetqatanritamken yugnun allayugmek wall'u caperrnarqellriamek qaneryaralegnun, Israel-aam tau͡gaam yuinun.

⁶Ayagceskumken angelrianun atanruvignun nallunarqellriamek qaneryaralegnun, taringesciigalkevnun ellaita niicugniyaraatgen.

⁷Tau͡gaam Israel-aam yuin tengrutekluten niicugningaitaatgen; wang'ung'e'rma-llu niicugniyuumiilkiitnga; umyuarteng atuamegteggu ircaqumegteggun tuaten asvaunateng.

⁸Waniwa asvairuceciiqamken piqainaunrirtelluten-llu ellaicetun.

⁹Qiurtun pektayiirucetamken; diamond-aatun tegtariluten; aliksaqunaki, wall'u tangcurlagangraatgen caceskicaqunak, tua-i-wa inglulicukapigcata.”

¹⁰Cali waten Agayun qanertuq, “Tuquarkaulriami yugmi, tamalkuita elpenun qanerkanka ircaqurpenun qemageskiki, neq'akekiki-llu tamalkuita elpenun qanellrenka.

¹¹Nutaan-llu ayakina nunameggnek ayaucimallernun, yugpenun, qanrulluki-llu wiinga, Artuqailngurmi ATANERMI, qanruyutemnek ellaitnun, niillit wall'u niitenrillit.”

¹²Tua-llu Agayutem anerneran nalugaanga, niitua-llu tunumnek qastulriamek erinamek qanelriamek, “Nanraumali ucurnaa ATANREM qilagmi pakmani!”

¹³Niitanka yaqruit unguvalriit yaqiulriit ataucikun, akalriat-llu nepait, qastutaluteng nunam pektellratun.

¹⁴ATANREM-llu pinian tukniluni tutaanga, Anerneran-llu ayautellrania, umyuaqa assiituq qenerrlua tuaten;

¹⁵tekitanka-llu nunameggnek ayagcecimallret Tel Abib-ami, Kuigem Chebar-am canianelngurmi, tuani-llu uitalua ilagarluki ernerni malrunlegni, irr'ilua tangllemnek niitellemnek-llu.

¹⁶Erenret-llu malrunlegen kinguatni, ATANREM qaneryaraa taiguq wangnun:

¹⁷“Yugmi tuquarkaulriami, murilkesten͞gurtamken Israel-aam yuinun. Ellaitnun egmirtelarciqaten aarcirtuutet taitellrenka elpenun.

¹⁸Assiitellriamun yugmun qanquma, ‘Pinritevkenak tuquciquten,’ elpet-llu aarcirtunrilkuvgu umyualinqigcesqelluku unguvani anirturnaluku, tauna assiilngurtuumaluni tuquciquq; tua-i tuqullra tusngavkarciqaqa elpenun.

¹⁹Tau͡gken yuk assiitellria aarcirtuquvgu, umyualinqigtenrilkuni-llu assiilnguq atullerminek, wall'u assiitellrianek caliaminek, tuquciquq assiilngurtuumarmi; tau͡gaam elpenek anirtullruciquten.

²⁰“Tau͡gken cali, yuk ellualria tuigeskan elluaruciminek, assiilnguq-llu aturluku, wiinga-llu paallautekaanek elliikuma ciuqerranun, ellii tauna tuquciquq; elpet-llu aarcirtullrunrilavni assiilnguminun tuquciquq, ellualriit-llu caliallri umyuaqngaitanka; tua-i tuqullra tusngavkarciqaqa elpenun.

²¹Tau͡gken ellualria aarcirtuquvgu assiilngiisqevkenaku, elliin-llu assiilnguq atunrilkaku, unguvaciquq, aarcirtuutni ciuniuramiu; elpet-llu tua-i cali elpenek anirtullruciquten.”

²²ATANREM tuanlucian pinia elpegnarquq wangnun; qanrutaanga-llu, “Nangerrluten ayii kuignayugmun, tuani qalaruciiqamken.”

²³Tua-i nangerrlua ayagtua kuignayugmun; tuani-llu tangrraqa ucurnaa ATANREM, tangellrucimtun Kuigem Chebar-am caniani. Iquunga palurma nunamun.

²⁴Tau͡gaam Anerneq itertuq wangnun, nangerrlua-llu. ATANEQ qanertuq wangnun, “Uterten kingunerpenun paluyulluten-llu enem iluanun.

²⁵Tuquarkaulriami yugmi, qillerqumaciquten ilavkugnek, anesciiganak ilagarciiganaki yut'en;

²⁶alunguten nalavkarciqaqa qalarcesciigaciiquten-llu aarcirturciiganaki ukut inglulicukapigtellriit yuut.

²⁷Tau͡gaam qalarutenqigeskumken qalarcaurcetenqiggluten-llu, qanruciiqaten, Waten qanertuq ATANEQ Agayun wii, Artuqailngurmi ATANERMI, qanllemnek. ‘Waten qanertuq ATANEQ Agayun’; niitarkaulria, niilli; niicuumiilnguq-llu, niitenrilli; tua-i-wa inglulicukapigcameng.”