Read Yupik Ezekiel 30 Bible Online

Ezekiel 30 - Yupik bible

Ezekiel 30

¹ATANREM cali qanrutaanga:

²“Tuquarkaulriami yugmi, tekitarkamek qanra, qanerluten wii, ATANEQ Agayun qanllemnek. Waten qayagpagaluten: “Erneq alingnarqellria agiirtuq!

³Erneq canimellirtuq, ATANREM piarkami pillerkaa, Erneq amirlilria arenqiallugun-llu atanruvignun.

⁴Anguyagciqut Egypt-aami nanikuanarqelria tull'uni Ethiopia-mun. Egypt-aami amlleret tuqurqumaciqut; Nuna uayaumaciquq imenrurciiquq-llu.

⁵“Anguyiim tuquciiqai anguyagtet Ethiopia-mek, Libya-mek, Lydia-mek, Arabia-mek, Kuba-mek-llu ililiutellret, wiinga-llu yuunka tapqulluteng tuqurqumaciqut.”

⁶ATANEQ qanertuq, “Migdol-amek neglirnermi uitalriamek ayagluni Aswan-aaq ungalalirnermi tekilluku, Egypt-aam ililirtai anguyagmi tuqucimaciqut. Egypt-aam anguyagtai quyilriit umyuamegteggun piunriumaarkauluteng. Wiinga, ATANEQ qanertua.

⁷Egypt-aam nunii arcaqerluni nunakarniilqurrauciquq ellarpagmi, nunarpai-llu tamarmeng imenrurteqapiggluteng.

⁸Egypt-aaq ekuavkaqumku ililirtellri-llu tuqurqumakata, tuani nallunrirciqaat wiinga, ATANRUCIQA.

⁹“Tauna erneq tekiskan Egypt-aaq-llu piunriumariluni, sun'atgun kevganek qaneryartulrianek ayagceciciqua camek nallunginanratni Ethiopia-m yui, alingeciqut-llu cakneq. Tauna erneq agiirtuq!”

¹⁰Waten qanertuq ATANEQ Agayun, “Angayuqaq Nebuchadnezzar-aaq, Babylonia-m angayuqra, aturluku uayarciqaqa tukuutainek Egypt-aaq.

¹¹Anguyagten̄i takumcuyuyuilnguut malikluki taiciquq, nunakarniirutarkaugaat-llu nuna. Anguyagciqaat Egypt-aaq nuussirpagteggun, nunami-llu tamaani tuqumalriit amllerarkaugut.

¹²Nile-aq kinerceciiqaqa tunluku-llu tamana nuna yugnun assiitellrianun. Allanret cakarniiruciqaat tamana nuna tamaani-llu uitalriit tamalkuita. Wiinga, ATANEQ qanertua.”

¹³Waten qanertuq ATANEQ Agayun, “Memphis-aami agayutnguat tamalkuita piunrirciqanka. Egypt-aaq atanirturtekairuciiquq, wiinga-llu yuut tamalkuita alingmek imirarkauganka.

¹⁴Egypt-aam ungalalirnera nunakarniiruceciiqaqa, nunarpak-llu Zoan-aaq neglirnermi ekuavkarluku. Nunarpak-llu Thebes-aaq anucimirqecetaarciqaqa.

¹⁵Eq'uqertelqa naspececiiqaqa nunarpagmun Pelusium-aamun, Egypt-aam anguyagtain uitaviat. Thebes-aam-llu tukuutai piunrirciqanka.

¹⁶Egypt-aaq ekuavkarciqaqa, Pelusium-aaq-llu angelriamek nangteqciquq. Thebes-aam qacarneri imerqumaciqut, nunarpak-llu ulniurciquq.

¹⁷Heliopolis-aam Bubastis-aam-llu ayagyualriakek tuquciqut anguyagkun, arnat-llu teguarurrluteng.

¹⁸Tahpanhes-aami tan'gericiquq Egypt-aam pinia navkumku, piniatnek-llu ucuryagutek'lallratnek allurrluki. Amirlum naligciqaa Egypt-aaq, tamarmeng-llu nunarpain yui teguarurrluteng.

¹⁹Waten ayuqelriakun Egypt-aaq anucimirqecetaaqumku nallunrirciqaat wiinga, ATANRUCIQA.”

²⁰Ayagcecimallerput nunamten̄ek allrakungeqerluku qula ataucimek cipluku (11), iralut ciuqliat malrugnek ernengqerluku, ATANREM waten qanrutaanga.

²¹“Tuquarkaulriami yugmi, Egypt-aam angayuqran tallia ayemtaqa. Yuum-llu nemeqsaunaku kuuciqsaunaku-llu mamevkangnaqluku ataam pinirivkarluku nuussirpagmek tegumiaryugngarivkarluku.

²²Taumek waten qanertuq ATANEQ Agayun: Inglukesteksagutaanga Egypt-aam angayuqran. Tallik tamarkenka ayemtarkaurtagka, assilria ak'a-llu ayemtelleq, nuussirpak igtelluku unatainek.

²³Cekavciiqanka-llu Egyptian-aat ellarpiim iluanun tamalkuan.

²⁴Nutaan-llu Babylonia-m tallik pinirivkarciqagka nuussirpaka-llu elliluku unatainun. Egypt-aam tau͡gaam tallik tamarkenka ayemciiqagka, yuuniaraluni tuquciquq inglukestem̄i takuatni.

²⁵Egypt-aam angayuqra piniaruceciiqaqa, Babylonia-m-llu angayuqra pinirivkarluku. Nuussirpamnek cikiqumni, elliin-llu nalukaku tungiinun Egypt-aam, yuut tamarmeng nallunrirciqaat wiinga, ATANRUCIQA.

²⁶Egyptian-aat cekavciiqanka ellarpiim iluanun tamalkuan. Ellaita-llu nallunrirarkaugaat wiinga, ATANRUCIQA.”