Read Yupik Ezekiel 31 Bible Online

Ezekiel 31 - Yupik bible

Ezekiel 31

¹Ayagcecimallerput nunamten̄ek allrakungeqerluku qula ataucimek cipluku (11), iralut pingayuat ataucimek ernengqerluku, ATANREM waten qanrutaanga:

²Tuquarkaulriami yugmi, Egypt-aam angayuqra yui-llu tamalkuita waten qanruski: Anglilli elpeni pinirpaa! Camun atak ayuqestassiigutqerlaken?

³Ayuqekutnaamken Lebanon-aam naparpiinun cedar-aamun, Avayarluni tangnirqellrianek, talisvigkarnirluteng, Napa acetum ugaani kangran amirlut tekisngaluki.

⁴Mertarluni nunii naungigcautekaanek, Nunam-llu aciani kuigtarluni nerqestekaanek. Merqaqluku tamana napam naumavia Meq-llu ayagcetaqluku kuiggauluku napainun napalilriim nunam.

⁵Mermek nuuqitenrilami, Allani napani acetunruluni nauguq. Avayai mamtuluteng takluteng-llu.

⁶Tamarmeng ellam yaqulgi unglulilartut avayaini; Ungungssiaraat irniaqluteng talinrani; Atanruviit ellarpagmi mernuinerciraqluteng talinrani.

⁷Napa tauna tangssunarquq, Sugtuluni, avayarluni takellrianek. Acilqurrin et'ulriit kuiggaat tekisngaluki.

⁸Napat cedar-aat Agayutem naucetaarvianelnguut tauna pitatekevkenaku. Napa fir-aq taum napam avayaitun ayuqellrianek avayangeksaituq, Ayuqiinek-llu napamek avayangqelriartaituq. Tangnirqenrulriamek napataituq Agayutem naucetaarviani.

⁹Wiinga piliaqellruaqa tangssunariluku, avayarpauvkarluku-llu. Tamarmeng napat ayarikaat Eden-aami, Agayutem naucetaarviani.

¹⁰“Egypt-aam Angayuqran, niicugniu wiinga ATANEQ Agayun, qanelqa napa tauna piluku: Napa nauguq sugturiluni tua-i amirlut tekilluki, ucuryagtenguq-llu ellminek pivakluni.

¹¹Taumek, wiinga, ATANEQ Agayun, qessakekeka tauna napa allanermun-llu atanirturtem̄un piksagutelluku. Taum-llu anucimirqecetaarciqaa assiitetacia pitaciluku.

¹²Takumcuyuyuilnguut allanret kepluku iquqaarluku uniciiqaat. Avayai navgurluteng igqaqciqut ingrinun kuignayugnun-llu tamaani nunami. Atanruviit-llu talinrani uitallret tamarmeng ayagciqut.

¹³Iqumallrani-llu tauna napa yaqulget misvik'larciqaat, ungungssiaraat-llu avayaini tarrataqluteng.

¹⁴Wak'nirnek-llu ayagluni napa mel'ilriami naungermi tuaten sugtutaluni naunqiggngaituq amirlut tekilluki. Tamarmeng tuquarkaurtut yugtun, ciunerkaqsagulluku tuqumalriit nuniitnun ayallerkarteng.”

¹⁵Waten qanertuq ATANEQ Agayun: “Napa tauna tuqumalriit nuniitnun ayakan, nunam acianelngurnun mernun patuvkarciqaqa nallunailkutauvkarluku ellaitnun tuquilriatun qiatekucia. Kuiget carvanriuceciiqanka kuiggaat-llu qurrlunrirtelluki. Napa tauna tuquan, Lebanon-aam ingrii tan'gerivkarciqanka, napai-llu napalilriim nunam tamalkuita nalavkarluki.

¹⁶Napa tauna ayagceskumni tuqumalriit nuniitnun, iqukuni nepiin arulavkarciqai atanruviit. Tamarmeng Eden-aam napai, cucunarqellriit-llu mercimalriit Lebanon-aam napai, ayallret camavet, quyaciqut iqullranek.

¹⁷Ayagciqut malikluku tuqumalriit nuniitnun ilaliryarturluki ak'a iqullret. Talinrani-llu uitallret cekavciiqluteng atanruvignun.

¹⁸“Napa tauna Egypt-aam angayuqaqaa yugtuumarmi. Napat-llu Eden-aami tautun sugtutallrunritut tangssunarqellruvkenateng-llu. Tau͡gaam watua, Eden-aam napaitun, ayagciquq tuqumalriit nuniitnun ilaliryarturluki agayutailnguut anguyagkun-llu tuqutaullret.” Waten qanertuq ATANEQ Agayun.