Read Yupik Ezekiel 32 Bible Online

Ezekiel 32 - Yupik bible

Ezekiel 32

¹Nunamten̄ek ayagcecimallerput allrakungeqerluku qula malrugnek cipluku (12), iralum qula malrugnek cipluku erenrin ciuqliatni ATANREM qanrutaanga:

²“Tuquarkaulriami yugmi, ellmaaraunrilngurmek aarcirturru Egypt-aam angayuqra. Qanrulluku waten: Elpenek umyuartequtelartuten yugtutuliuluten atanruviit akuliitni, tau͡gaam crocodile-atun ayuqenruuten kuigkun ceqvallertarluni kuimalriatun. Meq currlingevkalaran it'garpenek menuurrluki-llu kuiget.

³Waten qanertuq ATANEQ Agayun: Yugugarnek ilalua kuvyirciqamken; cen̄amun-llu qamurluten taggluten.

⁴Nunamun egciiqamken, taivkarciqanka-llu tamalkuita ellam yaqulgi, ungungssii-llu ellarpiim neryarturtelluten.

⁵Kemgen egqaqciqaqa ingrinun, temevnek-llu tuqumalriamek imirluki kuignayuut.

⁶Nuna augpenun mecirceciiqaqa ingrit tapeqluki, mer'et-llu carvanilriit, qurrlurtelluku-llu kuignun.

⁷Piunriqumken, qiliit patuciqanka, agyat-llu tan'geriluki; akerta-llu amirlunek patuluku, iraluq-llu tanqigngaunani.

⁸Qilagmi tanqigcetellriit tamalkuita nipevkarciqanka, nuna-llu uitaviin tan'gerivkarluku, waten qanertuq ATANEQ Agayun.

⁹“Amlleret atanruviit uitacurlagceciiqanka piunrillren qalarutkekumku nunanun niiteksailkevni.

¹⁰Amlleret atanruviit tatamutkeciqait pillrenka elpenun. Nuussirpaka arulaskumku angayuqat uulegciiqut alingluteng. Iqullerpet nalliini, tamarmeng uulegtarkaugut alingluteng, ellait-llu tuqunayukluteng.”

¹¹ATANREM Agayutem qanrutaa Egypt-aam angayuqra, “Babylonia-m angayuqran nuussirpalgirluni ullagciqaaten.

¹²Anguyagten̄un, takumcuyuyuilngurnek angayuqauvignek, nuussirpaitgun tuqurqevkarciqanka tamalkuita yut'en. Tamarmeng yut'en cat-llu ucuryagutek'lalten piunrirciqut.

¹³Kuluvauteten-llu tuqurqeciqanka meqsarturyaraitni. Yugtairuciiquq kuluvagtairulluni-llu mer'et currlungevkartekaitnek.

¹⁴Nutaan mer'it currluiruceciiqanka ecuirulluki kuigit-llu quunengluteng. Wiinga, ATANEQ Agayun qanertua.

¹⁵Egypt-aaq nunakarniiruskumku cakarniirulluku, piunrirtelluki-llu tuani uitalriit, ellaita nallunrirarkaugaat wiinga ATANRUCIQA.

¹⁶Man'a ellmaaraunrilnguq aarcirtuun tungmagcissuutnguluni yuarutnguciquq. Arnaita atanruviit atularciqaat tuquigaqameng pilaucimegcetun Egypt-aaq yui-llu tamalkuita pitekluki. Wiinga ATANEQ Agayun qanertua.”

¹⁷Qula malrugnek allrakungeqerluku nunamten̄ek ayagcecimallerput, erenret akimiarurteqerluki iralumi ciuqlirmi, ATANEQ qanertuq wangnun.

¹⁸“Tuquarkaulriami yugmi, tuquilriacetun angniilutkiki Egypt-aam yugugai tamalkuita. Ayagceski camavet ilakluki allat pinilriit atanruviit tuqumalriit nuniitnun.

¹⁹Waten qanruski: “Umyuartequci-qaa allani yugni tangssunarqenruyukluci? Elpeci ayagciquci camavet tuqumalriit nuniitnun taklayarturluci agayutailnguut akuliitni.

²⁰“Egypt-aam yui ilauciiqut anguyagkun tuqucimalrianun. Nuussirpiim upingatai tuquqnaluki tamalkuita.

²¹Alingilkacagait, callullret-llu Egyptian-aat ililirluki, ciuniurciqait Egyptian-aat tuqumalriit nuniitnun. Waten qayagpagtut: ‘Agayutailnguut tuqucimallret anguyagkun taillruut maavet, maa-i-llu maani taklaluteng!’

²²“Assyria-llu tuanlluni, avaqlirluni anguyagtem̄i qunguitnek. Tamarmeng tuqucimallruut anguyagkun,

²³qunguit-llu tuqumalriit nuniita ilutunrani uitaluteng. Tamarmeng anguyagtai tuqullruameng anguyagkun, qunguita-llu avatairumaluku tungmagcimavia. Tau͡gken unguvallermeggni alingnarliullruluteng nuniitni unguvalriit.

²⁴“Elam-aaq tuantuq, anguyagtain qunguita avatairumaluku. Tamarmeng tuqullruluteng anguyagkun, tamarmeng-llu ayallruluteng nuugiumavkenateng tuqumalriit nuniitnun. Unguvallermeggni ilateng alingevkalallruyaaqait, tau͡gaam watua taklaut tuqumaluteng kasngunarqellriaruluteng.

²⁵Elam-aaq anguyagkun tuqucimallret ilalirluki taklauq, anguyagtain qunguit avatiini uitaluteng. Tamarmeng nuugiumavkenateng, tamarmeng anguyagkun tuqullruluteng. Unguvallermeggni alingnarqellruyaaqut, tau͡gaam maa-i taklaut tuqumaluteng kasngunaqluteng, ilaliulluteng tekitarkaatnun anguyagkun tuqullret.

²⁶“Meshech-aankuk Tubal-aaq-llu tuantuk, anguyagtegkenka qunguit avategkeni uitaluteng. Tamarmeng nuugiumavkenateng, tamarmeng anguyagkun tuqullruluteng. Elkek-llu cali unguvallermegni yuullgutetek alingevkalallruyaaqakek.

²⁷Tungmagcimallrunritut ak'a tamaani pinilriit anguyagtet tungmagcimalallracetun, ayallret anguyagcuuceteng malikluki tuqumalriit nuniitnun, nuussirpait qamiqurrata acianun ellimaluteng capurassuutait-llu temaita qaingitnun ellimaluteng. Tamakut-llu pinilriarullruameng alingnarqellruut yugnun unguvalrianun.

²⁸“Tuaten ayuqluteng Egyptian-aat taklaciqut passimaluteng akuliitni nuugiumanrilnguut anguyagkun tuqucimallret.

²⁹“Edom-aaq tuantuq angayuqaminek, atanirturtem̄inek-llu ilaluni. Pinilriaruluteng anguyagten͞gullruyaaqut, tau͡gaam watua taklaut tuqumalriit nuniitni ilalirluki nuugiumanrilnguut tuqucimallret anguyagkun.

³⁰“Neglirnerem-llu atanerruari tamarmeng tuanlluteng, Sihonian-aat-llu cali tuanlluteng. Pinimegteggun alingnarqellruut, tau͡gaam watua ayagtut camavet kasngunarqellriaruluteng ilalirluki anguyagkun tuqutaullret, ellimaluteng-llu nuugiumavkenateng. Kasngunarqellratnun ilaliulluteng tuqumalriit nuniitnun ayallret.

³¹“Tangerrluku tamakut tuqucimalriit anguyagkun cacetuvkarciqaa Egypt-aam angayuqra anguyagtai-llu,” qanertuq ATANEQ Agayun.

³²“Egypt-aam angayuqranun alingcira'arcetellruanka unguvalriit, tau͡gaam anguyagtetuumarmi tuqucimaarkauguq ellimaluni-llu nuugiumanrilnguut tamalkuita ilalirluki anguyagkun tuqullret.” Qanertuq ATANEQ Agayun.