Read Yupik Ezekiel 33 Bible Online

Ezekiel 33 - Yupik bible

Ezekiel 33

¹ATANREM qanrutaanga.

²“Tuquarkaulriami yugmi, waten yut'en qanruski: Anguyak nunamun taiskumku, nunam-llu taum yui cucukliquneng ilameggnek nayurten͞gusqelluku;

³anguyak-llu agiirtellria tangerquniu cupu'uryaraq cupciqaa elpengcarluki yuut.

⁴Tua-llu kia niiskuniu tau͡gaam ilangcivkenaku, ingluita-llu tekiskuneng tauna tuqulluku, tauna ellminek tuqucetellriaruuq.

⁵Cupu'uryaraq niitellrua, pamatekevkenaku-llu; tuqullra elliinun tusngauq. Tau͡gken aarcirtuun pamatekellrukuniu, elliin unguvani aviutellruyaraa.

⁶Tau͡gken cali nayurtem anguyak tangerquniu agiirtellria cupu'uryaraq-llu cupevkenaku, tua-i yuut aarcirtuumavkenateng, anguyak-llu tekilluni yuut tuqulluki; taukut tuquciqut assiilngurtuumarmeng, taukut tuqullrat tusngavkarciqaqa taumun nayurtem̄un.

⁷“Tuquarkaulriami yugmi, waniwa nayurten͞gurtamken Israel-aam yuinun. Egmirtelararkaugaten ellaitnun aarcirtuutet elpenun taitellrenka.

⁸Qanquma assiilngiumalria tuquarkaurrniluku, elpet-llu cangalliurpek'nak aarcirturluku tauna qanrutenrilkuvgu umyualinqigtesqelluku, tauna assiilngurtuumarmi tuquciquq, tuqullra-llu elpenun tusngavkarciqaqa.

⁹Tau͡gken cali assiilngiumalria aarcirtung'e'rpeni umyualinqigtenrilkuni assiilngiumainanermini tuquciquq, tau͡gken elpet aarcirtullruavgu elpenek anirturtuten.”

¹⁰ATANREM qanrutaanga, “Tuquarkaulriami yugmi, qanruski Israel-aam yui ellaita qanellratnek: ‘Assiilngumten̄ek alarqaqlemten̄ek-llu uqamailqitukut. Piniarusngiinarluta. Qaillun piluta wangkuta unguvaqatarceta?’

¹¹Qanruski, wiinga, ATANEQ Agayun, unguvalua Agayutngucimtun, ilukegciksaitua assiilngiumalria tuquaqan. Umyualinqiggluku tau͡gaam unguvasqumayaaqluku. Israel-aam yuini, assiilnginermek taqici. Ciin tuquyugceci?

¹²“Kitaki, elpet tuquarkaulriami yugmi, yut'en waten qanruski, Ellualria assiilngiqan elluarucian aviusngaitaa. Assiilngiumalria tau͡gaam umyualinqigeskuni anucimirqecetaarumangaituq, cali tau͡gken yuk ellualria assiilngilangekuni tuquarkaurciiquq.

¹³Ellualria-llu qanrutellrungramni unguvaarkauniluku, tau͡gaam umyuarteq'ngekan assilriit caliaqelallni amlleriniluki assiilngurmek-llu atungluni, wiinga umyuaqngaitanka assilriit caliaqelallri. Tuquciquq assiilngillni pitekluku.

¹⁴Cali-llu qanrutarkauyaaqaqa assiilngiumalria tuquarkauniluku, tau͡gaam assiilnginermek taqkan ellualrianek-llu assilrianek-llu calingluni,

¹⁵makunek: utercecikan navriskengllermini tegullerminek akiilnguirciigatnayukluku, wall'u uterceciluni teglellerminek, assiilnginrirluni maligtaquluki-llu alerquutet unguvanarqellriit, tuqungaituq unguvaarkauluni tau͡gaam.

¹⁶Assiilnguut iliit atullrin umyuaqumangaituq, unguvaarkaurciiquq piciulria assilria-llu atungaku.

¹⁷“Tau͡gken yut'en waten qanraqluteng, ‘ATANREM piciryaraa ellualriarunrituq.’ Qang'a, ellaita tau͡gaam piciryaraat ellualriarunrituq.

¹⁸Ellualriim assilria caliani taqkuniu, assiilngurmek-llu atungluni, tuquciquq assiilngillni pitekluku.

¹⁹Tau͡gken cali assiitellria yuk assiilnginrirluni assilriamek calingekuni unguvaarkaurciiquq.

²⁰Elpeci cali qanlartuci, ‘ATANEQ piciulriamek piksaitelartuq.’ Israel-aam yuini, wiinga cuqciiqamci asiilnguum atullerpeci pitatiinek.”

²¹Nunamten̄ek ayagcecimallerput iralungqerluku qula malrugnek cipluku, tallimanek ernengqerluku iralut qulngurutiit, angun qimalleq Jerusalem-aamek tailuni qanrutaanga, “Nunarpak iquuq.”

²²Akwauvauluku atakumi qimagaq taivailgan elpekumallruaqa ATANERMUN nayuuciqa. Unuaquani tauna angun tekitellrani, ATANREM ataam qaneryaurcetellruanga.

²³ATANREM qanrutaanga.

²⁴“Tuquarkaulriami yugmi, yuut uitalriit imumalriani nunarpaini Israel-aam nuniini qanlartut: ‘Abraham-aaq ataucirraullruuq, tau͡gken nuna piksagutellrua. Wangkuta amllertukut, taumek wani-wa nuna piksagutarput.’

²⁵Taumek waten qanruski, waten qanertuq ATANEQ Agayun: Nerlartuci kemegmek augtuumaan. Agayuaqluci-llu agayutnguanun. Tuquciaqluci-llu yuullgutevcen̄ek. Caluci umyuarteqseci nuna piksukluku?

²⁶Nuussirpaci cacetuqutek'laraci. Pellernarqelrianek calilartuci, tamarpeci-llu caarrluurtelaraci elaqlivci nulirrit; tua-llu-qaa tua-i nuna piksaguciu?

²⁷“Waten qanruski, Waten qanertuq ATANEQ Agayun: Unguvalriarulua Agayutngucimtun, ilumun yuut uitalriit imumalriani nunarpagni tuqucimaciqut nuussirpagkun, yuilqumi-llu uitalriit tunciqanka alingnarqellrianun ungungssinun tamakut-llu nerciqait. Cangerlagkun-llu tuquarkauluteng ingrini qerranquni-llu iirumalriit.

²⁸Nuna cakarniiruciiqaqa uitaviksunairutelluku, piniq-llu ucuryagtelallrat iqukliciiquq. Ingrii-llu Israel-aam yuilqurrurciiqut kina imna tamaagguilarngaunani.

²⁹Anucimirqecetaaqumteng yuut assiilngillrat pitekluku nuna-llu uitavigkarniirulluku, nallunrirciqaat wiinga ATANRUCIQA.”

³⁰ATANEQ qanertuq, “Tuquarkaulriami yugmi, yugpet qalarutkelaraatgen quyurtaqameng nunarpiim qacarneran caniani, enemeng-llu amiigitni. Waten qanlartut ilameggnun, ‘Ataki niicugniyartuqerlaut camek ATANREM qanrucia.’

³¹Tua-i yum'a quyurrvik'laraatgen niitnaluku camek qanerkangqerrucin, tau͡gken qanrut'ngerpeteng tuaten pisqelluki niicuunateng. Qanqegtaaralartut kenkiluteng qerrlumegteggun, tau͡gaam ellaita pikangutkateng ciumuutaat.

³²Ellaitni atunguanek atulriami erinakegciluni wall'u aturcetaalriami cangallrunrituten. Niicugnilaryaaqaatgen qalartaqavet, tau͡gaam qanellren atauciungraan atuyuunaku.

³³Tau͡gaam qanelten tamalkuita piciureskata, piciurtenrilngaitut-llu, nallunrirciqaat prophet-aamek ilangqellrucirteng.”