Read Yupik Ezekiel 34 Bible Online

Ezekiel 34 - Yupik bible

Ezekiel 34

¹ATANREM qanrutaanga.

²“Tuquarkaulriami yugmi, aniqlaagiki qusngiliurtai Israel-aam. Qalarulluki wiinga ATANEQ Agayun ellaitnun qanllemnek: Israel-aam qusngiliurtaini, nerqelalriani elpecen̄ek! Qusngiliurtem-qaa qusngit nerevkararkaunritai?

³Uqurilrianek nerlartuci, aklungqerraqluci-llu qusngit melqurritnek. Assinkacagaitnek-llu qusngit tuquciluci ner'aqluci; tau͡gken qusngit nerevkaqsaunaki.

⁴Pinialnguut aulukeksaitelaraci assirivkangnaqeksaunaki-llu naulluulriit canrirceteksaunaki, akngiringalriit-llu kilinrit nemyuunaki, avtellret ut'rucuunaki, yuayuunaki-llu tamallret. Mulngakevkenaki tau͡gaam aulukaqluki.

⁵Taumek qusngit qusngiliurtailameng cekavtelartut, yuilqum-llu ungungssiin tuqulluki nerlarait.

⁶Qusnginka cekavngallruut, ayagallruut qertulriatgun qemitgun ingritgun-llu. Qusnginka cekavvluteng nunamun tamiinun, kitumek yuartaunateng nalaqengnaqluki.

⁷“Taumek, elpeci qusngiliurten̄i, niicugniciu qanellrani ATANEQ:

⁸Unguvalua ATANEQ Agayutngucimtun, niicugninarqerpecia. Qusnginka pitarkaurtellruut, yuilqum ungungssiin malirqaraluki tuqulluki nerlarait, qusngiliurtailata. Qusngiliurtem̄a yuaranritait ellmeggnek nereqngameng qusnginka nerqevkenaki;

⁹taumek, elpeci qusngiliurten̄i, niiciu qanellra ATANREM.

¹⁰Wiinga ATANEQ Agayun, inglukesteksagutarpecia. Qusngimnek allurciiqamci, qusngiliurten͞gungairutuci ellaitnun; mat'um kinguani elpecen̄ek kiivci aulukngaituci. Qusnginka teguciqanka elpecen̄un nerevkanqiggngaitanka.

¹¹“Waten qanertuq ATANEQ Agayun: Wiinga wangnek qusnginka yuarciqanka nataqnatkamnun.

¹²Qusngiliurtem yuaralauciatun katngautmi ilaitnek cekavtellernek, wiinga-llu tuaten qusnginka yuarciqanka; quyurciiqanka-llu ataucimun cekavcimallratnek tuani ernermi tan'gercetellriami amirluluni.

¹³Nunakenrilkaitnek anulluki ut'ruciiqanka, quyurrluki nakmiin nuniitnun. Ciuliqagciiqanka ingriinun kuiginun-llu Israel-aam, nerevkarluki-llu nunanirqellriani canlilriani marani.

¹⁴Nerevkarciqanka alingniurcetevkenaki ingrit nunapiitni, kuignayugni, canlilriani-llu maraini Israel-aam nuniin.

¹⁵Wiinga-llu qusngiliurtekciqaatnga, mernuinercillerkaatnun-llu ayauciiqanka.

¹⁶“Wiinga-llu yuarciqanka tamallret ut'rulluki-llu avtellret, akngiringalriit-llu kilinrit nemerluki, canrirtelluki-llu naulluulriit; tau͡gaam uqurilriit tuquciiqanka, piciulria aturluku qusngiliurten͞guama.

¹⁷“Tua-llu elpeci katngamni, qanertuq ATANEQ Agayun; yuvrirciqamci atauciuqaqluci avegluki-llu assilriit assiitellrianek, qusngit-llu avegluki qusngirngalngurnek.

¹⁸Ilavci elarak'larait assilriarungraata can'get; tutmautelaraci-llu nerenrilkeci! Mermek ecuilngurmek mel'artuci, menrilkeci-llu akutelaraci marayingevkarluku!

¹⁹Qusngima-llu nerlarait can'get tutmautelci, mermek-llu marayaurtellerpecen̄ek mer'aqluteng.

²⁰“Taumek ATANREM Agayutem waten qanrutai, Wiinga wangnek yuvrirciqamci pinilriani pinialngurni-llu qusngini.

²¹Pinialnguut cingqaquluki cirunermiaraluki-llu avcet'laraci katngagnek.

²²Wiinga tau͡gaam anirturciqanka nangtaugarkaunrirtelluki. Yuvrirciqanka atauciuqaqluki qusnginka avvluki-llu assilriit assiilngurnek.

²³Pistemtun-llu David-aatun ayuqellriamek atanerkiciiqanka qusngiliurtekesqelluku, elliin-llu aulukarkaugai.

²⁴Wiinga ATANEQ Agayutkeciqaatnga, atanirturtengqerciqut-llu pistemtun David-aatun ayuqellriamek. Wiinga ATANEQ qanertua.

²⁵Akqut'liciqua pillgutekluki uitanqegciurararkaurtelluki. Ungungssit alingnarqellriit ayagceciiqanka nuniitnek, qusnginka alingniurpek'naki uitauraasqelluki yuilqumi qavaraqluteng-llu napat akuliitni.

²⁶“Atawaqertelluki uitavkarciqanka qigcignarqellriami qemimni.[15] Tamaantellratni atawaqerceciiqanka ellallircetaqluku nuuqaqatgu.

²⁷Napat atsanek naugiciqut, naucetaarviit-llu neqkanek naugiluteng, yuut-llu tamarmeng uitaluteng elluiluteng nakmiin nunautmeggni. Navkumki yum'a kalivnerit teguarunrirtelluki-llu pistepayuurcetellritnun, nutaan ellaita nallunrirciqaat wiinga ATANRUCIQA.

²⁸Agayutailnguut atanruviit uayanqiggngaitait, yuilqum-llu ungungssiin tuqulluki nerenqiggngaunaki. Elluiluteng uitaciqut, kia-llu alingcicessngaunaki.

²⁹Naucetaarvigkiciiqanka naungignarqellrianek nuniit-llu kailriartangqerrngaunani. Atanruviit-llu allat picingssautekenqiggngaitait.

³⁰Tamarmeng yuut nallunriciiqaat wangnun cayailkuciumaciat Israel-aam yui, cali-llu wangnun yuk'uciat, waten qanertuq ATANEQ.

³¹“Elpeci qusngimni, katngagni nerevkalaqengamni, wiinga yuk'amci, elpeci-llu Agayutkarpecia,” qanertuq ATANEQ Agayun.