Read Yupik Ezekiel 35 Bible Online

Ezekiel 35 - Yupik bible

Ezekiel 35

¹ATANREM qanrutaanga,

²“Tuquarkaulriami yugmi, aniqlaagiu nunii Edom-aam,

³waten qanruski, Waten qanertuq ATANEQ Agayun: “Edom-aam ingriini, inglukesteksagutarpecia! Unatenka yagciiqanka inglukluten, yuirulluten nunakarniiruceciiqamken.

⁴Nunarpaten imenrurceciiqanka Nunan-llu nunakarniirulluku; Nutaan nallunrirarkaugan wiinga ATANRUCIQA.

⁵“Israel-aaq arulaiyuunak ingluk'lallruan yui-llu tuqurqevkarluki picurlaumallrata nalliini, assiilnguit pitekluki nangnermek anucimirqecetaarumallrata nalliini.

⁶Taumek waniwa, wiinga unguvacimtun, qanertuq ATANEQ Agayun, Agayutngucimtun, tuqu ciunerkaqan, anagciigatan-llu. Tuqucillerpecen̄ek yugmek pinarqellriaruuci tuquciyaram-llu maligciiqaaci.

⁷Edom-aam qemii nunakarniiruceciiqanka tuqutaqluku-llu kina imna tamaagguilria.

⁸Ingriten patuciqanka tuqumalriit temaitnek; qemiten-llu kuignayuten-llu patuciqait anguyagkun tuqullret temaita.

⁹Yung'enqigcessngaitamken akwarpak, nunarpagpeni-llu yugmek uitalriartangqenqiggngaunani. Nutaan-llu nallunrirciqan wiinga ATANRUCIQA.

¹⁰“Waten qanravet, ‘Ukuk malruk atanruviik Judah-nkuk, Israel-aaq-llu tegulukek piksaguciiqagka,’ amta-llu ellaita wiinga, ATANEQ, Agayuteklua.

¹¹Taumek waniwa, wiinga unguvalua Agayutngucimtun, akinaurciqaqa qenrucillren, ciknallren, eq'ukillren-llu yumnek.

¹²Nutaan nallunrirciqan, wiinga, ATANEQ niitellrucin qanllerpeni ikiarluki ingrii Israel-aam qanerluten, ‘Yuirutut, wangkutnun cikiutekumaut pikesqelluki.’

¹³Niitellruanka aaqevkenaci ucuryaggluci qalartellerci wiinga inglulirlua.”

¹⁴ATANEQ Agayun qanertuq, “Yuirucetqapigciiqamken tua-i ellarpiim yuin tamarmeng nunaniryuutekarkauluku piunrillren,

¹⁵nunaniryullrucirpetun Israel-aaq navguumallrani, wiinga nakmiin pika. Seir-am ingrii, aa-ang, Edom-aam nunii tamarmi, yuiruciiquq. Nutaan-llu yuut tamarmeng nallunrirciqaat wiinga ATANRUCIQA.”