Read Yupik Ezekiel 36 Bible Online

Ezekiel 36 - Yupik bible

Ezekiel 36

¹ATANEQ qanertuq, “Tuquarkaulriami yugmi, qalaruski ingrii Israel-aam qanrulluki niicugnisqelluku qaneryaraq wiinga,

²ATANEQ Agayun, ellaitnun qanerkaqa: Israel-aam inglukestai ucuryaggluteng waten qanrata, ‘Makut ak'allaurtellriit qemit wangkuta piksagutaput!’

³“Taumek qalaruski qanrulluki, Waten qanertuq ATANEQ Agayun: Avaqliita atanruviit cirlakellratni uayarluki-llu Israel-aam ingrii, yuut picingssautek'lallruit qannguarutekluki tuaten Israel-aam yui.

⁴Niiciu, wiinga, ATANEQ Agayun, qanelqa elpecen̄un ingrinun, qeminun, kuignayugnun, nunallernun imenrurrluki unitellritnun, nunarpagnun yuirutlernun, pitarkatun ayuqlirilrianun avaqlirmeggnun, picingssautekumaluteng tuaten.

⁵“Wiinga-wa, ATANEQ Agayun qanellrulrianga qungyalriatun eq'urtellma nalliini avaqliit atanruviit piluki, arcaqerluku Edom-aaq. Angnirluteng caunrilkiluteng tuaten nunauteka tegullruat ellaita piksagutnaluku.

⁶“Taumek qalarusgu Israel-aam nunii; qanrulluki ingrit, qemit, kuiggaaraat, kuignayuut-llu wiinga ATANEQ Agayun qanllemnek qungyalriatun qenerrlua, atanruviit cangayugcetaarillratnek ellaitnek kasnguyugtelluki-llu.

⁷Taumek waten qanertuq ATANEQ Agayun: Akqiunga atanruviit avaqlici kiaresngiacetarkaurrluki.

⁸Israel-aam tau͡gaam ingriini napat ataam cuyangyaurciiqut atsanek-llu naugiluteng pikarpecen̄ek, yumni Israel-aami. Ak'anun pivkenaci kingunerpecen̄un uterciiquci.

⁹Pillguciramci, wiinga taumek pinritevkenii nunasi ataam itumcimaarkaurceciiqaqa naucetaarkat-llu nauceciivkarluki.

¹⁰Yugyangevkarciqamci. Nunarpagni uitaciquci napartenqiggluki-llu tamalkuita imerqumallret.

¹¹Yuut kuluviit-llu amlleriinarceciiqanka. Ciungani yugyanrurciiquci amllernek-llu irniangluci. Tuani-llu uitavkarluci ciungani uitalallrucirpecetun, mat'um-llu ciungani tukuunrurtelluci. Nutaan-llu nallunrirciqerci wiinga ATANRUCIQA.

¹²Elpeci, yumni Israel-aami, ut'ruciiqamci ataam uitasqelluci tamaani nunami. Nakmiin nunaksaguciiqerci, irniaci-llu paluvkanqiggngaitai.

¹³“Waten qanertuq ATANEQ Agayun: Yuut qanlaryaaqut nuna man'a yugnek nerlarniluku, irniaritnek tuaten teguilarniluku.

¹⁴Tau͡gaam waken ayagluni nerlarngaituq yugnek, irniarpecen̄ek-llu teguilarngaunaci. Waten qanertuq ATANEQ Agayun.

¹⁵Mat'um kinguani nuna niitenqiggngaituq atanruvignek picingssautekilrianek ellminek. Nunam yuut irniaritnek teguilarngaitai. Wiinga, ATANEQ Agayun, qanertua.”

¹⁶ATANREM qanrutaanga.

¹⁷“Tuquarkaulriami yugmi, Israel-aam yuin nakmiin nunameggni uitallermeggni menuurtellruat qaillun ayuqelriakun yuullermegteggun ayuqucimegteggun-llu. Wiinga-llu ayuqucimegteggun menuullrat ayuqekutaqa arnamun agelrumalriatun.[16]

¹⁸Ellaitnun qenertellma tuknitacia naspecetellruaqa yugnek tuqurqilallrat tamaani nunami pitekluku, agayutnguat-llu pitekluki tamakutgun menuurtellruatgu nuna.

¹⁹Wiinga cuqcamki ayuquciatgun caliaritgun-llu cekavcetellruanka atanruvignun.

²⁰Natmun-llu tamiin ayallermeggnun atqa tanqilria kasngunarivkalaraat, yuut waten qanrutkelaiceteng, ‘Ukut ATANREM yuksaaqengraateng nunameggnek ayagcecimallruut.’

²¹Wiinga-llu atqa tanqilria peng'gartellriatun ayuqaqa ukut Israel-aam yuin kasngunarivkaatgu natmun tamiin ayallermeggnun.

²²“Tua-llu, Israel-aam yui, wiinga ATANEQ Agayun ellaitnun qanrutkesqellemnek qanruski: Elpeci Israel-aam yuini pitekluci piarkaqa piqatanritaqa, tau͡gaam wiinga tanqilria atqa pitekluku, elpeci caunrilleksagucetlerci nunani tamalkuitni ayagviklerpecen̄i.

²³Nasvakumku tanqigtacia at'ma atanruviit yuitnun, elpeci caunrilleksagucetlerci, nallunrirciqaat wiinga ATANRUCIQA. Wiinga, ATANEQ Agayun qanertua. Elpeciuggun atanruvignun nallunrirceciiqaqa tanqilriaruciqa.

²⁴Nunanek ayuqenrilngurnek ayagcecimavillerpecen̄ek ut'ruciiqamci nakmiin nunavcen̄un.

²⁵Mermek ecuilngurmek ciqertarluci iqairuceciiqamci iqaurtellerpecen̄ek agayutnguarpeciuggun allatgun-llu menuurtellerpecen̄ek.

²⁶Wiinga-llu ircaqumek, umyuamek-llu nutaramek cikirciqamci. Au͡g'arciqaqa asvailnguq teggalquq ircaqurci, cikirluci-llu niisngalriamek ircaqumek.

²⁷Anerneqa elpecen̄un elliciqaqa maligtelluki-llu alerquutenka aturtelluki-llu tamalkuita picirkiutenka elpecen̄un cikiutellrenka.

²⁸Nutaan-llu nunami uitaciquci cikiuteklemnun ciuliarpecen̄un. Wiinga-llu yuk'eciqamci, elpeci-llu Agayutkeciqerpecia.

²⁹Aviuciiqamci tamalkuitnek menuurtellerpecen̄ek. Picirkirciqaqa mukaarkaq amlleresqelluku, piitnaq elpecen̄un atunqigcessngaunaku.

³⁰Napat atsanek naugitulit amllernek naugiyaurceciiqanka, naucetaaci-llu cali nauluaqeryaurtelluki, piitnat pinqiggngaunateng kasngunariluci allanun atanruvignun neqkaiturallerpeciuggun.

³¹Umyuaqeciqerci assiilngurkun yuullerci assinrilngurnek-llu calilallerci, elpecen̄ek-llu tunriksaguciiquci assiilnguci pitekluki pellernarqelriit-llu calialci.

³²Israel-aam yuini, tau͡gaam nallunrilkiciu elpeci pitekluci piarkama pingailuciat. Elpecen̄un nallunriisqumaaqa caliarpeci kasngunarqucia. Wiinga ATANEQ Agayun qanertua.”

³³ATANEQ Agayun qanertuq, “Assiilngurpecen̄ek carriuskumci, nunarpagpecen̄i ataam uitayugngarivkarciqamci, napartenqigtelluki-llu imenret.

³⁴Nuna-llu ciungani tamaaggun kitulriit tanglallracetun cakarniinaku tangerciqaat itumcimaluku nauceciirumaluku-llu.

³⁵Waten-llu qanerciqut, ‘Nuna man'a cakarniitelleq Eden-aam naucetaarviatun ayuqlirilliniuq. Nunarpiit-llu imerqumallret yuirutellret-llu tumarcimaluteng yungluteng tuaten.’

³⁶Nutaan-llu atanruviit avatevcen̄i uitaqallret nallunrirciqaat wangnun, ATANEQ, tumartellruciit imumalriit, cakarniitellrungraan-llu nuna naugivkarluku. Wiinga, ATANEQ, akqillruunga waten man'a piciqniluku, wiinga-llu tuaten piciqaqa.”

³⁷Waten cali qanertuq ATANEQ Agayun: “Uumek cali Israel-aam yuinun kaigavikevkarciqua: yugyangevkaasqelluteng katngagtun amllertariluteng.

³⁸Nunarpiit imumallret yugyangevkarciqanka, Jerusalem-aatun qusnginek amllernek ekuagarkanek katngautengqelallruciatun. Nutaan-llu nallunrirciqaat wiinga ATANRUCIQA.”