Read Yupik Ezekiel 38 Bible Online

Ezekiel 38 - Yupik bible

Ezekiel 38

¹ATANREM qanrutaanga,

²“Tuquarkaulriami yugmi, aniqlaagiu Gog-aq, atanerruat ciuqliat atanruviigkeni Meshach-aankuk Tubal-aaq-llu, Magog-am nuniini. Aniqlaaluku

³qanrusgu wiinga, ATANEQ Agayun, elliinun inglukesteksagutnilua.

⁴Tuigceciiqaqa, mananek kapuqvikluku agluqra, qamurluku-llu ayaulluku anguyagtetuumaan. Anguyagtai horse-aarit-llu aturiumalrianek ekumasterluteng, amlleqapigtut, tamarmeng anguyagtet tegumiangqertut capurautnek caskurluteng nuussirpagnek.

⁵Ilangqertuq anguyagten̄ek Persia-mek, Ethiopia-mek, Libya-mek-llu, tamarmeng capurauterluteng nacarluteng-llu akngircailkutnek.

⁶Tamarmeng anguyagyugngalriit nuniignek Gomer-aankuk, Beth Togarmah-q-llu neglirnermi uitalriik ilaliraak, allat-llu angutet allanek amllernek atanruvignek.

⁷Qanrusgu uptesqelluku tamalkuita-llu anguyagtai upingasqelluki atanirtuq'ngai.

⁸Allrakut amlleret kinguatgun alerqurciqaqa curuusqelluku nunamun yul'egmun utercecimallernek amllernek angayuqauvignek, anguyallerkameggnek-llu neryuniunrilngurnun. Anguyagciqai ingrii Israel-aam, ak'anun nunakarniicimallret yuicimaluteng-llu. Maa-i tau͡gaam yugluteng alingniurpek'nateng uitalrianek.

⁹Ellii anguyagcetuumarmi amlleret-llu angayuqauviit malii curugciqut ellam ellaqertellratun ayuqluteng, amirlutun-llu nuna patuluku.”

¹⁰ATANREM Agayutem Gog-aq waten qanrutaa: “Tauna pillerkaq tekiskan, umyuangcangciquten assiitellriamek picirkiungluten.

¹¹Picirkangciquten-llu anguyagnaluku nuna akiurciigalnguq yugluni uitanqegciluteng uitalrianek alingniuqsaunateng nunarrateng cayailkuciumanrilengraata.

¹²Uayarciqaten tegliurluten-llu yugnek nunarpagni uitalrianek imumallerni. Nunanek allanek quyurcimallruut, maa-i-llu ungungssiutengluteng akluucingluteng-llu nunam qukaani uitaluteng.

¹³Sheba-rmiut Dedan-armiut-llu kupcaat-llu nunarrainek Spain-am apciiqaatgen, ‘Anguyagteten-qaa quyurtellruaten anguyagluten-llu uayaaqengnaluten? Piciqliartuten-qaa tegutnaluten qerrirlimek suulutaamek, ungungssiarnek, aklunek-llu, tamakut-llu uayaaqengat ayaulluki ayagnaluten?’”

¹⁴Taumek ATANREM Agayutem ayagcetellrukiinga qanrutesqelluku Gog-aq qanerkamnek elliinun waten: “Yuunka Israel-aam yui elluiluteng uitainanratni, ayagciquten

¹⁵tainaluten uitavigpenek yaaqvanek neglirnermek, maligluten cayunailngurnek anguyagterugarnek atanruviit amlleret yuitnek tamarmeng horse-aani ekumaluteng.

¹⁶Curugciqaten-llu yuunka ellam ellarayiitun ayuqluten nunakun ayalriatun. Pillerkaq tekiskan ayagceciiqamken anguyagyarturtelluku nunaka kituuciqa nallunriisqelluku atanruvignun, cali-llu nasvagnaluku tanqilriaruciqa callemkun elpeci tumekluci.

¹⁷Elpenguuq qalarutkelqa ak'a tamaani, qanrutkellemni pistemkun, prophet-aarikun Israel-aam, ernerni agiirtellriani taivkariarkaunilua Israel-aam anguyagtekaanek.” ATANEQ Agayun waten qanellruuq.

¹⁸ATANEQ Agayun qanertuq, “Tuani ernermi Gog-am curukaku Israel-aaq, cakneq eq'uqertarkaugua.

¹⁹Eq'uqertellma nalliini qanellruunga tuani ernermi Israel-aam nunii cakneq pekterpagciqniluku.

²⁰Tamarmeng neqet, yaqulget, tamarmeng-llu mikellriit angelriit-llu ungungssit, yuut-llu tamarmeng nunam qainganelnguut uulegtarkaugut alingluteng wangnek. Ingrit imciqut, ekviit-llu useqluteng, tamarmeng-llu qacarneret iquluteng.

²¹Gog-aq cakneq alingevkarciqaqa picurlagnarqelriit amlleret tut'elluki elliinun. Wiinga, ATANEQ Agayun qanertua.

²²Anucimirqecetaarciqaqa cangerlagteggun, tuquavkarluki-llu. Ellarvak kavtiit-llu, taperluteng kenermek quluuramek-llu kuvciqut elliinun anguyagtainun-llu amllernun-llu atanruviignun elliinun ililiutellrianun.

²³Tuaten pillemkun atanruviit nasviciiqanka angelriarucimnek tanqilriarulua-llu. Ellaita-llu nallunrirciqaat wiinga ATANRUCIQA.”