Read Yupik Ezekiel 39 Bible Online

Ezekiel 39 - Yupik bible

Ezekiel 39

¹ATANEQ Agayun qanertuq, “Tuquarkaulriami yugmi, Gog-aq aniqlaagiu, atanirturtegken ciuqliat angayuqauviigken Meshech-aankuk Tubal-aaq-llu, qanrulluku-llu wiinga elliinun inglukesteksagutnilua.

²Tumiinek caqirtelluku ciuliqagciiqaqa anulluku yaaqvanek negeqvamek tekitnatkaanun Israel-aam ingriinun.

³Tua-llu urluvra iqsulirnernek unatainek kalegciqaqa, pitegcautai-llu tallirpilirneranek.

⁴Gog-aq anguyagten̄i-llu ilini-llu tuquciqut tamaani ingriini Israel-aam, temait-llu neqkautekevkarciqanka yaqulegnun, yuilqurmiutarnun-llu ungungssinun.

⁵Carr'ilngurmi tuquaciqut. Wiinga, ATANEQ qanertua.

⁶Kenermek kumarciciqua Magog-ami cen̄ami-llu tamalkuan yuut elluiluteng uitaviitni, tamarmeng-llu nallunrirciqaat wiinga ATANRUCIQA.

⁷Tanqilria atqa nallunrirceciiqaqa Israel-aam yuinun, cali-llu atqa caunrilkumavkanqiggngaunaku. Nutaan atanruviit nallunrirciqaat wiinga, ATANEQ tanqilriarulua Agayutkuciqa Israel-aamun.”

⁸ATANEQ Agayun qanertuq, “Erneq tauna qanrutkelqa pinritevkenani tekiciiquq.

⁹Yuut nunarpaini Israel-aam uitalriit anluteng avurciqait pegingalriit anguyagtet caskuit muraknaluki. Kenermek kumartelarciqut murirluteng capurautnek, urluvernek, pitegcautnek, pananek, kaugtuutarnek-llu, murakelararkauluki-llu tamakut allrakuni malrunlegni.

¹⁰Muragkameggnek avuqiyuiruciiqut yuilqumi wall'u napalilriami nunami napanek muraggnanrirluteng, tamakunek caskullernek muragkangqerrameng. Uayartekelteng uayarciqait.” ATANEQ Agayun waten qanertuq.

¹¹“Tuani ernermi Gog-aq cikirciqaqa nunamek tungmaggvigkaanek Israel-aam nuniini, calaralirnerani Dead Sea-m aterpagingalriamek, Elraulriit Kuignayuat. Gog-aq tamarmeng-llu anguyagtai tungmagcimaciqut tuani, tauna-llu kuignayuk aterpagcimaciquq, ‘Kuignayuat Gog-am Anguyagtain.’

¹²Israel-aam yuin tamakut tuqullret elauciiqait iraluk malruk aturlukek, nuna-llu ataam menuirutelluku.

¹³Tamarmeng yuut ikayuqluteng elauciiqait, taukut-llu assilriakun umyuaqumaciqut tuaten pillratnek tuani ernermi qakvautemni. Wiinga, ATANEQ Agayun qanertua.

¹⁴Iralut-llu malrunelgen pellukata, cucuklirciqut angutnek ayagaarkanek tamaani nunami yuaresqelluki elaucimaksailngurnek tuqumalriit temaitnek tamakut-llu elautesqelluki, nuna tamana menuirutesqelluku.

¹⁵Tamaaggun ayagakuneng yuum enranek nalaqutaqameng nallunailkucilarciqait elauciarkanun elautesqelluki Kuignayuatnek Gog-am Anguyagtain aprumalriamun.

¹⁶(Nunarrartangqerciquq yaaqsigpek'nani anguyagten̄un umyuaqutngulriamek.) Tuaten piluteng menuiruceciiqaat nuna.”

¹⁷ATANREM Agayutem qanrutaanga, “Tuquarkaulriami yugmi, qayagaurki yaqulget ungungssiaraat-llu tamalkuita naken tamiinek tailuki neryartuusqelluki tuqutarkat kemgitnek uptellemnek ellaitnun neresqelluki. Nerevkaritnguciquq angelriaruluni ingriini Israel-aam, tuani ner'arkauluteng kemegnek merluteng-llu augmek.

¹⁸Ner'arkaugait anguyagtet kemgit merluteng-llu augitnek nunam atanirturtain, tamakut tuqucimaarkaungata qusngirngalngurcetun wall'u qusngiyagartun wall'u qusngitun, wall'u uqurilriatun angucalutun kuluvagtun.

¹⁹Tuquskumki tamakut yuut elliitetun tuqutarkatun ungungssitun, yaqulget ungungssit-llu ner'arkaugait uquit caviirulluteng merluteng-llu augmek taangiqvimeggnun.

²⁰Estuulumni nerciqut caviirulluteng horse-aanek, ekumastaitnek, anguyagten̄ek-llu cali. Wiinga, ATANEQ Agayun qanertua.”

²¹ATANEQ qanertuq, “Atanruvignun tangerceciiqaqa ucurnarquciqa nasvilluki-llu qaillun piniqa aturluku piciurcet'lauciat wiinga pitalqellriit picirkangutenka.

²²Tuaken-llu ayagluteng Israel-aam yuin nallunrirciqaat wiinga ATANEQ ellmeggnun Agayutkuciqa.

²³Atanruviit nallunrirciqaat Israel-aam yuin nunameggnek ayagcecimallruciat assiilngillerteng wangnun pitekluku. Wiinga-wa tunutellrukenka inglukestaitnun cirlakevkarluki tuqurqevkarluki-llu anguyagkun.

²⁴Cikillruanka pinarqutiitnek menuurtellrat assiilnguq-llu atullrat pitekluku, wiinga-llu tunutellruanka.”

²⁵ATANEQ Agayun qanertuq, “Watua tau͡gaam naklekciqanka Jacob-aam kinguvri, Israel-aam yui, ataam-llu tukuurtelluki. Wiinga atqa caarrluurcessngaitaqa.

²⁶Nunameggni ataam uitangkuneng alingniurpek'nateng, kitumek aniqlaastaunateng, kasngunarqucillerteng piciunritlerteng-llu wangnun nalluyaguciiqaat.

²⁷Nasvitnaluki amlleret atanruviit wiinga tanqilriarucimnek, yuunka ut'ruciiqanka nunanek inglukestaita uitaviitnek.

²⁸Nutaan-llu yum'a nallunrirciqaat wiinga, ATANEQ ellaita Agayutkucirteng. Man'a nallunritarkaugaat, tua-i-wa wiinga ayauceqaarluki teguaruvkarluki ataam quyurtelluki ut'rutellruamki nakmiin nuniitnun, atauciungraan pinritevkenaku.

²⁹Anerneqa kuvciqaqa Israel-aam yuinun watqapik-llu tunutenqiggngaitanka. Waten qanertuq ATANEQ Agayun.”