Read Yupik Ezekiel 4 Bible Online

Ezekiel 4 - Yupik bible

Ezekiel 4

¹Agayun qanertuq, Tuquarkaulriami yugmi, aqvaten teggalquliamek ciuqerpenun-llu elliluku, qaingakun-llu cet'raluten nunarpaguamek pilinguarluten Jerusalem-aamek.

²Tua-i-llu tarenraliluku nunarpiim kassugusngallra, ilutulrianek elliiluten, nunamek-llu qertuluni taqumalriamek, pelateka'arvignek, uqamailngurnek-llu muragpagnek casgut navgurcuutaitnek uivetmun.

³Cavigmek-llu manigyaarmek tegulluten elliluku qacarnertun ayuqluku akulevtegnun nunarpaguaq-llu. Elpet caumaluku nunarpaguaq. Anguyagtet kassugusngaat, elpet tua-i taunguluten kassugusngastii nunarpiim. Una nallunailkutauciquq Israel-aam yuinun.

⁴“Tua-llu inarten iqsulirneren atliqluku, elliciqaqa-llu Israel-aam yuin anucimirqecetaarutiit elpenun; tuaten inangqallerpet taktaciatun anucimirqecetaarutkaat elpet aturciqan.

⁵Ernernek yuinarnek akimiaq cetamanek qulnek cipluku (390) cuq'lirluten piamken, amllertaciluki allrakut ellaita anucimirqecetaarumallerkaat. Tuaten pitalriamek elpet aturciqan anucimirqecetaarutkaat Israel-aam yuin.

⁶Taukut-llu erenret iqukliskata cali aipiriluten inarciiquten, tallirpilirneren atliqluku, aturluku-llu Judah-m anucimirqecetaarutkaa. Ernerni yuinaagni malrugni tuaten inangqaarkauluten, erneq atauciq allrakutun ataucitun pitaarkauluni.

⁷“Tangvaggu avatairumallra Jerusalem-aam. Tengluun arulalluku nunarpiim tungiinun, qalarutniaran ciunerkaanek.

⁸Wii qillerqeciqamken mumigcesciigatevkarluten nunarpiim kassugusngallran taktaciatun.

⁹“Kitaki tegulluten mukaarkamek wheat-amek, barley-mek, papinek, lentil-aanek, millet-aamek, spelt-amek-llu, qantamun-llu ekluki avukulluki kelipaliluten. Inangqallerpet taktaciatun, ernerni yuinaat akimiaq cetamanek qulnek cipluku (390), tuaken nerlarciquten.

¹⁰Ernerpak neqkarpet uqamaltacia cuqcimaciquq pingayunlegnek ounces-aanek; ataucirqumek nerlarciquten ernerpak.

¹¹Meq-llu merkan cuqcimaciquq malrugnek saskagnek, ernerpak ataucirqumek mel'arciquten.

¹²Tauna-llu ner'arkaugan yugnun tangvagtelluten, uuqaarluku murirluten kinreskainek yuut anaitnek.”

¹³ATANEQ-llu qanertuq, “Mat'um nallunairaa Israel-aam yuin nerlallerkaat menuulrianek Alerquutem inerquusngakainek[1] peksageskumteng nunakumanrilngurnun allanun.”

¹⁴Wiinga-llu qanertua, “Arenqiapaa, ATANEQ Agayun! Wiinga-tang menuurteksailngua wangnek; ayagyuarraanemnek una engelkarrluku nereksaitua camek ellminek tuqullermek, wall'u ungungssit allgullratnek, wall'u kemegmek assiitellriamek iqmiksaunii.”

¹⁵Tua-i Agayun qanertuq, “Kitaki-wa tua-i, kuluviit anaitnek murilarceciiqamken yuut anaitnek pivkenak, tamakut aturluki kelipalilarniartuten.”

¹⁶Cali-llu qanrutaanga, “Tuquarkaulriami yugmi, kelipautairucetqataranka Jerusalem-aam yui. Tuanelnguut yuut nanikuaciqut ciunerkairulluteng cuq'lirluteng nerlangkuneng mer'aqluteng-llu.

¹⁷Waten piciqanka nuuqit'ngevkarluki neqkaitnek mermek-llu, tangertaagutesqelluki-llu ciunerkaunaki, kemgiutesqelluki-llu anucimirqecetaarumallratni.”