Read Yupik Ezekiel 40 Bible Online

Ezekiel 40 - Yupik bible

Ezekiel 40

¹Erenri allrakum qulngurteqerluki, taum-llu nalliini allrakut yuinaq tallimanek (25) cipluku amllertariluteng ayaucimarranemten̄ek nunamten̄ek, akimiarunritaraurrluteng-llu allrakut Jerusalem-aaq teguarurqaanranek. Tuani ernermi ATANERMUN nayuuciqa cakneq elpekumallruaqa.

²Tangrruartellua Agayutem ayautaanga Israel-aam nuniinun ellilua-llu qertuqapigtellriamun ingrimun. Ciuqamni-llu tangertua enenek tangellrat nunarpauciqnganani.

³Tuavet malkaniutaanga, tangertua-llu angutmek qitngirnaqluni punernertun. Cuqcissuutegnek tegumiarluni aipaa 'lumarrauluni aipaa-llu murauluni nangerngaluni ikirtuqam caniani.

⁴Taum angutem qanrutaanga, “Tuquarkaulriami yugmi, tangvakina, niicugninqegcaarluten-llu, murilkenqegcaarluki-llu nasvagarkanka elpenun, tua-i-wa una pitekluku taicimallruavet. Tangelten tamalkuita qanrutekniaten Israel-aam yuinun.”

⁵Tauna tangelqa Agayuvigpaullruuq, qacarnertarluni elatii kassuggluku. Taum-llu angutem cuqcissuutni murak teguluku, it'ganernek qulnek taktalria, qacarneq cuqtaa. Tamana-llu qacarneq qulnek it'ganernek quyigtalliniluni, cali it'ganernek qulnek mamtutaluni.

⁶Tua-llu ayagtuq iteryaramun calaram tunglirneranelngurmun. Akerteggun mayurtuq, kangllicamiki-llu iteryaraq cuqtaa; it'ganernek qulnek mamtutaluni.

⁷Taum-llu yaatiini tarracarartarluni, taquuk nayurvignek enetarlutek pingayutaarlutek. Tamakut enet yaassiigenqeggameng it'ganernek qulnek cuqengqerturluteng qacarneri, enet-llu akulaita qacarnerit it'ganernek pingayunlegnek mamtutaluteng. Taukut-llu enet nayurviit cali yaatiit tarracarartarluni it'ganernek qulnek taktalriamek. Tamatum-llu tarracaram iqua iteryarartarluni caumaluku Agayuvigpak.

⁸Tauna-llu ena maaten cuqtaa akimiarunrita'arnek it'ganernek ilututaluni. Iteryaram taum ilakluku canimellrulriim Agayuvigpagmun, taum-llu iquan qacarneri cetamanek it'ganernek mamtutaluteng.

⁹

¹⁰(Taukut nayurviit enet tarracaram taqruani uitalriit angtatku'rtut, qacarneret-llu akulaitni mamtutatekluteng.)

¹¹Tuamta-llu taum angutem cuqtaa tarracaraq tuani iteryarami. Tauna-llu tamarmi it'ganerluni yuinaq malrugnek cipluku, (22) taukuk-llu ikingqalriik iteryarak akuliik it'ganernek akimiaq ataucimek cipluku pitaluni.

¹²Taukut-llu nayurviit enet ciuqerrit pitangqe'rturluteng qertunrilngurnek qacarnernek yuinarnek cuqyaarnek qertutaluteng, tuaten-llu cali pitalriamek mamtutaluteng. (Taukut-llu enet ayuqluteng qulnek it'ganernek taktaut, iqtutaluteng-llu.)

¹³Tua-llu cali cuqtaa enem egkuanek ayagluku akiqlian enem egkuanun, tauna-llu pitaluni it'ganernek yuinaak malruk malrugnek cipluku (42).

¹⁴Ena iquqlikacaar anumaluni enem elaqlianun qilailngurmun. Tauna-llu ena cuqtellrani yuinaq akimiarunrita'armek cipluku (34) it'ganernek iqtutaaqluni.

¹⁵Iteryaram-llu taum taktacia tamarmi elalirnermek qacarnermek ayagluni akianun nangneqliim enem yaaqsinrulriamun qacarneranun yuinaat cetaman cetamanek cipluku (84) pitaluni.

¹⁶Egalertarluteng-llu tamakut tamarmeng enet elalirneret qacarnerit enet-llu cali akulaitni qacarnerni. Palm-anek napanguanek qaraliliumaluteng pekcaram tungiinelnguut qacarneret.

¹⁷Taum angutem itrutaanga iteryaraakun carr'ilnguum. Tauna-llu enetarluni yuinaq qulnek cipluku (30) taqumaluteng elalirnermi qacarnermi, ciuqerrat carr'ilqauluni qalliliumalriamek teggalqunek,

¹⁸tamatum tutmaryaram avatairumaluku enem elaqlia. Tauna-llu elaqlia enem qilailnguq aciqsinruuq iluqlirmi enem elaqliani.

¹⁹Iteryarartarluni-llu quyinrulriamek iteryarauluni iluqlirmun enem elaqlianun. Taum-llu angutem cuqtellrani iteryarak akuliik yuinarnek malrunlegnek pingayunlegnek cipluku (168) pitaluni.

²⁰Iteryarartarluni-llu neglirnermi tauna elaqlirmun enem elaqlianun anyarauluni. Taum angutem cuqtak, taktacia iqtutacia-llu.

²¹Tarracaram-llu avategkeni pingayun enet qacarnerita-llu cuqnerit ayuqluteng calaralirnermi iteryarami uitalriacetun. Iteryaraq tamarmi cuqerluni taktacia yuinarnek cetamanek cetamanek cipluku (84) it'ganernek, yuinaak-llu malruk malrugnek cipluku (42) it'ganernek iqtutaluni.

²²Ena-llu itqerraaryaraq, egalri-llu, tangnircautai-llu ayuqluteng calaralirnerem iteryaram piicetun. Malrunlegnek akertarluni iteryaramun, itqerraaryaraq ena iquani uitaluni enem elaqlia caumaluku.

²³Akiani-llu taum neglirnermi enem elaqliani iteryaram, allamek iteryarartarluni iluqlirmun enem elaqlianun calaralirnermi uitalriatun ayuqluni. Taum-llu angutem cuqtellrani taukuk iteryarak akuliik it'ganerluni yuinaat pingayunlegen pingayunlegnek cipluku (168).

²⁴Tuamta-llu taum angutem ayautaanga ungalalirnermun, tuani-llu cali iteryarartarluni. Cuqtaallrani-llu iluani qacarneret itqerraaryaraq-llu ena ilamegcetun ayuqluteng.

²⁵Tuani-llu cali iteryarami enet cali egalerluteng ilamegcetun. Taktacia iteryaram it'ganerluni yuinaat cetaman cetamanek cipluku (42).

²⁶Malrunlegnek-llu mayuryarartarluni tuavet, itqerraaryaraq-llu ena cali iquani uitaluni. Iluqliit qacarneret tarracaram avategkeni tangnircaumaluteng napanguanek.

²⁷Tuani-llu cali iteryarartarluni iluqlirmun carr'ilngurmun. Cuqtellrani-llu taum angutem tuavet iteryaram aipaanun it'ganerluni yuinarnek pingayunlegnek pingayunlegnek cipluku (168).

²⁸Taum angutem itrutaanga ungalalirnermi uitalriakun iteryarakun iluqlirmun enem elaqlianun. Cuqluku-llu iteryaraq, taum-llu angtatekluki elaqlirmi qacarnermi iteryarat.

²⁹Enet tuani nayurviit, ena-llu itqerraaryaraq, iluqliit-llu qacarnerin angtatekluki allat iteryarat piit. Enet-llu tuani iteryarami cali egalerluteng. Tauna-llu taktaluni yuinaak malruk cetamanek cipluku (84) it'ganernek, yuinaak-llu malruk cetamanek cipluku (42) iqtutaluni.

³⁰

³¹Itqerraaryaram enem caumaluku alla enem elaqlia, palm-anek-llu napanguanek qaraliliumaluni tarracaram qacarnera. Akertarluni pingayunlegnek tuss'arartalegmek tauna iteryaraq.

³²Angutem taum itrutaanga calaralirnermun iteryarakun iluqlirmun enem elaqlianun. Cuqtellrani-llu iteryaraq ilamitun angtaluni.

³³Nayurviit enet, itqerraaryaraq ena, iluqliit-llu qacarneri iteryarat allat piicetun angtaluteng. Kassutmun egalerluni itqerraaryarami-llu cali enemi. Tauna-llu taktaluni yuinaat cetaman, cetamanek cipluku (84) it'ganernek, yuinaak-llu malruk malrugnek cipluku (42) it'ganernek iqtutaluni.

³⁴Itqerraaryaram enem caumaluku elaqliq enem elaqlia. Palm-anek napanguanek qaraliliumaluni tarracaram qacarnera. Akertarluni pingayunlegnek tuss'aralegmek tauna iteryaraq.

³⁵Taum angutem ayautaanga neglirnermun iteryaramun. Maaten iteryaraq tauna cuqtaa ilamitun angtaluni.

³⁶Ayuqluki-llu tamakut nayurvignek enetarluni, tangnircaumaluteng-llu iluqliit qacarneri, itqerraaryaramek enetarluni, kassutmun-llu egalerluni. Yuinarnek cetamanek cetamanek cipluku (84) it'ganernek taktaluni it'ganernek-llu yuinaak malruk malrugnek cipluku (42) it'ganernek iqtutaluni.

³⁷Itqerraaryaram enem caumaluku elaqliq enem elaqlia. Napanguanek qaraliliumaluteng tarracaram qacarneri. Pingayunlegnek akertalegmek mayuryarartarluni tuavet iteryaramun.

³⁸Elaqlirmi enem elaqliani ilaartangqertuq ilausngalriamek iluqlirmun iteryaramun neglirnermi tauna-llu iteryarangqerrluni itqerraaryaramun enemun enem elaqlia caumaluku. Tauna-llu eruriviuluni ungungssinek tamalkuuciicetun ekuagarkanek.

³⁹Tuani itqerraaryarami enemi cetamanek estuulurtarluni malrutaarluteng akiqliqluteng enem qacarnerani. Tamakut qaingitni tuqutelarait ungungssiit ekualuki elliitekat, ilait ekuamaarkauluki tamalkuuciicetun, ilait-llu assiilnguirutekluki, cali-llu ilait akiilnguirutekluki.

⁴⁰Taum-llu enem cali elatii cetamanek estuulurtarluni, malrutaarluki ellimaluteng neglirnerem iteryaram avategkenun.

⁴¹Tapeqluteng pingayunelguluteng estuulut ungungssinek elliitekanek tuqucivigkat: cetaman enem iluani cetaman-llu enem elaqliani.

⁴²Taukut-llu cetaman estuulut enem ilaarani uitalriit piliaqumaut teggalqumek pikiuramek. Yuinarnek (20) cetyaarnek quyigtaluteng qaingit-llu yuinaq qulnek cipluku (30) cetyaarnek atunem cuqengqerrami yaassiigenqeggluni. Caskut-llu tuqucissuutait ekuagarkanek ungungssiarnek taukut estuulut qaingitni uitauratuluteng.

⁴³Taukut-llu estuulut qaingita avatait qurrluryailkuciumaluteng kassuggluki pingayunek cetyaarnek iqtutalrianek. Tamalkuita-llu kemget elliitekat ellilarait taukut estuulut qaingitnun.

⁴⁴Tua-llu ayautaanga iluqlirmun enem elaqlianun. Malrugnek enetangqertuq ikirtuqalgegnek tuavet iluqlirmun enem elaqlianun, atauciq ungalatmun caumaluni iteryaram neglirnermi canianelnguq, aipaan-llu neglirneq caumaluku ungalalirnermi iteryaram canianelnguum.

⁴⁵Taum angutem qanrutaanga tauna ena ungalatmun caumalria agayulirten̄un enekniluku Agayuvigpagmi kevgiulrianun.

⁴⁶Tauna-llu negetmun caumalria ekuavigmi kevgiutulinun enekniluku. Tamarmeng-llu agayulirtet Zadok-aam kinguveqluki, kiimeng Levi-am kinguvrinek ATANREM ciuqerranun piyugngalriaruluteng kevgiurnaluku.

⁴⁷Taum angutem iluqliq enem elaqlia cuqtaa, yassiigenqegtuq yuinarnek pingayunlegnek pingayunlegnek cipluku (168) it'ganernek cuqerluni. Agayuvigpak kanaknalirnermi uitaluni ciuqerra ekuavigtarluni.

⁴⁸Ayautaanga Agayuvigpagmun iteryaramun. Cuqluku-llu iteryaraq: qulngunrita'arnek it'ganernek ilututaluni yuinaq-llu cetamanek cipluku (24) it'ganernek iqtutaluni, qacarnerluni-llu atunem avategmikun tallimanek it'ganernek mamtutalriignek.

⁴⁹Akertarluni itqerraaryaramun enemun, tauna yuinak akimiarunrita'armek cipluku (34) it'ganernek iqtutaluni yuinarnek-llu (20) it'ganernek ilututaluni. Malrugnek naparyartarluni atunem iteryaram avategkeni.