Read Yupik Ezekiel 41 Bible Online

Ezekiel 41 - Yupik bible

Ezekiel 41

¹Tua-llu taum angutem ayautaanga qukaqlirmun enemun tauna-llu ena qigcignarqellriaruluni. Tuavet-llu ayagyaraq maaten cuqtaa qulnek it'ganernek ilututaluni

²akimiaq pingayunek cipluku iqtutaluni qacarneq-llu atunem avategkeni pingayunlegnek it'ganernek mamtutalutek. Ena-llu cuqtellrani yuinarnek pingayunek pingayunlegnek cipluku (68) it'ganernek taktaluni yuinaq-llu akimiarunrita'armek cipluku (34) iqtutaluni.

³Tua-llu iluqlikacaarmun enemun itertuq. Tuavet-llu ayagyaraq cuqtaa: tauna it'ganernek pingayunek et'utauq qulnek-llu it'ganernek iqtutaluni qacarnerek-llu atunem avategkeni qula malrugnek cipluku it'ganernek mamtutalutek.

⁴Ena-llu tauna cuqtellrani taketmun iqtutmun-llu pitatekluni cuqerluni yuinaq akimiarunrita'armek cipluku (34). Tauna-llu ena enem qukaqliim iluqliqluku. Taum qanrutaanga, “Una ena iluqliq Qigcignarqeqapiaralriaruuq.”

⁵Taum angutem cuqtellrani Agayuvigpiim qacarneran iluqlia mamtutauq qulnek it'ganernek. Tamaani-llu qacarnermi enecuartarluni Agayuvigpiim avatii kassuggluku malrunlegnek it'ganernek iqtutalrianek.

⁶Taukut-llu enet pingayuluteng qulliqellriaruut yuinaq qulnek cipluku (30) enetangqerturluteng. Agayuvigpiim-llu elaqliq qacarnera taukut qulliqellriit enet uitaviat atlirmi mamkillruluni enet tamakut qacarnermi uitayunarqevkarluki ussukcaucimanrilengraata.

⁷Taumek Agayuvigpiim qacarneri elalirnermek tangellriani mamtutatekellriatun qulmun ayuqellria. Elalirnermi-llu Agayuvigpiim qacarnerani akertarluni iqtulriignek taukut enet elalirneratni aciqlirmek enemek mayuryaraurrluni qullirnun.

⁸Elalirneret qacarnerit tamakut enet pingayunlegnek it'ganernek mamtutaluteng; ataucimek amiigluteng enet Agayuvigpiim neglirnerani uitalriit, ataucimek-llu cali ungalalirnermi uitalriit. Tangllemni tuss'arartarluni pingayunlegnek it'ganernek iqtutalrianek avatii Agayuvigpiim; qulnek it'ganernek quyigtaluni nunamek, tamakut-llu enet Agayuvigpiim qacarnerani uitalriit tusnganrita quyigtatekluku. Akuliigni-llu tamatum tuss'aram enet-llu agayulirtet atutukiita carr'ilngurmek pitarluni yuinaq qulmek cipluku (30) taktaluni avategkeni Agayuvigpiim.

¹²Tamatum carr'ilnguum amani iquani kanaknalirnerani Agayuvigpiim enetangqertuq yuinaat malrunelgen qulnek cipluku (150) it'ganernek taktalriamek yuinarnek-llu tallimanek akimiaq ataucimek cipluku (116) it'ganernek iqtutaluni. Qacarneri-llu qulngunrita'arnek it'ganernek mamtutaluteng kassutmun.

¹³Taum angutem cuqtaa Agayuvigpiim elalirnera, yuinarnek pingayunlegnek pingayunlegnek cipluku (168) it'ganernek taktaluni. Agayuvigpiim-llu tunuanek carr'ilnguq qerarluku enem iquanun kanaknalirnermi cali yuinarnek pingayunlegnek pingayunlegnek cipluku (168) it'ganernek pitaluni.

¹⁴Agayuvigpiim-llu cali ciuqerra akitmun carr'ilnguuk taquugkeni ilaklukek cali cuqii tuaten pitaluni.

¹⁵Kanaknalirnermi-llu enem taktacia cuqtaa atunem avategkeni qilakutak tapeqlukek. Tauna cali yuinarnek pingayunlegnek pingayunlegnek cipluku (168) it'ganernek cuqerluni. Agayuvigpagmun iteryaraq Qigcignarqelria Ena, Qigcignarqeqapiaralria-llu Ena

¹⁶muragmek iluqliliumauq natranek ayagluku egalret tekilluki. Taukut-llu egalret patungqerrsugngaluteng.

¹⁷Agayuvigpiim-llu iluan qacarneri qaraliliumaluteng tamarmeng

¹⁸palm-anek napanguanek cherub-aanek-llu. Kipullgutaagulluteng palm-at napanguat cherub-aat-llu ena kassuggluku. Tamakut-llu cherub-aat malrugnek kegginarluteng;

¹⁹yinrarmek kegginamek caumaluku palm-aq napanguaq, yugtutulinrarmek-llu cali napanguaq alla caumaluku akilirnermelnguq. Tuaten ayuqurluteng kassuggluku tamana qacarneq

²⁰natermek ayagluteng ikirtuqat qulirnerit tekilluki.

²¹Taum-llu qigcignarqellriim enem ikirtuqaan avatek yaassiigenqegglutek. Taum-llu qigcignarqeqapiaralriim Enem iteryaraan ciuqerrani pitarluni tuarpiaq

²²murauluni ekuaviuqatalria. It'ganernek tallimanek qertutaluni cetamanek-llu it'ganernek iqtutaluni. Kangirain napartai, atlirnera, caniqerri-llu tamarmeng muragmek taqumaluteng. Taum angutem qanrutaanga, “Una waniwa estuuluq ATANREM ciuqerrani uitatuli.”

²³Ikirtuqartangqertuq iquani amiguyam Qigcignarqellriamun enemun iteryaramek, iquani-llu cali ikirtuqartarluni Qigcignarqeqapiaralriamun enemun.

²⁴Malrutaarlutek-llu taukuk ikirtuqerlutek akiqliqellriignek qukamegnegun ikirtetulutek.

²⁵Taum-llu Qigcignarqellriim ikirtuqak qaraliliumalutek palm-anek napanguanek cherub-aanek-llu qacarneran qaraliicetun ayuqluteng. Muragmek-llu patuliumaluni elalirnerakun ikirtuqaan itqerraaryaram enem.

²⁶Qacarnerek-llu taum enem egalertarlutek, qacarneri-llu qaraliliumaluteng palm-anek napanguanek.