Read Yupik Ezekiel 42 Bible Online

Ezekiel 42 - Yupik bible

Ezekiel 42

¹Tua-llu agutaanga iluqlirmun carr'ilqamun enet akunliitnelngurmun, agullua-llu enemun Agayuvigpiim neglirnerani uitalriamun.

²Ena taktacingqertuq yuinaat pingayunelgen pingayunlegnek cipluku (168) it'ganernek, iqtutacia-llu yuinaat cetaman cetamanek cipluku (84) it'ganernek.

³Ataucim qacarnerem caumaluku yuinaq akimiarunrita'arnek (34) cipluku it'ganernek pitalria carr'ilqaq Agayuvigpiim canianelnguq, akiani-llu iliit qacarneret caumaluku tumyaraa elaqliim carr'ilqam. Pingayuuluteng enet qulliqellriit. Uum qullia tunuqsinruluni aciqlirmini.

⁴Neglirnerani enem tumyarartangqertuq akimiaq ataucimek cipluku iqtutalriamek, yuinarnek-llu pingayunlegnek pingayunlek-wa (168) taktacia it'ganerluni, amiigluni taum tunglirnerakun.

⁵Iluqliit enet qullik'acagaani taum nerpiim, iqkillruluteng qukaqliim aciqliim-llu iluqliigkeni, kiaqsinruluteng uitiimeng.

⁶Piliaqumiimeng pingayuuluteng enet qulliqellriit, naparyaunateng allacetun enetun tuani carr'ilqami.

⁷Aciqlikacaarmi enemi elalirneq qacarneq enetaunani enem taktacian avga aturluku, it'ganret yuinaat cetaman cetamanek (84) cipluku; avga enetarluni. Qullik'acagaq tamarmi enem iluqliinek enetarluni.

⁹Aciatni makut enem iluqliin calaralirnerani enem iquan, carr'ilqam qacarneran ayagnillrani, amiigtangqertuq elaqlirmun carr'ilqamun. Ungalalirnerani Agayuvigpiim allamek enetangqertuq taum enem ayuqiinek yaaqsinrilkiini enem kanavalirnerani iquan Agayuvigpiim.

¹¹Ciuqerratni enet tumyarartangqertuq neglirnermi uitalriim ayuqiinek. Angtaciatun angtaluni, amiigi-llu ayuqluki.

¹²Amiigtangqertuq aciatni enem iluqliin ungalalirnerani enem, calaralirnermi qacarneret ayagnillrata.

¹³Angutem-llu qanrutaanga. “Tamarmek ukuk enek tanqilriaruuk. Iluagni agayulirten͞gunret itellriit ATANREM uitauvianun nerlartut tanqilrianek elliitnek. Enem iluqlii tanqilriaruata, agayulirten͞gunret elliciqait tanqinqurrait elliitet tuavet: elliitet mukaarkanek ekuagarkat-llu elliitet assiilngurmun wall'u au͡g'aritnguluteng elliitet.

¹⁴Agayulirten͞gunret Agayuvigpagmi uitarraarluteng anyugaqameng elaqlirmun carr'ilqamun, makunun enem iluqliinun unitarkaugait tanqilriit aturat atulteng kevgiullermeggni ATANEQ. Allanek aturanek at'arkaugut anvailegmeng yuut quyurrvik'lallratnun.”

¹⁵Angutem-llu taqngami cuqtaarraarluku angtacia iluan Agayuvigpiim, anutaanga calaralirnerkun casgukun cuqtaarluku-llu elatii.

¹⁶Cuqcissuun teguluku cuqtaa calaralirneq, yuinarnek arvinlegnek (840) it'ganengqertuq.

¹⁷Tuamta-llu cuqtaa negeqvalirneq, ungalalirneq, kanavalirneq-llu; tamarmeng qacarneri taktatekluteng, tiissitsaam avga yuinarnek qula malrugnek cipluku (840) it'ganernek,

²⁰tuaten piami qacarnerem avaciumaluku carr'ilqaq, qacarneret tamarmeng taktaluteng tiissitsaam avga yuinarnek qula malrugnek cipluku (840) it'ganernek. Qacarnerem ilakusngavkarpek'naku tanqilria tanqilriarunrilngurmek.