Read Yupik Ezekiel 43 Bible Online

Ezekiel 43 - Yupik bible

Ezekiel 43

¹Kinguakun taitaanga iteryaramun, calaram tungiinun caumalriamun.

²Tangerrluku-llu ucurnaa Agayutiin Israel-aam taiguq calaramek; agiirtellran-llu nepii ayuquq imarpiim nepiitun; nuna-llu ciqinqertuq ucurnaanek.

³Tangrrualqa-llu ayuquq tangrruallemtun Agayun taillrani Jerusalem-aaq nunarpak piunrircarturluku, tangrruallemtun-llu Chebar-am Kuigani; palurtua-llu kegginamnun.

⁴Ucurnaa ATANREM itellrani Agayuvigpagmun iteryaram calaramun caumalriim caniakun.

⁵ATANREM Anerneran naluglua taitaanga iluqlirmun carr'ilqamun; tangerrluku-llu ucurnaan ATANREM imiraa Agayuvigpak.

⁶Angun-llu nangerngallrani canimni, niitaqa ATANEQ qanelria wangnun Agayuvigpagmek.

⁷Qanertuq-llu wangnun, “Tuquarkaulriami yugmi, una uitavikaa atanruvima aqumllerem, it'gama-llu tusngavikaa, uitavigkaqa Israel-aam yui ilagarluki akwarpak. Israel-aam-llu yuin kasngunarinqiggngaitaat tanqilria atqa, ellaita, angayuqrita-llu, akissuullermegteggun, tuqumalriatgun-llu atanermeng temaitgun.

⁸Ellillermegteggun amiimeng tuc'arait canianun amiima tuc'araan, amiimeng-llu naparyait caniatnun amiima naparyain. Kasngunarillruat tanqilria atqa pellernarqelriamegteggun ellaita atullermegteggun, taumek ellait piunrillruanka umyuama qenertellrakun.

⁹Au͡g'arnarqait agayutnguateng tuqumalriit-llu angayuqameng temait yaaqsikemnun, wiinga-llu uitaciqua akunliitni akwarpak.

¹⁰“Elpet-llu, tuquarkaulriami yugmi, Israel-aam yuinun qanrutkiu ayuqucia Agayuvigpiim tangellran qaillun ayuqucia qaillun-llu piliaqumallra, ellaita assiilnguteng kasnguyuutekniarait.

¹¹Ellait-llu kasnguyukata tamalkuitnek caliallermeggnek, aperturru Agayuvigpiim piliaqumallran, qaillun ayuqellran, iteryarai anyarai-llu, tamalkuan-llu elucia; aperturluki-llu tamalkuitnun picirkiutai alerquutai-llu; igaulluku-llu takuatni, maliggnaurait aturluki-llu alerquutai picirkiutai-llu tamalkuita.

¹²Una picirkiutekaa Agayuvigpiim: tamarmi nuna avatiinelnguq ingrim kangrani tanqilriaruarkauguq. Tangerrluku, una picirkiutekaa Agayuvigpiim.”

¹³Ukut cuqkai elliiviim, cuqyutain Agayuvigpiim cuqyutai aturluki. Uivetmun elliivik qurrluryarartangqerrarkauguq yuinarnek cetyaarnek et'utaluni yuinarnek-llu cetyaarnek iqtutaluni, cen̄ii elalirneq cetyaarnek qulnek qertutaluni.

¹⁴Aciqlikacagii elliiviim ingelqaan, tusnganrem kangranek, quyigtaarkauguq cetamanek it'ganernek. Tunglia-llu nanillruluni cen̄iinek cetyaarnek yuinarnek uivetmun, it'ganernek-llu malrunlegnek quyigtaluni. Tunglia-llu cali ingelqaam nanillruluni cen̄iinek cetyaarnek yuinarnek uivetmun.

¹⁵Elliiviim-llu ekuavia, cali quyigtaluni malrunlegnek it'ganernek, ekuavianek-llu napaluteng, cetaman-llu kangirat kangrani ayuquq cirunritun angucalum kuluviim.

¹⁶Elliiviim-llu ekuavia yaassiigenqellriamek pitangqerrarkauguq, yuinarnek it'ganernek taktaluteng atunem qacarneri.

¹⁷Ingelqaa-llu qukaqliq yaassiigenqeggarkauguq avatai tamarmeng yuinaq cetamanek it'ganernek taktaluteng, cen̄ii elalirnermi qulnek cetyaarnek quyigtaluni. (Qurrluryaraq cetyaarnek yuinarnek iqtutaluni.) Akri elliiviim calaratmun caumaarkaugut.

¹⁸ATANEQ Agayun qanertuq wangnun, “Tuquarkaulriami yugmi, niicugniu qanelqa elpenun. Elliivik qaqiskan, atawaqercetarkaugan ekualuki elliitetgun qaingani, ceqvallertarluku-llu qainga augatnek ungungssit elliitekumalriit.

¹⁹Agayulirtet Levi-am ilakellriartainek, Zadok-am kinguvri, kiimeng uitavimnun taigarkaugut kevgiuryarturlua. Wiinga, ATANEQ Agayun man'a pisqutkaqa. Cikirarkaugaten ayagyuamek angucalumek kuluvagmek elliitekaatnek ekualuku assiilnguut pitekluki.

²⁰Elpet-llu teguarkaugan augan ilii, minguulluku-llu cetamanun cirunrinun elliiviim, cetamanun-llu kangirainun ingelqaam, cen̄iinun-llu; tuaten menuircarciqan elliivik atawaqertelluku-llu.

²¹Teguarkaugan-llu angucaluq kuluvak assiilnguum elliitii, ekualuku-llu apertuumalriami Agayuvigpiim elatiini.

²²Erenrem-llu aipaani elliigarkauguten angucalumek qusngirngalngurmek natlugnerilngurmek assiilnguum elliitiinek; elliivik-llu menuircarluku auganek menuircaumallratun angucalumek kuluvagmek.

²³Taqkuvgu-llu menuircallra, elliigarkauguten ayagyuamek angucalumek, ayagyuamek-llu qusngirngalngurmek, tamarmek natlugnerilnguugnek.

²⁴Tun'arkaugaten-llu ATANERMUN, agayulirtet-llu kanveciqait taryumek elliitekluki-llu ekualuki ATANERMUN.

²⁵Ernerni malrunlegni elliilararkauguten qusngirngalngurmek assiilnguum elliitiinek; angucalumek-llu kuluvagmek, qusngirngalngurmek-llu cali angucalumek. Tamarmeng natlugnerilnguugarkaugut.

²⁶Ernerni malrunlegni agayulirtet atawaqaasqerkaugaat elliivik menuircarluku, upluku atullerkaanun.

²⁷Qaqiskunegteki-llu makut erenret, ayagnirluteng erenret pingayunelgatni agayulirtet elliitekarkaugait elliivigkun ekualuki elliitet, uitanqegcitmun-llu elliitet; wiinga-llu ciuniurciqamci, qanertuq ATANEQ Agayun.”