Read Yupik Ezekiel 44 Bible Online

Ezekiel 44 - Yupik bible

Ezekiel 44

¹Tua-llu taum angutem ut'rutaanga Agayuvigpiim elaqlirmun iteryaraanun, calaraq caumakiinun; tauna iteryaraq palusngaluni.

²Qanrutaanga-llu, “Una iteryaraq patumaurciquq; ikircimaarkaunrituq, kina-llu iterngaituq aturluku; tua-i-wa ATANEQ, Israel-aam Agayutii, tuaggun itellruan; taumek patumarrlainararkauguq.

³Kiimi tau͡gaam atanerruaq ayagyugngauq tuavet neryartuquni kelipamek ATANREM ciuqerrani. Itrarkauguq elaturraakun iteryaram, tuaggun-llu an'arkauluni.”

⁴Agutaanga-llu neglirnerkun iteryarakun Agayuvigpiim ciuqerranun; kiarcama-llu tangrraqa, ATANREM ucurnaan imiumakii Agayuvigpak; wiinga-llu palurtua kegginamnun.

⁵ATANEQ-llu qanertuq wangnun, “Yugmi tuquarkaulriami, murilkenqegcaarki tamalkuita tangelten niitelten-llu. Qanrutqataramken alerquutainek picirkiutainek-llu Agayuvigpiim. Murilkenqegcaarki kinkut iteryugngaciit anyugngaciit-llu Agayuvigpagmek, kinkut-llu iteryugnganriluciit.

⁶“Qanrulluki-llu ingluciculriit Israel-aam yui, Waten qanertuq ATANEQ Agayun: Israel-aam yuini, taqiciki tamalkuita pellernarqelrialillerci.

⁷Itercetaqluki ilakenrilkeci nuugiumanrilnguut Agayuvigpamnun, pellernariluku, elliigaqavci wangnun neqkamnek, uqumek augmek-llu. Navellruarci akqutka, pellernarqelrialillerpecen̄un ilaulluku.

⁸Atanirtuqsaitaci-llu tanqilriit Agayuvigpamni piciryarat; tau͡gaam ilakumanrilngurnun ataniurcetaqluki.

⁹“Taumek qanertuq ATANEQ Agayun: Kina allaneq, nuugiumanrilnguq, allanret-llu Israel-aam yui ilagarluki uitalriit, iterngaitut Agayuvigpamnun.”

¹⁰Tau͡gaam Levite-at ayallret wangnek yaaqvanun, kevgiurluki agayutnguateng Israel-aaq wangnek avtellrani, anucimirqecetaarumaarkaugut.

¹¹Kevgaqciqanka Agayuvigpamni, cumigulluki murilkelluki iteryarai Agayuvigpiim, kevgiurluteng-llu Agayuvigpagmi; tuqucilararkaugut ekuagarkanek elliitnek yuut-llu elliitaitnek, caliarkaugut-llu yuut murilkelluki, kevgiurluki-llu.

¹²Ciuliqagtelaitki yuut agayuaqata agayutnguanun tamaaggun-llu paallagcetaarurrluteng Israel-aam yuinun, taumek akqiunga ellait piluki, qanertuq ATANEQ Agayun, anucimirqecetaarumaarkaugut.

¹³Ellait mallgusngaitut wangnun kevgiurnalua agayulirtetun, wall'u mallgusngaunateng canun wangnun tanqilrianun, wall'u iterngaunateng enemun Tanqinqukacaaralriamun. Man'a anucimirqecetaarutkaat pellernarqelriit calialteng pitekluki.

¹⁴Tau͡gaam elkarciiqanka Agayuvigpak murilkesqelluku, caliari tamalkuita caliaqluki cat-llu tamalkuita iluani caliarkat.

¹⁵“Tau͡gaam agayulirtet Levite-at yuinek, Zadok-aam kinguvri, murilkestellrit Agayuvima Israel-aam yui wangnek avtellratni, taigarkaugut wangnun kevgiuryarturlua; kevgiurarkaugaatnga-llu elliiviklua uqumek augmek-llu, qanertuq ATANEQ Agayun.

¹⁶Kiimeng itrarkaugut Agayuvigpamnun, kevgiurluteng-llu elliivimni, ciuliqaggluki-llu Agayuvigpagmi agayulriit.

¹⁷Itqunegteki casgui iluqliim carr'ilqam, aturarturarkaugut 'lumarraqegtaarnek; qusngit melquitnek pilimalrianek aturanek aturngaitut, kevgiullermeggni casguini carr'ilqam iluqliim, Agayuvigpiim-llu iluani.

¹⁸'Lumarraqegtaarnek-llu qamiquteng nemrarkaugait, cali 'lumarraqegtaarnek qerrulligluteng; canek naqugtarkaunritut kiiryugnarqelrianek.

¹⁹Anvailegmeng-llu elaqlirmun carr'ilngurmun yuut uitaviatnun, yuugarkaugait aturateng atulteng kevgiullermeggni, elliluki-llu tanqilrianun enenun; allanek-llu aturanek at'arkaugut, tanqilria yugnun aturamegteggun agtuutnayukluku.

²⁰“Qamiquteng asmeggngaitait meqluki, wall'u nuyateng taklirivkarluki; kiingan kepkanilararkaugait nuyateng.

²¹Agayulirta merngaituq wine-amek, itquni elaqlirmun carr'ilqamun.

²²Kassuusngaituq aipainermek, wall'u avvusngalriamek, Israel-aam tau͡gaam yuinek neviarca'rmek angutem agtuqsailkiinek, wall'u agayulirten͞gunrem aipainranek.

²³“Alerquagarkaugait yuunka ayuqenriluciagnek tanqilriim tanqilriarunrilnguum-llu, qaillun-llu nallunritlerkaak menuulriim menuilnguum-llu.

²⁴Umyuallgutkenrilngurnun cuqcisten͞guarkaugut, pitiit-llu cuqtarkaugaat alerquutenka maliggluki. Alerquutenka picirkiutenka-llu aturarkaugait tamalkuitni wii taqlemni kalukaryarani, Sabbath-aanka-llu qigcikarkaugait.

²⁵“Ellmeggnek menuurrngaitut agturallermegteggun yuk tuqumalria; tau͡gaam angayuqaqekunegteggu qetunraqkunegteggu, wall'u angun anelgutkekunegteggu, wall'u arnaq anelgutkekunegteggu uingeksailnguq agturyugngaat.

²⁶Menuurqaarluni ernerni malrunlegni uitaarkauguq, nutaan-llu menuirutarkauguq.

²⁷Tuani-llu ernermi itlermini tanqilriamun, iluqlirmun carr'ilqamun, kevgiuryarturluni tanqilriami, elliigarkauguq assiilngurmun elliitminek, qanertuq ATANEQ Agayun.

²⁸“Paitarkangqerrngaitut-llu; wiinga paitarkaqaatnga ellaita: cikirarkaunritaten-llu canek piutekaitnek; wiinga piutekaqaatnga.

²⁹Mukaarkat elliitet, assiilngurmun elliitet, akilitarkanun-llu elliitet agayulirtet neqkautekciqait, akurtulararkaugut-llu tamalkuitnek Israel-aami wangnun allakaumalrianek.

³⁰Ciuqlikacagait-llu naunrat ayuqenrilnguut, tamalkuita-llu ayuqenrilnguut elliiteci wangnun agayulirtet pik'lararkaugait; cali cikiutekarkaugaci agayulirten̄un ciuqliit quyurtaat mukaarkat miilimaksailnguut, tua-i atawaqaun elpeci enevni uitaniartuq.

³¹Agayulirtet nerngaitut piciatun, yaqulguli wall'u ungungssiuli, ellminek tuqullermek, wall'u allam ungungssim tuqutellranek.”