Read Yupik Ezekiel 45 Bible Online

Ezekiel 45 - Yupik bible

Ezekiel 45

¹Nuna avverqumakan pikestekainun, iliinek allakariarkauguci ATANERMUN, cikiutekluku tanqilriaruluku, yuinarnek qulnek mile-anek taktaarkauguq, pingayunlegnek-llu mile-anek iqtutaluni. Tamana nuna tamarmi tanqilriaruarkauguq.

²Uum iluani kangiritatekellriamek pitangqerrarkaugut Agayuvigpiim uitavigkaanek tiissitsaam avga yuinaat akimiaret yuinaagnek malrugnek qulmek cipluku (850) it'ganernek iqtutaluteng atunem qacarneri, uivetmun kassugusngalriamek carr'ilqamek yuinarnek cetamanek cetamanek cipluku (84) iqtutaluni.

³Mat'um avga, qulnek mile-anek taktalria, cetamanek mile-anek iqtutaluni, cuqcimaarkauguq, Agayuvigpak tuanciiquq, tamalkuitni tanqinrulria.

⁴Nuna tanqilriartaqerkaugaa; agayulirtet pikarkaugaat, kevgiulalriit Agayuvigpamni, ATANERMUN ullautelalrianun kevgiuryarturluku; enaita uitavigkaqaat ilii-llu nunam Agayuvigpiim uitavigkaqluku.

⁵Alla-llu avga allakaumaarkauguq Levite-anun nunautekesqelluku, calilalrianun Agayuvigpagmi. Tamaani nunacuartangqerciquq uitavigkaitnek.

⁶Caniani-llu tanqilriim, alla qulnek mile-anek taktalria, malrugnek-llu mile-agnek iqtutalria, allakaumaarkauguq, tamana Israel-aam yuin pikarkaugaat, Jerusalem-aam-llu nunarpiim uitavigkaqluku.

⁷Nuna-llu allakaumaarkauguq atanirturilriim pikaa. Keggaknelirneranek nunam tanqilriim cetran pitaarkauguq keggatmun Mediterranean-aaq Imarpik tekilluku; calaralirnermek-llu cetermek pitaarkauguq tekilluku calaralirnera nunam, tua-i taktacia pitatekluku taktaarkauguq taktaciatun nunam Israel-aam yuinun cikiutekumalriim.

⁸Man'a atanirturilriim nunautekarkaugaa Israel-aam nuniini, tua-i elliin yuut nangtenrirluki Israel-aam ilakellriarinun nuna pikevkararkauluku.

⁹ATANEQ qanertuq, “Assiilnguq ak'anun atullrurtarci, elpeci atanirturtaini Israel-aam. Mulngakenritleq nangciyaraq-llu taqiciu. Assilria aturluku elluaryaraq-llu. Watqapiar antenqigtarkaunritaci yuunka nuniitnek. Wiinga, ATANEQ Agayun, mat'umek qanrutamci.

¹⁰“Yuut tamarmeng uspernek cuqyutnek-llu piciulrianek atulararkaugut:

¹¹“Ephah-aq kinertellriit cuqyutiit pitaarkauguq bath-atun mer'et cuqyutiitetun, bath-aq pitaluni qulngurutiinek homer-aam, ephah-llu pitaluni qulngurutiinek homer-aam; homer-aaq atutuarkauguq cimiqetaarpek'nani.

¹²Shekel-aaq nallengqerrarkauguq yuinarnek gerahs-aanek; talliman shekel-aat tallimaugarkaugut shekel-aat, qulen-llu shekel-aat qulnguarkaugut shekel-aat.

¹³“Ukut aturluku elliilararkauguci: “Mukaarkaq: 1/60th-aaranek quyurcillerpet Barley: 1/60th-aaranek quyurcillerpet Olive-aat uquat: 1/100th-aaranek napautvet naugillratnek Qusngit: ataucimek yuinaat qulen ilangartaarluki katngautaitnek ilakuralriit.

¹⁶“Nunam yuin tamarmeng ullautarkaugait makut elliitet Israel-aam atanirturtiinun.

¹⁷Atanirturtem pikirarkaugai elliitekanek ekualuki tamalkuuciicetun ungungssinek, elliitet mukaarkat, wine-at-llu elliitet tamalkuita Israel-aam yui pikirluki Nutaram Iralum Nerevkaritiini, Sabbath-aani, allani-llu nerevkaritni. Pikirarkaugai assiilnguum au͡gautekain elliitai, mukaarkat elliitet, tamalkuuciicetun ekuagarkat elliitet, uitanqegcitmun-llu elliitet, Israel-aam yuin assiilnguita au͡gautekait.”

¹⁸ATANEQ qanertuq, “Ciuqliim iralum ciuqlirmi erenrani elliigarkauguci angucalumek kuluvagmek natlugnerutailngurmek menuircarluku-llu Agayuvigpak.

¹⁹Agayulirta teguciiquq iliinek assiilnguum elliitiin auganek tuaken-llu mingugluki amiigi Agayuvigpiim, cetaman kangirai ekuaviim, naparyai-llu iteryaraani iluqliim carr'ilnguum.

²⁰Malrunelgatni-llu erenrin iralum ataam tuatnaarkauguci pitsaqa'artevkenateng wall'u murilkenritlermegteggun assiilnguum aturtai umyuaqluki. Waten pillerpeciuggun Agayuvigpak menuitevkarciqaci.

²¹“Erenret-llu akimiarunritariitni ayagnirarkaugarci Passover-aam Nerevkaritii. Ernerni malrunlegni tamarpeci ner'arkauguci quuleciriyarailngurnek kelipanek.

²²Ciuqliatni nerevkaritem erenrin atanirturilria elliigarkauguq angucalumek kuluvagmek elliitekluku assiilnguminun, ukut-llu yuut tamarmeng assiilnguitnun.

²³Taukuni malrunlegni erenrini nerevkaritem elliilararkauguq ATANERMUN malrunlegnek angucalunek kuluvagnek, malrunlegnek-llu angucalunek qusnginek natlugnerilngurnek ekualuki-llu tamalkuuciicetun.

²⁴Atauciuqaqluteng angucalut kuluviit, angucalut-llu qusngit tapengqerrarkaugut cuqem avganek (1/2 bushel) mukaarkamek, pingayunek-llu quart-anek olive-aat uquatnek.

²⁵“Uqisviit-llu Nerevkaritiitni, ayagnilalriamek akimiarutiitni malrunelgata iralut, atanirturilria elliigarkauguq tamalkuitni ernerni malrunlegni cakanirpek'naku assiilnguut au͡gautiita elliitiinek, cali cakanirpek'naku elliigarkauguq tamalkuucirmitun ekuagarkamek elliitmek, cakanirpek'naki-llu elliitnek mukaarkat olive-aam-llu uquanek.”