Read Yupik Ezekiel 46 Bible Online

Ezekiel 46 - Yupik bible

Ezekiel 46

¹“ATANEQ Agayun qanertuq: Iluqliim iteryaraa carr'ilqam, calaratmun caumalria, palusngaarkauguq arvinlegni caliyarani ernerni; tau͡gaam Sabbath-aami ikirtarkauguq, Nutaram-llu Iralum Nerevkaritiini.

²Atanirturilria itrarkauguq iteryaraakun ikirtuqam ellamek, nangengqaarkauluni-llu iteryaram naparyaan caniani agayulirtet ekuavkallratni elliitai, uitanqegcitmun-llu elliitai, agayuarkauguq-llu iteryaram tuss'araani. Taqkuni-llu anluni, iteryaraq tau͡gaam palucimaarkaunrituq atakuvianun.

³Nunam yui ciktarkaugut piicagluteng-llu ATANERMUN, manuqlirmi iteryarami Sabbath-aat tamaitni, iralum-llu pitqerraallran nalliini.

⁴Sabbath-aami atanirturilria taitarkauguq ATANERMUN, tamalkuuluki ekualuki elliitekanek, arvinlegnek qusngiyagarnek, atauciq-wa angucaluq qusngirngalnguq, tamarmeng menuunateng.

⁵Atauciuqaqluki angucalut qusngirngalnguut taitelararkai ilangqerrarkauluteng elliitmek mukaarkamek puckam avganek, qusngiyagaat-llu atauciuqaqluki ilaluki taitarkauguq elliin piyullmitun. Tamalkuita-llu puckam avgi mukaarkat elliitet ilaluki taitarkauguq pingayunek quart-anek olive-aat uquitnek.

⁶Erenrani Nutaram Iralum Nerevkaritiini elliigarkauguq ayagyuamek kuluvagmek, arvinlegnek qusngiyagarnek, angucalumek-llu qusngirngalngurmek, tamarmeng menuilngurnek;

⁷Tamarmeng angucalut kuluviit, angucalut-llu qusngirngalnguut tapengqerrarkaugut elliitmek mukaarkamek puckam avganek amllertalriamek, tamarmeng-llu qusngiyagaat tapengqerrarkaugut elliin atanirturilriim piyullratun. Pingayun-llu quart-at olive-aat uquat elliitekumaarkauguq tapeqluku mukaarkamun puckam avgatun amllertalriamun.

⁸Atanirturilria itquni itrarkauguq elaturraakun iteryaram, an'arkauluni-llu itervillermikun.

⁹“Nunam yui taikata ATANERMUN agayuyarturluteng apertuumalriami nerevkaritmi, kina itellria, negeqliim iteryaraakun, piicagyarturluni an'arkauguq ungalalirnerkun iteryarakun; kina-llu itellria ungalalirnerkun iteryarakun an'arkauguq negeqlirkun iteryarakun: kina anngaunani iteryarakun itervillermikun, tau͡gaam an'arkauguq ciunermikun.

¹⁰Yuut itqata, atanirturilriim maligtarkaugai; ankata-llu, an'arkauguq.

¹¹“Nerevkaritni, apertuumalriani piyarani mukaarkaq elliin, ayagyuamek kuluvagmek tapirluku, puckam avgatun amllertaarkauguq, angucaluq-llu qusngiq tapirluku puckam avgatun amllertalriamek mukaarkamek, qusngiyagaat-llu tapirarkaugai piyunartacimitun. Pingayun quart-at olive-aat uquit elliitnguarkaugut tamalkuitnun puckam avginun mukaarkanun.

¹²“Atanirturilria elliikan umyuani aturluku ekuagarkanek, wall'u uitanqegcitem elliitiinek ATANERMUN, iteryaraq calaramun caumalria elliinun ikingqaarkauguq. Elliigarkauguq Sabbath-aami pilaucirmitun, anrraartelluku-llu iteryaraq palucimaarkauguq.”

¹³“Atanirturilriim pikiumaarkaugai qusngiyagarmek ataucimek allrakungelriamek menuilngurmek elliitekamek ATANERMUN erenret tamalkuita; unuakut tamalkuita pikiumaarkaugai.

¹⁴Tapirluku-llu pikiumaarkaugai mukaarkamek elliitmek unuakut tamalkuita uspernek tallimanek, tapirluku ataucimek quart-amek olive-aat uquatnek mukaam urutekaanek. Picirkiutai uum elliitem ATANERMUN atuugarkaugut akwarpak.

¹⁵Tuaten tua-i qusngiyagaq, mukaarkaq, uquq-llu pikiutekumaarkauguk unuakut tamalkuita akwanun.”

¹⁶Waten qanertuq ATANEQ Agayun: “Atanirturilria cikiqengkan qetunrami iliitnun nunautmi iliinek, taum qetunraan pikarkaugaa ilakuralriarin nunautiita ilakluku.

¹⁷Tau͡gaam atanirturilria cikiqengkuni iliinek nunautmi pistem̄i iliitnun, pistem pikarkaugaa angicimallerkani allrakuq tekilluku; ataam-llu utertarkauguq atanirturilriamun; kiimeng qetunrain atameng nuna cikiutellra pikarkaugaat.

¹⁸Atanirturilriim tegungaitai yuut nunautait. Qetunrani cikirarkaugai paitarkaitnek elliin nakmiin nunautminek, tuaten cakviurcessngaitai yum'a iliit nunautiinek teguiluku.”

¹⁹Tua-llu taum angutem agutaanga iteryaraatnun enet negeqvamun caumalrianun caniani casgum ungalalirnerani iluqliim carr'ilqam. Makut enet tanqilriaruut agayulirtet pikluki. Nasviitaanga-llu allamek enemek kanavalirneratni tamakut enet

²⁰qanerluni-llu, “Wani agayulirtet kemget qallarvautelararkaugait assiilngurnun elliitet, wall'u akiliucet elliitet, uutelarvikarkauluku-llu mukaarkanek elliitnek. Waten piuq makut kencignarqellriit elliitet anutelararkauvkenaki elaqlirkun carr'ilqakun, pitsaqa'artevkenaki yuum agturyugngakainun ellminek akngirrluni.”

²¹Utertukuk-llu elaqlirmun carr'ilqamun kiturluki-llu cetaman kangirai.

²²Cetamani kangiraini carr'ilqam tangertua allanek angenrilngurnek carr'ilqanek, yuinaat pingayun pingayunlegnek (68) it'ganernek taktaluteng, yuinaagnek-llu malrugnek pingayunlegnek cipluku (48) it'ganernek iqtutaluteng.

²³Ukut carr'ilqat iluatni qertunrilngurmek qacarnertarluni teggalqumek, kenillernek-llu pitarluni qacarnerem mengliini.

²⁴Tua-llu angutem qanrutaanga, “Ukut kenirviugut wani Agayuvigpagmi kevgat qallarvautelararkaugait yuut agayulriit elliitait.”