Read Yupik Ezekiel 47 Bible Online

Ezekiel 47 - Yupik bible

Ezekiel 47

¹Tua-llu ut'rutaanga Agayuvigpiim amiiganun, tuani tangrraqa meq anelria amiigem acianek calaratmun Agayuvigpiim caumallran tungiinun. Qurrlurtuq acianek ungalalirneranek Agayuvigpiim iquan uitavian, ayagluni elliiviim ungalalirnerakun.

²Tua-llu anutaanga neglirnerkun iteryarakun, ayaullua-llu uivluku elatiinun elaqliim iteryaram, calaramun caumalriim; meq-llu qurrlurtuq ungalalirnerem tungiinek.

³Angun tauna piyuaguq calaratmun cuqcissuutmek tegumiarluni, cuqtaa-llu tiissitsaam avga yuinarnek pingayunek cipluku (560) yaaltanek, tamaaggun-llu ayaasqaanga merkun ivrarlua. Meq et'utaaluni cingillregka tekillukek.

⁴Cali cuqciuq tiissitsaamek (1,000) yaaltamek, meq tuani et'utauq ciisqugka tekillukek. Ataam cuqciuq tiissitsaamek (1,000) yaaltamek, meq-llu et'utaariluni qukaqa tekilluku.

⁵Ataam cuqciuq tiissitsaamek, (1,000) yaaltamek, tuani-llu meq et'ussiyaagan ivrarlua ayagciigani. Etuami qerayunaunani kuimarluni tau͡gaam qerarnaqluni.

⁶Angun-llu qanertuq wangnun, “Tuquarkaulriami yugmi, man'a murilkenqegcaararru.” Tua-llu ut'rutaanga kuigem cen̄iinun,

⁷tuavet tekicamegnuk, tangertua kuigem tamarmek cenkegni amllernek napatangqellinilria.

⁸Qanertuq-llu wangnun, “Man'a meq qurrlurtuq calaram tungiinelngurmun nunamun, atrarluni-llu Jordan Valley-mun anluni-llu Dead Sea-mun. Itrami Dead Sea-mun, taum imarpiim mer'a taryuq cimiraa taryuilngurmek mermek.

⁹Natmun-llu kuiggaar carvanillrani ayuqenrilngurnek unguvalrianek neqnek-llu pitangqerciquq. Carvanilriim kuiggaaraam Dead Sea-m mer'a taryuiruciiqaa, natmun-llu carvanillerminun unguvamek tekiuciiquq.

¹⁰Carvainek Engedi-m Carvai Eneglaim-aam tekilluki imarpiim cen̄iini kuvyastet uitalarciqut, tuani-llu kuvyateng civtularciqait kinercirluki. Amllernek ayuqenrilngurnek neqengqerciquq Dead Sea-q, Mediterranean Sea-am neqaitun amllertaluteng.

¹¹Tau͡gaam meq marani nanvarraarni-llu imarpiim cen̄iini uitalriit taryuirusngaitut. Tamaanciiqut taryumek pitangviusqelluki.

¹²Kuigem cen̄egkeni ayuqenrilnguut napat nauciqut neqkautnguluteng. Cuyait nalangaitut, naunrait-llu nauginrirngaunateng. Nutaranek iraluni tamalkuitni naugilararkaugut, merr'iciimiimeng kuigmek carvanilriamek Agayuvigpagmek. Napat naunrait neqkauciqut, cuyait-llu atularciqut yugnun mamcissuutnguluteng.”

¹³Waten qanertuq, ATANEQ Agayun, “Ukut nunam cuqkai, aturluki avgarkaugaci nuna qula malrugnek cipluku yuullgutkellriarin Israel-aam nunautekaitnek, Joseph-aam yuullgutkelriari malrugnek cuqcimalriignek pingqerrarkauluteng.

¹⁴Avgarkaugaci pitatekluki; akqillruunga cikiutekarkauluku atavcen̄un, man'a-llu nuna elpeci piksaguciiqaci paiciutekluku.

¹⁵“Una cuqnguarkauguq nunamun: Neglirnermi, Mediterranean-aam Imarpianek Hethlon-aam nunarpii tekilluku, Hamath Pass-amun, Zedad-aq tekilluku,

¹⁶Berothah, Sibraim (tauna uitauq engeliini Damascus-aam Hamath-aam-llu). Hazerhatticon-aaq tekilluku, tauna uitauq engeliini Hauran-aam.

¹⁷Tua-i cuqa ayagarkauguq Hazarenin-aam imarpianek, tauna uitauq neglirnermi engeliini Damascus-aam, Hamath-aam engelii uitaluni neglirnermi. Una negeqvalirneruarkauguq.

¹⁸“Calaram tungiini, cuqa ayagarkauguq Hazarenon-aamek Hauran-aankuk Damascus-aaq-llu akunliignegun; Jordan-aam mengliikun Gilead-aankuk Israel-aat-llu nuniita akunliignegun; calaramelngurmun imarpigmun Tamar-aq tekilluku. Una calaralirneruarkauguq.

¹⁹“Ungalalirnerem tungiini, ayagarkauguq Tamar-amek Kadesh Meribah-m mer'i tekilluki, tuaken-llu Kuiggaarinek Egypt-aam Mediterranean Sea-q tekilluku. Una ungalalirneruarkauguq.

²⁰“Keggaknerem tungiini, Mediterranean Sea-q cuqnguarkauguq cingigmun akiani Hamath-aam iteryaraan. Una keggaknelirneruarkauguq.

²¹“Tuaten avgarkaugaci nuna Israel-aam yuullgutkelriarinun.

²²Avenqegtarkaugaci elpecen̄un nunauteksagulluku allanernun-llu nunavcen̄i uitalrianun irniangellernun nunavcen̄i. Elpecen̄un ayuqerkaugut nutem yuurtellertun yuullgutkelriarin Israel-aam nuniitni; pillgutekluci cikiumaarkaugut nunautnek yuullgutkelriarin Israel-aam nuniitni.

²³Allanret uitalriit naliitni yuullgutkelriit, tuani cikirarkaugaci nunautekaanek, qanertuq ATANEQ Agayun.”