Read Yupik Ezekiel 5 Bible Online

Ezekiel 5 - Yupik bible

Ezekiel 5

¹ATANEQ-llu qanertuq, “Tuquarkaulriami yugmi, ipellriamek nuussirpagmek teguten; keligki-llu nuyaten ungaten-llu aturluku. Uqamaltassiarcuutegnek-llu piluten pingasuirrluki avegki nuyaten.

²Pingasuingit ekuaniaten nunarpiim qukaani, avatairumallra nunarpiim iqukliskan; pingasuingit-llu nuussirpagkun kepurluki tarrarrluten nunarpiim elatiini; pingasuingit-llu anuqmun tengtelluki, malirqeraciqanka nuussirpamnek tegumiarlua.

³Ilaitnek carrarnek teguciiquten, qillrulluki-llu ulikutarpet akuanun.

⁴Tuamta-llu cali taukut ilarraitnek teguciiquten, kenermun-llu eggluki, ekuavkarluki. Tuaken keneq ayuciquq tamiinun Israel-aam angayuqauvianun.”

⁵Artuqailnguq ATANEQ qanertuq, “Tangrru Jerusalem-aaq; ellillruaqa atanruviit qukaatnun, nunat allat avatiini uitavkarluki.”

⁶Tau͡gaam Jerusalem-aaq inglulitellruuq alerquutemnun, nasvagluku assiitellriakun arcaqanrucini allani nunani, niicuillruluni nunani avatmini uitalriani. Jerusalem-aam ciuniuryuumiitellrui picirkiutenka alerquutenka-llu aturyuumiinaki.

⁷Taumek waten ATANEQ Agayun qanertuq: Nunani allani avatevni uitalriani anagulluten uitauralriarunrilavet, picirkiutenka-llu piyuavikenrilavki aturpek'naki-llu, tau͡gken callerpegun maligtaquluki nunat avatevni uitalriit piciryarait.

⁸Taumek wii, Artuqailngurmi ATANERMI, qanrutamci wii inglukesteksagutarpenga. Anucimirqecetaarciqamken-llu allanun atanruvignun tangvagtelluten.

⁹Tamalkuita-llu pellernarqelrialiaten pitekluki elpenun piciqua ciungani watqapik piksailkemnek, ayuqiinek-llu pinqiggngaunii pulenglluku.

¹⁰Taumek ataita nerlarciqait qetunrateng akunlevcen̄i, qetunraita-llu nerlarciqait atateng. Anucimirqecetaarciqamken, anucimirqecetaarutma-llu unguvaluteng pellugtai cekavciiqanka natmun anuqem piciatun ayagallranun.

¹¹“Taumek, unguvalua Agayutngucimtun, una qanelqaa Artuqailnguum ATANREM, agayuvika menuurcavgu uuminarqellriatgun akluvkun tamalkuitgun-llu pellernarqelrialiarpegun, wiinga iquciiqamken takumcuyugpek'nii.

¹²Yugpet pingasuingit tuquaciqut naulluutetgun palualuteng-llu nunarpiim iluani; pingasuingit nuussirpagkun iqucimaciqut elatiini nunarpiim; pingasuingit-llu cekavceciiqanka natmun piciatun anuqem ayagallranun, nuussirpak-llu caquanek amuluku maligciiqanka.

¹³“Tuaten ayuqluni eq'urtelqa ciumurciiquq nangviminun, qenertelqa-llu ellaitnun anciiqaqa wangnek cupuirlua; ellaita-llu nallunrirciqaat wiinga, ATANEQ, qanellruciqa qungyaumallemni, qenertelqa ellaitnun tut'eskumku.

¹⁴Tamana ilaluku yuiruceciiqamken caunrilkumaciquten-llu allanek angayuqauvignek avatevni uitalrianek, cali kituraqamegteggen tangertevvet caunrilkelarciqaatgen negurluten-llu.

¹⁵“Caunrilkumaciquten, cangakuurutnguluten, aarcirtuutnguluten alingnarqelriaruluten-llu avaqlirpenun nunanun, anucimirqecetaaqumken qenerrlua angelriamek-llu eq'urrlua, assiitellriakun anucimirqecetaarluten, Wiinga, ATANEQ, qanertua—

¹⁶pitegcautenka tuqunarqelriit elpenun ayagteskumki, pitegcautai piitnam, pitegcautai piunririlriim, ayagcetarkanka piunrirrnaluten, taiskuma piitnamek nangyuunaku elpenun, neqairucelluten-llu.

¹⁷Piitnaq ayagceciiqaqa ungungssit-llu yuilqurmiutaat, taukut teguiciqaiceci irniarpecen̄ek; cangerlak auk-llu elpeggun kiturciquk; nuussirpak-llu tuc'eciiqaqa elpenun. Wiinga, ATANEQ qanertua.”